Salmokuéra 108 - Biblia en Guaraní - ?anderuete ?e’? Por? 2015

David ojerure ñepytyvõre

1Chepy’aguapýma, Nde, che Ruete ndive, upévagui apurahéita ha ambopúta che árpa ndéve g̃uarã.

2Pepáykena, mbaraka ha árpa púpe, che amombayséma pe ko’ẽtĩ.

3Romomba’eguasúta, Nde, ore Ruete, umi tetã apyte rupi, ndéve g̃uarã apurahéita tetãnguéra apytépe.

4Ne mborayhu tuichave umi yvágagui, ha ne ñe’ẽ añetegua iñasãi araikuéra peve.

5Eñembotuichaiteve umi yvágagui, ore Ruete, ha opaite yvy apére toñemosarambi nde reko jajaipáva.

6Eguenohẽmi jejopy vaígui umi nderayhúvape, orepytyvõmína nde pu’aka rupi ha orerendumíkena.

7Ñanderuete oñe’ẽ hekoha guive he’ívo: Che avy’aite amboja’o ha ame’ẽmba haguére pe táva Siquem, ha aha’ãta umi yvyarigua Sucótpe oĩva guive.

8Galaad ha Manases yvy, che mba’e voi, Efrain che akã mo’ãha ha Juda che retã sãmbyhyhára yvyra po’i.

9Moab pe ña’ẽ añemopotĩ hag̃ua, Edom ári aitýta che sapatu, ha Filisteaygua retã rehe añembopy’a rorýta.

10Mávapa chereraháta pe táva oñemongoráva tápia yvate reheve. Mávapa chemog̃uahẽta Edom retã meve.

11Nandéi piko, ore Ruete, oremboykemava’ekue, ha Nde, ore Ruete, neresẽvéimava’ekue reiko hag̃ua ore soldádo aty ndive.

12Orepytyvõmíkena umi orerehe opu’ãvare, mba’e rei ningo yvyarigua ñepytyvõ.

13Ore Ruete rupínte rojapokuaa mba’eguasu, ha Ha’e voi ningo opyrũmbáta umi orerehe ija’e’ỹva rehe.