Eclesiástes 4 - Biblia en Guaraní - ?anderuete ?e’? Por? 2015

1Ajere ha ahechapa opaichagua jejopy ojejapóva guive ko yvy apére; ha péina ápe umi ojejopýva resay, ndojohúi avavépe omoangapyhyséva ichupekuéra; ha ijopyharakuéra pópe oĩmba pe pu’aka, ha ichupekuéra g̃uarã katu ndaipóri moangapyhyhára.

2Upévare che aguerohoryve umi omanomava’ekuépe umi oikovévagui.

3Che aguerohoryve katu umi onace’ỹvape, umi ambue mokõigui, ndohecháigui tembiapo vaieta ojejapóva ko yvy apére.

4Ahecha avei pe omba’apo hetáva ha osẽ porãmba ramojepe ichupe ojapóva guive, ha’e ndojohúi peteĩ angirũ (amígo), reiete oñeha’ãmbava’ekue, (hapichakuéra ipy’a rasýgui hendive).

5Pe ivýrova ombojoasa ipokuéra ha ho’u ho’otee (péva he’ise: Ha’e voi ombyai hekove).

6Iporãve peteĩ po henyhẽva py’aguapýgui, mokõi po henyhẽva mba’apo ha jepy’apýgui.

7Ha che ajere jevývo, ahechakuaa mba’e reieteha avei ko mba’e kóva.

8Ahecha peteĩ kuimba’e ha’eñoite oikóva, ndaipóri avave omoirũva ichupe, ndaita’ýrai ni ndahyke’ýi; ha’e omba’apo pohýi ha hesakuéra naikane’õi oma’ẽ hag̃ua imba’erepyeta rehe, ha’e katu noñeporandúi: Mávape g̃uarãpa che amba’apo, ha ha’e oñeha’ãmba ombohetave hag̃ua ohóvo, hembiapo pohyietéva ha péva ningo reiete ojapo.

9Mokõi tapicha iporãve peteĩgui, hetave oguenohẽkuaa hembiapo repykuégui.

10Ho’a ramo peteĩ, ambue omopu’ãta iñirũme; angái, upe ha’eñóva, ho’a ramo, ndaiporimo’ãi hapicha omopu’ãkuaáva ichupe.

11Ha avei mokõi oke ramo oñondive, oñombyaku hikuái; ha mba’éicha piko ha’eñomi okéva oñembyakukuaáta.

12Peteĩ rehe ipu’akakuaa, mokõi rehe katu ndaipu’akakuaamo’ãi avave; ha peteĩ sã ojejapóva mbohapy inimbógui ndosói pya’e.

13Iporãve peteĩ karia’y mboriahu ha iñarandúva, peteĩ tetã ruvicha ituja ha itavy rekóvagui, noñehekombo’ekuaavéimagui.

14Osẽguirõ cárcelgui oisãmbyhy hag̃ua hetãme, térã jepémo onace mboriahumínte, pe mburuvichaguasu.

15Ahechákuri mayma oikóva guive ko yvy apére oipota pe karia’y oisãmbyhy hag̃ua, pe tetã ruvicha itujáva rendaguépe.

16Aty atýpe hetãyguakuéra oho hapykuéri ha upeichavéramo jepe umi uperiregua ndovy’aveimava’ekue hendive. Ha ã mba’e reiete jevy, ha ojogua peteĩ yvytu ojokosévape.