Números 23 - Biblia en Guaraní - ?anderuete ?e’? Por? 2015

1Ha Balaam he’i Balácpe: Emopu’ã chéve ko’ápe 7 kuave’ẽmby renda ha embosako’iuka chéve ko’ápe 7 tóro ra’yrusu ha 7 ovecha mácho.

2Ha Balac ojapo Balaam he’i haguéicha ichupe; upéi Balac ha Balaam oikuave’ẽ peteĩ tóro ra’yrusu ha peteĩ ovecha mácho meme kuave’ẽmby renda ári.

3Ha Balaam he’i Balácpe: Eñembo’y ne kuave’ẽmby renda ypýpe, ha che añemboykéta, Ñanderuete ikatu ou cheruvaitĩ hag̃ua ha oimeraẽ mba’e Ha’e ohechaukáva chéve, che amombe’u jevýta ndéve. Ha oho peteĩ cérro perõme.

4Ha Ñanderuete ou Balaam rendápe, ha Balaam he’i ichupe: 7 kuave’ẽmby renda amohenda, ha peteĩteĩva ári aikuave’ẽ peteĩ tóro ra’yrusu ha peteĩ ovecha mácho.

5Ha Ñanderuete omoĩ iñe’ẽ Balaam jurúpe, ha he’i ichupe: Tereho jevy Balac rendápe, ha ere ichupe che ñe’ẽ.

6Ha Balaam ou jevy Balac rendápe, ha péina ha’e oĩhína ikuave’ẽmby ojehapypáva ypýpe, ha hendive oĩ Moabgua karai ancianokuéra.

7Ha Balaam oñe’ẽ ñembojoja rupi ha he’i: Arámgui chegueru Balac, Moab retã ruvicha, umi cerrokuéra kuarahy resẽguio aju, Balac oipotágui che amaldeci Jacóbope, ha ajopy Israélpe.

8Mba’éicha piko ikatu che amaldeci pe tetãme, Ñanderuete ohovasámava’ekue. Ha mba’éicha piko che añe’ẽvaíta Ñanderuete noñe’ẽvaíri ramo.

9Pe itaguasu ári guive ahecháta, ha cérro yke guive ama’ẽta Israel rehe; péina ápe oĩ peteĩ tetã oikótava ha’eño ha ndojepapakuaáiva tetãnguéra apytépe.

10Mávapa ikatúne oipapa Jacóbope, yvy timbóicha oiko hikuái térã mávapa ikatu oipapa imbyte mbytére (1/4) jepe Israel atýragui. Hi’ãnte che amano, omano háicha umi hekojojáva, ha che ára paha tohasa ha’ekuéraicha.

11Upéramo Balac he’i Balaámpe: Mba’éiko rejapo cherehe. Che rogueru remaldeci hag̃ua cherehe ija’e’ỹvape ha péina rehovasa ichupekuéra.

12Ha’e ombohovái ha he’i: Nda’eiva’erãpara’e pe ñe’ẽ Ñanderuete omoĩva che jurúpe.

13Ha Balac he’i: Ajerure ndéve reju hag̃ua chendive ambue tendápe; ha hi’ag̃uiveháme rehechapáta ko’ág̃a ha nderehechapamo’ãiva; ha upeguive emaldeci ichupekuéra.

14Ha ogueraha ichupe Zofim ñúme, Pisga ru’ãme, ha omopu’ã 7 kuave’ẽmby renda ha oikuave’ẽ peteĩ tóro ra’yrusu ha peteĩ ovecha mácho peteĩteĩva umi kuave’ẽmby renda ári.

15Upéramo Balaam he’i Balácpe: Epyta ko’ápe, ko kuave’ẽmby ojehapýva ypýpe, ha che aháta amo gotyove ajojohu hag̃ua Ñanderuete ndive.

16Ha Ñanderuete osẽ ojohu hag̃ua Balaámpe ha omoĩ iñe’ẽ ijurúpe, ha he’i ichupe: Tereho jevy Balac rendápe ha ere ichupe rehendu haguéicha.

17Ha ou jevy hendápe, ha péina ha’e oĩhína ikuave’ẽmby renda ypýpe ha hendive oĩ Moab karai ancianokuéra; ha Balac he’i ichupe: Mba’épa he’i Jahve (nde Ruete).

18Upéramo ha’e ojapyhy iñe’ẽ ñembojoja ha he’i: Balac eñembo’y ha ejapysaka porã; ehendu che ñe’ẽ, nde Zipor ra’y:

19Ñanderuete ndaha’éi kuimba’e térã kuña ijapúva, Ha’e ndaha’éi iñemoñare oñemoambuevahína. Ha’e he’íva guive ojapova’erã katuete. Ha’e oñe’ẽva guive ojehu.

20Eikuaa porãke, Ha’e he’i chéve ahovasa hag̃ua ha umi Ha’e ohovasávape che ahovasamanteva’erã avei.

21Ha’e ndohechái Jacóbo rehe aña reko, ha maldicion ndojamo’ãi Israel rehe, Ñanderuete, Ijára oĩgui hendive, ha Israel omomba’eguasu Jahvépe.

22Jahve oguenohẽ ichupekuéra Egíptogui; Ha’e imbarete tóro saitéicha.

23Jacóbo rehe ndojamo’ãi paje ni maldicion, Israelguakuéra ombotuichágui Jahve rembiapo, Ha’e ojapóva ijapytépe.

24Eikuaa porãke, pe tetã opu’ãta leõkuñáicha, ha pe leõ oñakãrapu’ã yvatéta; ha ndopytu’umo’ãi omokõ meve ijapyhypyre, ha hoy’u peve ijapyhypyre ruguykue.

25Upéramo Balac he’i Balaámpe: Neremaldecíri ramo ichupekuéra, ani rehovasátei ichupekuéra.

26Balaam he’i jevy Balácpe: Nda’éipara’e ndéve, opaite mba’e Ñanderuete he’íva guive, upéva ajapova’erãha.

27Ha Balac he’i Balaámpe: Ajerure ndéve reju hag̃ua ha rogueraháta ambue tendápe; ikatu porãnte hi’ã Jahvépe remaldeci ichupekuéra upeguive.

28Ha Balac ogueraha Balaámpe Peor ru’ãme, oma’ẽva desiérto gotýo.

29Upéramo Balaam he’i Balácpe: Emopu’ã chéve ko’ápe 7 kuave’ẽmby renda ha embosako’i chéve ko’ápe 7 tóro ra’yrusu ha 7 ovecha mácho.

30Ha Balac ojapo Balaam he’i haguéicha ichupe; ha oikuave’ẽ peteĩ tóro ra’yrusu ha peteĩ ovecha mácho peteĩteĩ kuave’ẽmby renda ári.