1Ojehu ko’ã mba’e rire, David ombopoguy Filisteayguakuérape, ha omotĩ ichupekuéra, ha oipe’a ichuguikuéra Gat ha umi tava’i oĩva ijerekuévo.
2David ipu’aka avei Moab rehe, ha Moabguakuéra oiko David rembiguái ramo, ha ogueru ichupe g̃uarã impuésto.
3Upéicha David ipu’aka avei Hadad-ezer, Soba retã ruvicha rehe oikóva Hamat gotýo, oho jave oñemomba’e hag̃ua pe yvýre oĩva Éufrates rembe’ýpe.
4Ha David oipe’a ichugui 1.000 cárro, 7.000 kavaju arigua, 20.000 kuimba’e yvy rupigua; ha oikytĩuka umi kavaju retyma rajygue mayma kavaju cárro reheguáva, noikytĩukái katu umi kavaju oikotevẽva 100 cárrope g̃uarã, umíante oheja imba’erã ramo.
5Ha Siriayguakuéra oúvo Damáscogui oipytyvõ hag̃ua Hadad-ézer, Soba ruvichápe, David ohundi avei ichugui 22.000 kuimba’e.
6Ha David oheja peteĩ isoldádo aty oñangareko hag̃ua Damásco, Síria távaguasu rehe, ha Siriaygua oiko David rembiguáirõ, ha ogueruva’erã ichupe impuésto; Ñanderuete ome’ẽgui Davídpe ipu’aka mamo ohoha rupi.
7David ojapyhy avei tetemo’ãha oroguiguáva oipe’ava’ekue Hadad-ézer rembiguaikuéragui, ha oguerupa Jerusalénpe.
8Upéicha David ombopoguy avei Tibhat ha Cun, ambue Hadad-ézer tavakuérape ha upégui David oguenohẽ hetaiterei brónce, ha pévagui Salomón ojapo pe yryruguasuete, umi horconguasu ha ambue tembiporukuéra bronceguiguáva.
9Ha Hamat retã ruvicha ohendúvo David omosarambipa hague Hadad-ézer, Soba retã ruvicha soldádo aty,
10ombou David rendápe ita’ýra Adorámpe, omomaitei ha ohovasa hag̃ua ichupe ondyry ha ipu’aka haguére Hadad-ézer rehe. Ha oguerahauka avei ichupe opaichagua tembiporu oroguiguáva, plataguiguáva ha bronceguiguáva.
11Opaite ko’ã mba’e tetã ruvicha David ome’ẽ Ñanderuetépe g̃uarã, upéicha ome’ẽ avei pe pláta ha óro oipe’ava’ekue, Edom, Moab ha Amon ñemoñarenguéragui, Filisteayguakuéra ha Amalecguakuéragui.
12Abisai, Sarvia memby, sarambi ojapo 18.000 Edomgua apytépe, pe jukyty cerrokuéra pa’ũme.
13Ha omoĩ avei peteĩ isoldádo aty oñangareko hag̃ua Edom retã rehe, ha mayma Edomguakuéra opyta David rembiguái ramo, Ñanderuete ome’ẽgui pu’aka Davídpe mamo ohoha rupi.
David soldádo ruvichakuéra14David oisãmbyhy opaite Israel retãpy tuichakuépe ha ombojovake hetãyguakuérape mbojovakeharaguasu ramo.
15Ha Joab, Sarvia memby, opyta isoldádo aty ruvichaguasu ramo ha Josafat, Ahilud ra’y, omoakã pe tetã ñemuhanguéra.
16Sadoc, Ahitub ra’y, ha Abimelec, Abiatar ra’y, oiko pa’ikuéra ramo, ha Savsa opyta kuatia haihára (secretário) ramo.
17Ha Banaía, Joiada ra’y, opyta Cretaygua ha Peletguakuéra ruvicha ramo; ha David ra’ykuéra oipytyvõ itúvape oisãmbyhy hag̃ua Israel retãme.
Who We AreWhat We EelieveWhat We Do
2025 by iamachristian.org,Inc All rights reserved.
