1Pehendu ko’ã mba’e Jacóbo róga, hérava avei Israel, pesẽva’ekue Juda y hetágui, peẽ peme’ẽva pene ñe’ẽ Ñanderuete rérape, ha peñemomandu’áva Israel Jára rehe, ndaha’éi ramojepe añetehápe ni hekoitépe.
2Peñembohéra táva oñemboykéva Ñanderuetépe g̃uarã ha Israel Jára réragui peha’ãrõ pene ñepytyvõrã, héra yvága atykuéra Jára.
3Umi mba’e ojehumava’ekue, Che ha’eva’ekue, ha che jurúgui osẽmava’ekue; amoherakuãva’ekue, ha katuete oiko Che ha’e hagueichaite.
4Aikuaa porãgui nde rova’atãha, ha nde atúa hatã hiérroicha ha nde syva brónceicha,
5yma ha’éma ndéve ko’ã mba’e ko’ãva; Che aprofetizaukava’ekue ojehu mboyve, ani hag̃ua ere: Péva che jára gua’u ojapo ha che po rembiapokue voi ombou chéve ko’ã mba’e.
6Nde voi ningo rehendu ha rehecha opaite ko’ã mba’e, ha napemombe’uséi piko. Ko’ág̃a ahenduka ndéve mba’e pyahu ha ñemiha megua ndereikuaáiva.
7Ko’ág̃a ojejapóva ndaha’éi kueheguare árape, ha ko ára kóva peve nerehendúi gueteri ko’ã mba’e, ani hag̃ua upéi erétei: Péina ápe che aikuaapáma voi.
8Mba’eve nerehendúi, ha mba’eve ndereikuaái; añetehápe araka’eve nde apysa ndojepe’ái gueteri ohendu hag̃ua umi mba’e umíva; aikuaa voi nde reñemosẽha cherehe ha remboykeha che ñe’ẽ nde reĩ guive nde sy ryépe.
9Che réra rayhupápe ambopoguy che pochykue, ha che reko jajaipa rehehápe ajejoko ani hag̃ua rohundiete.
10Péina ápe, Che romopotĩ, ndaha’éi katu ku pláta oñemopotĩ háicha, Che romopotĩva’ekue che jehasa asy ratakuápe.
11Cherehehápe ha che rayhupápe ajapo ko’ã mba’e, ani hag̃ua oñemongy’a che réra, ndaipotái avave oñembotuicha che rendaguépe.
12Nde Jacóbo cherendu, ha nde Israel avei, Che rohenoiva’ekue: Che voi, pe tenondevegua ha che avei pe ipaha pegua.
13Che po omohendava’ekue ko yvy tuichakue, ha che po akatúa omyasãi yvagakuéra; Che ahenói ramo ichupekuéra, ou joaitéta che rendápe.
14Peñembyaty ha pehendu. Mávapa pende apytégui omombe’ukuaa umi mba’e ojehútava. Che, pende Ruete pohayhúva, ajapóta pe che aipotáva Babilóniare, ha che jyva ombopoguýta Caldeayguakuérape.
15Che amombe’upáma ko’ã mba’e ko’ãva, Che ahenóima ichupe ha aguerúta avei ichupe, hembipota osẽ porãmba hag̃ua.
16Peñemboja che rendápe, pehendu hag̃ua ko’ã mba’e: Iñepyrũmby guive nañe’ẽi ñemiháme; ha ko’ág̃a Che, yvága Jára, aĩ hendive ha ame’ẽ ichupe che Pytu Porãite.
17Péicha he’íkuri pende Ruete, ne pytyvõhára, Israel Heko porãva: Che ha’e nde Ruete, nde Jára, nembo’éva reiko hag̃ua hekoitépe, rohekombo’e ha ahechauka’aína ne raperã.
18Nde rejapysaka porã rire che rembiapoukapy rehe, nde py’aguapy okakuaava’erãmo’ã ysyryguasúicha, ha nde justícia (tekojoja) ojehupiva’erãmo’ã y pu’ã yguasu peguáicha,
19ha ndera’ykuérava’erãmo’ã yvyku’ícha ha ne ñemoñarenguéra yvyku’i ra’ỹicha, ha noñembogueiva’erãmo’ã ne ñemoñare réra ha umía ndopaiva’erãmo’ã che resa renondépe.
20Pesẽ Babilóniagui, pekañy Caldeaygua apytégui; tapeho pemombe’u ko’ã mba’e ko’ãva vy’apópe ha pemyasãi pe yvy apýra paha peve pejévo: Ñanderuete operdonáma hembiguái Jacóbope.
21Ndaijy’uheivéima hikuái Ha’e ogueraha ramoguare ichupekuéra desiérto rupi; itaguasúgui Ha’e oguenohẽ pe y ichupekuéra g̃uarã, ojokávo pe itaguasu osyry hag̃ua pe y.
22Umi iñañávape g̃uarã katu ndaipóri py’aguapy, he’i Ñanderuete.
Who We AreWhat We EelieveWhat We Do
2025 by iamachristian.org,Inc All rights reserved.
