1Ho’áma upe jára gua’u Bel, ha ojeitýma avei Nebo; ha’ãngakuéra ojehupi hymbakuéra ati’y ári, ha’ekuéra omboguata ha’ãngakuéra táva mbyte rupi (procesion) omokane’õ meve hymbakuérape ijára gua’u pohyikue rupi.
2Bel ha Nebo, ijára ra’ãnga ojeity ha oñemotĩndy, ha’ekuéra ndaikatúi oguenohẽ avavépe ijejopy vaígui, ko’ág̃a ojegueraha voi ichupekuéra jepokuapýpe ambue tetãme.
3Peẽ, Jacóbo rogaygua, ha peẽ Israel rogaygua hembýva guive pejapysaka porãke, Che voi pogueraha pende sy rye guive.
4Ha Che nañemoambuemo’ãi, pende tuja peve ha pene akã imorotĩmba peve añangarekóta penderehe; Che pogueraha haguéicha, poguerahavéta ha añangarekovéta penderehe.
5Máva rehépa peẽ chembojojase, mavapépa ajogua.
6Ha’ekuéra oguenohẽ óro ivoságui, ha oha’ã ipirapire balánzape, ome’ẽ ipirapire óro rehe omba’apóvape ojapo hag̃ua ijára gua’u ra’ãnga, upéi oñesũ henondépe omomba’eguasu hag̃ua ichupe.
7Ohupi hikuái ijati’y ári ogueraha hag̃ua hendag̃uáme; upépe opyta, ikatu’ỹre oku’e hendágui. Osapukái ramojepe ichupe hikuái, ha’e nopenái hesekuéra, ha noguenohẽkuaái ichupekuéra ijejopy vaígui.
8Peñemomandu’áke ko’ã mba’e ko’ãva rehe ha peñemokyre’ỹke, pejepy’amongeta porãke peẽ teko vai apohare.
9Peñemomandu’ákena umi mba’e yma oikomava’ekue rehe; Che voi ningo pende Ruete, ha ndaipóri ambue Jára, ndaipóri avave chejoguaha.
10Iñepyrũmby guive amombe’úma umi mba’e ipahápe ojehútava, ha ymaiterei guive amyesakã umi mba’e ne’ĩra gueteri oikóva; Che ñe’ẽ ha’emava’ekue katuete oikóta ha umi mba’e ajaposéva guive katuete ajapopáta avei.
11Ahenói kuarahyresẽ guive pe taguato ha tetã mombyryete guive pe kuimba’e Che aiporavova’ekuépe. Pe mba’e ha’emava’ekue oikotaha, pe mba’e ajaposéva katuete ajapopáta avei.
12Peẽ cherendu, pendepy’a hatãva, ha peñemomombyrýva justíciagui.
13Che amog̃uahẽta pene rendápe che ñepytyvõ, naimombyryvéima che salvacion, hi’ag̃uíma uvei. Siónpe aguenohẽta ijejopy vaígui ha Israélpe ahechaukáta che reko jajaipa.
Who We AreWhat We EelieveWhat We Do
2025 by iamachristian.org,Inc All rights reserved.
