Romayguakuérape 5 - Biblia en Guaraní - ?anderuete ?e’? Por? 2015

Pe heko potĩva hi’a heta jerovia’a

1Ko’ág̃a ñande jajerereko heko potĩva ramo jajeroviágui Hesu Crísto rehe, ha ñande py’aguapýma Ñanderuete ndive Ñandejára Hesu Crísto rupi.

2Hesu Crísto rupi ñande jahupitýma Ñanderuete poriahuvereko jopói, jajeroviágui hese, ha ñaime hatã ipype, ha javy’a jahupitytaha rehe avei Ñanderuete reko jajaipa.

3Ha ndaupévai año, javy’a katu jahasa asy ramojepe, jaikuaa porãgui pe jehasa asy hi’aha paciéncia,

4ha pe paciéncia ñanemokyre’ỹ jagueropu’akapa hag̃ua, ha jagueropu’akapa rire pe jepy’ara’ã, okakuaave ohóvo ñane esperánza,

5ha pe esperánza Ñanderuete rehe nombotavymo’ãi avavépe, Ñanderuete mborayhu omyhenyhẽgui ñande py’apy imborayhúgui, ha opaite ko’ã mba’e oñeme’ẽ ñandéve Pytu Porãmbáva rupi.

6Hesu Crísto ningo omanóma ñane angaipavorakuéra rehehápe hi’araitépe, Ñanderuete oiporavo haguéicha.

7Añetehápe hasy peteĩ tapicha omano hapicha heko potĩva rehehápe, opáichavo ojehúne, sapy’a py’a peteĩ ome’ẽséva hekove mba’e porãite rehehápe.

8Ñanderuete katu ohechaukáma imborayhu ñandéve, Hesu Crísto omanóvo ñanderehehápe, ñande jaiko ramojepe angaipa (Aña) poguýpe.

9Ha ko’ág̃a jajeguerekóma heko potĩva ramo Hesu Crísto ruguy rupi, Hesu Crísto ñandesalva Ñanderuete jehavirágui, péva he’ise ñembojovakeha áragui (juício árape).

10Ñande ñañemoĩva’ekue ramojepe Ñanderuete rehe, Hesu Crísto ñanemoĩ porãma iñemano rupi Itúva ndive. Ha Ñanderuete omoingove jevy haguére Hesu Crístope omanova’ekue apytégui, Ha’e ñanemoingove jevýta avei omanova’ekue apytégui. Ha’e ñanemopotĩva’ekue jaikove hag̃ua tapia Hesu Crísto ha Ñanderuete ndive yvágape.

11Ndaupévai año, jarovy’aite avei Ñanderuetépe, Ñandejára Hesu Crísto rupi. Hesu Crísto rupínte jaiko porã jevýma avei ñande apohare, Ñanderuete ndive.

Adan ha Hesu Crísto, mokõi tape

12Peteĩ kuimba’e, Adan rupi oike pe angaipa opavave rekovépe, ha pe angaipa rupi opavavete omanova’erã katuete avei, opavavete oñemboheko vai haguére avei.

13Pe angaipa oikóma ko yvy ári, Ñanderuete ome’ẽ mboyve Moiséspe hembiapoukapykuéra, ndojehechakuaái katu pe angaipa, og̃uahẽ meve Moises rembiapoukapykuéra.

14Opáichavo Adan guive Moises peve, pe ñemano ipu’akava’ekue umi oñemboheko vaiva’ekue rehe. Noñemoangaipa vaíri ramojepe hikuái, Adan oñemoangaipa vaiete haguéicha, Adan ningo ojoguava’ekue pe oútavape uperire.

15Ñanderuete poriahuvereko me’ẽmby ningo Hesu Crísto kuave’ẽmby ha kóva ndojoguaiete katu Adan ñe’ẽrendu’ỹme; Adan ñe’ẽrendu’ỹ ogueru opavavévape ñemano, Hesu Crísto kuave’ẽmby katu ogueru pe tekove añeteguáva hetápe g̃uarã. Hesu Crísto ningo Ñanderuete jopói ndetuicháva opavavévape g̃uarã.

16Pe angaipa ou peteĩ kuimba’e rupi, ndaupéichai Ñanderuete poriahuvereko me’ẽmby rehe, ouva’ekue hetaiterei tembiapo vaípe g̃uarã. Ñanderuete jehavira oumava’ekue ñandéve peteĩ angaipa rupi ha ogueru pe ñemano, Hesu Crísto kuave’ẽmby katu ñanemboheko potĩ ñane angaipágui.

17Upéicha, peteĩ kuimba’e, Adan, rembiapo vaikue rupi opavave opyta pe ñemano pu’aka poguýpe. Pe ambue kuimba’e, Hesu Crísto rupi katu opavave ohupitýva guive Ñanderuete jopói ha oñembohekopotĩva opyta pe tekove añetegua pu’aka poguýpe ha oisãmbyhýta Hesu Crísto ndive ko yvy tuichakue.

18Peteĩ kuimba’e, Adan, angaipa rupi opavave ho’a ñemano pu’aka poguýpe; ambue kuimba’e, Hesu Crísto rupi, opavave ohupity pe salvacion, péva ningo pe tekove tapia g̃uarãva.

19Peteĩ kuimba’e iñe’ẽrendu’ỹva’ekue rupi opavave oñemboheko vaíma, ha ambue kuimba’e iñe’ẽrenduva’ekue rupi opavave oñemboheko potĩ jevyva’erã ojeroviáma guive.

20Moises rembiapoukapykuéra oñeme’ẽnte ohechauka hag̃ua pe angaipa pu’aka vai ombyaíva opavave rekove, oñembohetavégui ohóvo. Ha pe angaipa oñembohetágui, Ñanderuete oñohẽ imborayhu ha iporiahuvereko ombopoguy hag̃ua pe angaipa pu’aka vai.

21Ha pe angaipa ombopoguy haguéicha tetãyguakuéra rekove, oguerúvo ichupekuéra pe ñemano, péicha ko’ág̃a Ñanderuete mborayhu ombopoguy pe ñemano pu’aka omboheko potĩ hag̃ua, ha ome’ẽ ñandéve jeikove tapia g̃uarãva, Ñandejára Hesu Crísto rupi.