Deuteronómio 15 - Biblia en Guaraní - ?anderuete ?e’? Por? 2015

Pe perdon áño

1Og̃uahẽvo pe áño 7-hápe, reperdonava’erã nde rapicha cuénta.

2Ha péicha ojejapova’erã pe perdon áñope: Mayma oiporukava’ekue ipo rupi hapichápe, oheja reiva’erã icuénta; ha ndojerureveiva’erã oñemyengovia hag̃ua, taha’e hapicha térã ipehẽngue, og̃uahẽmagui Ñanderuete perdon áño.

3Pe tetã ambueyguápe rejerurekuaa omyengovia hag̃ua ndéve; anítei rejopy ne retãyguápe, reheja reiva’erã uvei.

4Ñanderuete ndoipotái ne retãme oiko imboriahúva, upévagui sapy’a peteĩ ohasa asy ramo ani rejopy ichupe, eipytyvõ uvei ichupe, Ñanderuete omyengoviapáta ndéve ipytyvõ rupi,

5upévare neñe’ẽrendu Ñanderuetépe ha ejapo hembiapoukapy Ha’e he’íva guive ndéve ko árape che juru rupi,

6upéicha ramo Ñanderuete nepytyvõ porãta, he’i haguéicha ndéve, nde reiporukáta heta tetãnguérape, ha natekotevẽmo’ãi reiporu mba’eve ichuguikuéra, reguerekóta pu’aka heta tetãnguéra rehe, ha nderehe avave ndaipu’akamo’ãi araka’eve.

Mboriahúpe mba’e jeporuka

7Oĩ ramo imboriahuetereíva pende rapichakuéra apytépe, pe yvy Ñanderuete ome’ẽtavape ndéve, ani ndepy’ahatãtei ha ani ndepojopy nde rapicha imboriahúva ndive;

8ndepojerava’erã uvei, ha reiporukava’erã ichupe umi mba’e oikotevẽva guivépe.

9Eñangarekóke ndejehe ha ani ndepojopy vai ha ere nde py’apýpe: Og̃uahẽmbotáma pe áño 7-ha térã perdon áño, ha rema’ẽ vai nde rapicha oikotevẽva rehe ani hag̃ua nde reipytyvõ ichupe mba’evépe; ha’e ojerure asýta Ñanderuetépe, ha péicha nde reñemoangaipáma.

10Katuete reme’ẽva’erã ichupe, ha nde py’apýgui nereñandu asýiva’erã reme’ẽ vove ichupe; péicha ramo Ñanderuete nepytyvõta opaite mba’e rejapóva guivépe.

11Araka’eve ndopamo’ãi mboriahukuéra ko yvy apére, upévare che ha’e ndéve: Ndepojerava’erã ne pehẽngue ndive, pe imboriahúva ha pe oikotevẽitéva ndive, oikóva guive ne retãme.

Tembiguái rei (esclávo) rembiapoukapy

12Peteĩ Israelgua kuimba’e térã kuña ha’e voi oñevendese ramo ambue Israelguápe, omba’apóta ichupe g̃uarã 6 áño pukukuénte, ha pe áño 7-hápe ojepoiva’erã ichugui sã’ỹre.

13Ha repoi ramo ichugui, neremondoiva’erã po nandi reheve.

14Reme’ẽva’erã ichupe pojerapópe nde ovechakuéragui, ne ñemitỹnguégui ha nde parral rykuerégui; reme’ẽva’erã ichupe umi mba’égui Ñanderuete nepytyvõ porã haguére.

15Nemandu’ava’erã nde reiko hague avei tembiguái rei ramo Egípto retãme, ha Ñanderuete ndesalva hague avei; upévagui ha’e he’iuka ko’ã mba’e ndéve ko árape rejapo hag̃ua.

16Ha pe tembiguái he’i ramo ndéve: Ndorohejaséi, nderayhúgui ndéve ha nde rogayguápe, ha ovy’águi penendive,

17upéicharamo rejapyhýta peteĩ ju ha emboja ichupe pe okẽ rehe ha embokua inambi, ha oikóta ne rembiguái ramo opaite árape; upéicha avei rejapova’erã ne rembiguái ha’érõ peteĩ kuña.

18Ha ani rema’ẽ vai remondo vove ne rembiguáipe sã’ỹre, ha’e omba’apo ndéve 6 áño pukukue ha hembiapo rupi nde rehupitýma mokõi mba’apohára rembiapo repykue ha Ñanderuete nepytyvõta opaite mba’e rejapótava guive.

Tymba ra’y ypykue oñemboykéta avei Ñanderuetépe g̃uarã

19Emboyke Ñanderuetépe g̃uarã mayma mácho ypykue nde vakara’ýgui, nde ovechágui ha nde kavarágui; neremomba’apoiva’erã nde vakara’y ypykue ha nereñapĩriva’erã nde ovechara’y ypykue.

20Umía re’uva’erã meme áñope, nde ha nde rogayguakuéra ndive, pe yvy pehẽngue Ha’e oiporavomava’ekuépe ha oĩháme Ñanderuete róga jojohuha.

21Ha rejohu ramo hese peteĩ mba’e ivaíva, hesatũ ramo, térã ikarẽ, térã oguereko ramo ijehe oimeraẽ mba’e ivaíva, ndereikuave’ẽiva’erã Ñanderuetépe.

22Pe táva reikohápe re’uva’erã umía; ha nendive ho’ukuaa kuimba’e ha kuña, ipotĩ’ỹva ha ipotĩva avei, oje’u háicha guasu ro’o, upéicha peẽ pe’úta pene rymba naiporãmbáiva ro’o.

23Huguykue katu ndere’uiva’erã, reñohẽva’erã ýicha yvy apére.