1Pe terakuã porã ovaleve mba’e hyakuã porãgui. Ha pe ñemano ára iporãve pe nacimiénto áragui.
2Iporãiteve ojeho pe omanova’ekue rógape, ha ani pe okaruguasúva rógape. Pe omanova’ekue rógape ñande ñapensava’erã avei ñande ára paha rehe, og̃uahẽtaha avei katuete opavavépe.
3Ñembyasy iporãiteve pukágui; pe tova oñembyasýva omyatyrõ porã ipy’apy.
4Umi iñarandúva py’apy ningo oĩ umi omanova’ekue rógape; ha umi ivýrova py’apy katu oĩ pe vy’aguasu rógape.
5Iporãiteve ñahendu pe iñarandúva jeja’o, umi ivýrova purahéi rãngue.
6Pe ivýrova puka ha’ete ku ñuatĩ opiriríva japepo (ólla) guýpe. Ha ko’ã mba’e reiete avei.
7Pe tembiapo repy hekope’ỹva ombotarova iñarandúvape, ha pe jopói ombyai heko porãvape.
8Iporãiteve pe mba’e paha pe mba’e ñepyrũmbýgui; iporãiteve pe ánga oha’ãrõkuaáva peteĩ ánga oñembotuichávagui.
9Aníke nde ndepochy pya’eiterei; pe pochy ningo oiko umi ivýrova angapýpe.
10Araka’eve ani ere: Mba’éicha rupípa umi ára ymaguare iporãve ko’ag̃aguágui. Koichagua ñe’ẽ naheñóiri peteĩ iñarandúva py’apýgui.
11Arandu iporãiteve heta mba’erepýgui, ha akãguapy iporãiteve peteĩ mba’e hepyetereívagui, ojehupitykuaáva ko yvy apére.
12Pe arandu nepytyvõvéta pirapirégui, omoingovégui ijárape.
13Ema’ẽna Ñanderuete rembiapokue rehe; ha mávapa ikatu omokarẽ’o pe Ha’e omokarẽva’ekue.
14Pe ára iporãvape evy’aite mba’eporã reheve; ha ára ivaívape ejepy’amongeta porã nde rekove rehe, mokõivéva ou Ñanderuetégui, ani hag̃ua yvyariguakuéra oikuaa umi mba’e oĩva henonderãme.
15Opaite ko’ã mba’e ahecha ko che rekove pukukue rupi. Ahecha heko porãva omano heko iporã haguére ha heta iñañáva oikove pukuete.
16Ani nde reko porãitereirasa ha ani nearanduseitereirasa; mba’upépa nde voi rembyaise nde rekove.
17Ani rejapótei mba’evai, ha anítei nde výro rei avei, mba’érehepa remanose nde ára og̃uahẽ mboyve.
18Iporãve nde rejapyhy kóva ha ani repoi ambuégui, upe okyhyjéva Ñanderuetégui osẽ porãva’erã opaite mba’épe.
19Pe arandu omombareteve pe iñarandúvape, 10 mburuvicha oñembyatývagui peteĩ tavapýpe (isoldádo atykuéra reheve).
20Añetehápe ko yvy apére ndaipóri ojapóva tapiaite mba’eporã ni ojapóva tapiaite mba’evai.
21Ha aníke rejapysaka opaichagua mba’e oje’éva rehe, ani hag̃ua rehendu ne rembiguái nemaldeci ramo.
22Eikuaa porãke nde voi remaldeci hague avei, nde py’apýpe, heta jevy nde rapichápe.
23Opaite ko’ã mba’e ko’ãva rupi añeha’ãmbaite ahupity hag̃ua pe arandu, añemoaranduve hag̃ua, ha pe arandu katu oñemomombyryve chehegui.
24Imombyryete ningo ñandehegui opaite mba’e ha hypyetereígui opaite mba’e rapo, máva piko ikatúta oguenohẽ ha omyesakã.
25Opaite ára añeha’ã ramo ahupity ha aitypeka hag̃ua arandu ha akãguapy, añeñandu porã Ñanderuete’ỹrehe opaite mba’e ivýro, ha péicha oikoséva Ñanderuete’ỹre oñembotarova voi.
26Upépe ae che ajohu peteĩ mba’e irovéva ñemanógui ha péva ha’e: Peteĩ kuña oitýva ired ojapyhy hag̃ua peteĩ kuimba’épe ha ipy’apýpe ombosako’i iñuhã ojoko hag̃ua ichupe. Upe ohayhúva Ñanderuetépe ojei ichugui ha upe ohayhu’ỹva Ñanderuetépe ho’áta pe kuña ñuhãme.
27Peikuaa porãke, he’i pe ñemoñe’ẽhára Salomon: Añeha’ãmba aikuaa hag̃ua mba’épa he’ise ko’ã mba’e ambyatýva ahechakuaa porã hag̃ua ha cheakãguapy hag̃ua.
28Umi tapicha che ánga ohekáva ndajohúi gueteri, 1000 yvyarigua apytépe ajohu peteĩ kuimba’énte iñakãguapýva, 1000 kuña apytépe katu ndajohúi ni peteĩnte jepe.
29Péina ápe, kóva añoite ajohu: Ñanderuete ojapo pe tapicha heko peguáva, ha yvyariguakuéra katu oheka ñaña reko.
Who We AreWhat We EelieveWhat We Do
2025 by iamachristian.org,Inc All rights reserved.
