Provérbios 31 - Biblia en Guaraní - ?anderuete ?e’? Por? 2015

Tekombo’e porã tetã ruvichápe g̃uarã

1Ko’ã ñe’ẽ Masa retã ruvicha Lemuélpe g̃uarã, isy ombo’e haguéicha ichupe:

2Mba’épa che ha’éta, che memby ahayhuetévape, mba’épa che ha’éta che memby che ryepy peguarépe, ha mba’épa rohekombo’evéta che memby ajerureiteva’ekuépe:

3Ani reme’ẽ kuñakuérape nde pu’aka, ha ani reiko umía ndive, ha’ekuéra ombyaíta tetã ruvicha reko,

4nde, Lemuel, kóva ndaha’éi tetã ruvicha rembiapo, reiko ramo víno ha cáña ñemokõ rapykuéri,

5umi ka’úpente oikóva hesaraikuaa tetã rembiapoukapýgui ha anítei péicha reñemboykétei umi ojepy’apy vaívagui;

6pemonga’ukuaa umi oñehundítavape ha peme’ẽ pe víno ojepy’apyetereívape;

7tomboy’u ha tahesarái hikuái hemikotevẽnguéragui, ha ta’imandu’ave’ỹ ijehasa asy rehe;

8ejejurupe’a iñe’ẽngúva rehehápe, embojovake hekoitépe umi ijehe ipu’akave’ỹva rehehápe;

9ejejurupe’a, ha embojovake hekoitépe ha emo’ã pe imboriahúva ha ohasa asyetereívape.

Pe tembireko ikatupyry ha iporãva

10Mávapa ojehukuaa pe tembireko heko potĩva. Ha’e iporãve ita vera hepyetévagui.

11Iména py’apy ojerovia hese, ha’e oguerekopava’erã oikotevẽva guive.

12Iporãvante ojapo hese ha mba’evete ivaíva ndojapói hese.

13Oheka ovecha rague ha ka’avo inimbo (líno) ha kyre’ỹpópe ha’e omba’apohína.

14Ojogua ku ñemuhára barcoguasúpe guáicha oguerúva pe tembi’ueta.

15Opu’ã ko’ẽ mboyve ombosako’i hag̃ua pe tembi’u hogayguakuérape g̃uarã ha ohechauka hembiguái kuñakuérape hembiaporã.

16Ohecha iporãpa pe yvy pehẽngue (lóte) ha ojogua, oñotỹuka iparralty ipo rembiapo repy rupi.

17Ojeku’akua mbarete, ha’e omomýi ijyvakuéra omba’apo puku hag̃ua.

18Ha’e oñandu hembiapo oguerutaha jehovasa; hataindy ndoguéi pyharekue.

19Omoĩ ipo pe he’ỹ (hílo pokaha rehe), ha ipokuéra pe mandyju povãha rehe.

20Oipyso ipo imboriahu ha ojejopy vaietereívape.

21Hogaygua ndoguerokyhyjéi ro’ýgui, opaite hogayguakuéra oñemonde porã ao aku ovecha ragueguiguávape.

22Ojapo ijupe g̃uarã ijahoja, ijaokuéra ka’avoguigua, inimbo hepýva ha pytãguiguáva.

23Iménape ojekuaa porã pe táva okẽ rupi (oñembojovakehápe), oguapývo tetãygua karai ancianokuéra ndive.

24Ojapo aorã, ha oñemu hese, ha ovende ku’akuaha po’i ñemuharakuérape.

25Mbarete ha terakuã porãhína ijaokuéra; ha ha’e opukavymi umi ára ouva’erãva rehe.

26Arandupópe ojejurupe’a, ha ipy’a porã reheve ijuru ohekombo’e.

27Ohecha oho porãmba hóga ryepýpe, ha ndo’u reíri hembi’u.

28Imembykuéra ovy’aite hendive ha iména avei omomba’eguasu ichupe.

29Heta kuña oĩ ojapova’ekue mba’eporã, nde katu rehasapaite opavavépe.

30Kuña juky ñanembotavykuaa, pe kuña rete porãngue ohasava’erã, pe tembireko ohayhu ha ojeroviáva Ñanderuete rehe péva ningo pe tembireko oñemomba’eva’erãva.

31Peropurahéi ichupe hembiapo porã ha toñemomba’eguasu hembiapo porãngue umi táva plazaha rehe.