Sofonías 2 - Biblia en Guaraní - ?anderuete ?e’? Por? 2015

Peñembyasýke pejapo vai haguére

1Peñembyaty ha pejepy’amongeta porãke, peẽ petĩ’ỹva,

2ojejapo mboyve Ñanderuete rembipota, ha ohasa mboyve upe ára upéva ku yvyra rogue pirukuéicha, og̃uahẽ mboyve pende ári Ñanderuete pochy, Ñanderuete pochy penderupity mboyve.

3Peheka Ñanderuetépe peẽ peñemomirĩva guive, peẽ pejapóva guive hekoitépe hembiapoukapy, peheka justícia, peñemomirĩve pehóvo, upéicha ikatúne pejohu pytyvõ ipochyha árape.

4Gáza inandi veráta, Ascalon oñembotaperéta, Asdódgui oñemosẽmbáta asaje pytépe, ha Ecron pegua omanombáta.

5Angái, peẽ Cretaygua peikóva yguasu rembe’y rehe, pende Ruete ñe’ẽ penderehe ou, Canaan, Filisteayguakuéra retã, Che pohundiukáta oĩve’ỹ meve pene ñemoñare.

6Pende yguasu rembe’y peguágui oikóta kapi’ity ovecha rerekuakuérape g̃uarã, ha ovecha korapy ojejapóta ipype.

7Upe yvy upéva opytáta Judayguakuérape g̃uarã, upépe ha’ekuéra omongarúta hymbakuéra, Ascalon pegua ogakuérape okéta hikuái pyharekuépe, pende Ruete, pende Jára oñandúta ichupekuéra osẽ hag̃ua cárcelgui.

8Che ahendupákuri Moab ñembohory ha Amon ñemoñarenguéra ojahéi javérõ che retãre ha oñe’ẽvaírõ che retã yvýre.

9Upévare Che, ángel atykuéra Jára ha Israel Jára, che rekovére, ame’ẽ che ñe’ẽ: Upe mba’e ojehuva’ekue Sodómape ojehu jevýta Moab retãme, umi mba’e ojehuva’ekue Gomórrape ojehu jevýta Amon retãme, ijyvýgui oikóta ñuatĩndy, jukerity ha kokuere opaite árape, ha che retã Israel rembyremi omondapava’erã ichupekuéra, ha che retã rembyremíme opytava’erã imba’eita reheve.

10Ko’ã mba’e ojehuva’erã ichupekuéra oñembohory haguére, omotĩ ha oñembotuicha haguére pende Ruete retã rehe.

11Che ajopyetéta ichupekuéra ahundi peve opaite tetã jára gua’ukuérape, ha opaite tetãnguéra omomba’eguasúta Ñanderuetépe, umi tetã yguasúpe oikóvape ha opaite ambue tetãnguéra oikohápe.

12Ha peĩ Etiopiaygua, pemanombáta che kyse pukúpe.

13Ha upéi Che aipysóta che po umi tetã oikótavare yvate gotýo, Che ahundíta Asíriape ha ambotaperéta Nínivepe, opyta hag̃ua yvy nandi ku yvy perõicha.

14Hymbakuéra aty opytu’úta itavakuépe ha opaichagua mymba ñu rupigua oikóta ipype, pe tukã ypegua ha pe kui’ĩ oke joava’erã itaperekuépe, guyrakuéra opuraheiva’erã hovetãnguépe, yryvu oikóta hokẽnguéra oĩ haguépe ha umi tábla porãita ojepe’áta ikotykuéragui.

15Kóa ha’ehína pe tavaguasu horyetéva, kyhyje’ỹme oikova’ekue, ha he’íva ipy’apýpe: Cheichagua táva ndaiporivéima ambue. Mba’eichaitépa itapere ko’ág̃a ha oiko ichugui mymbakuéra pytu’uha renda. Oimeraẽ ohasátava guive ijypy rupi oñembohory ha oñe’ẽvaíta hese.