Salmokuéra 43 - Biblia en Guaraní - ?anderuete ?e’? Por? 2015

Ñembo’e ojeruréva ñemyengovia ha ñepytyvõ

1Chembojovakemína Nde, che Ruete, ha eñorãirõ cherehehápe, chepytyvõmína che rapicha hekope’ỹ oikóvagui, kuimba’e ijapúvagui ha tekove ñañágui.

2Che Ruete chemombareteva’ekue, mba’érehe piko ko’ág̃a chemboykéra’e. Mba’érehe piko che aiko’aína ñembyasypópe chejopy asýgui umi cherehe ija’e’ỹva.

3Emboumína nde resape ha ne añetegua, ko’ãva chesãmbyhýta ha chereraháta nde cérro porãitépe, nde rogaguasu oĩháme.

4Upéramo aháta Ñanderuete kuave’ẽmby rendápe, Ñanderuete chembohory ha chembovy’a jevy hag̃ua, ha romomba’eguasúta árpa púpe, Nde ningo, che Ruete ha che Jaratee.

5Mba’érehe piko nekangy, nde che ánga, ha mba’érehe piko rekyhyjereína chepype. Ejerovia Ñanderuete rehe ha emomba’eguasu jevy ichupe, che pytyvõhára ha che Jarateetéva.