Génesis 39 - Biblia en Guaraní - ?anderuete ?e’? Por? 2015

Jose ha Potifar rembireko

1Ha ojereraha rire Josépe Egíptope; Potifar, faraon tahachi ruvicha ojogua ichupe umi Ismaelguágui.

2Ñanderuete omoirũgui Josépe hembiapo ojapóva guive osẽ porãmba ha oiko ijára Egiptoygua rógape.

3Ha ijára ohechávo Ñanderuete oĩha hendive, omoĩve ipoguýpe ha Ñanderuete ohovasapa hembiapo ojapóva guivépe.

4Upéicha Jose ojohu py’aporã ijára resa renondépe, ha oiko hembiguaiguasuete ramo ha opyta hóga ñangarekohára ramo, ha opaite mba’e Potifar oguerekóva guive, omoĩmba Jose poguýpe.

5Ha ojehu ha’e omoĩha ára guive, hóga ha opaite mba’e oguerekóva guive ipoguýpe, Ñanderuete ohovasave ohóvo Potifar róga ha ikokue, Jose rehehápe.

6Upéicha Potifar ohejapa oguerekóva guive Jose poguýpe, ha ndojepy’apyvéi mba’eve rehe hembiapotee rehémante. Jose peteĩ karia’y hova ha hete iporãitéva.

7Ha ojehu rire ko’ã mba’e, ijára rembireko oma’ẽ Jose rehe, ha he’i: Ekéna chendive.

8Ha’e katu ndojaposéi, ha he’i ijára rembirekópe: Eikuaa porãke, che jára ndojepy’apyvéima mba’eve rehe hogapýpe oĩva rehe, ha omoĩmba che pópe opaite mba’e.

9Ndaipóri tuichavéva chehegui ko ógape, ha mba’eve nomboykéi chehegui, ndéve añoite, nde ha’égui hembireko; mba’éicha piko che ajapóta ko mba’evai tuichaitéva, ha añemboheko vaíta Ñanderuete renondépe.

10Pe kuña ko’ẽ ko’ẽ rehe katu oñeha’ãmba iñe’ẽita rupi oiko hag̃ua Jose ndive, Jose katu nopenái hese.

11Ha ojehu peteĩ árape, Jose oikévo ijára rógape ojapo hag̃ua hembiapo, ndaipóri avave upépe.

12Upémaramo pe kuña ojapyhy Josépe ijaógui, ha he’i ichupe: Eikóna chendive. Ha’e katu oheja ijao ipópe, ha osẽ okañývo hendágui.

13Ha pe kuña ohechávo Jose oheja hague ipópe ijao, ha okañy hague okápe,

14ohenói hembiguaikuérape, ha he’i ichupekuéra: Pema’ẽ porãke che ména ogueru ñandéve peteĩ hebreoygua oñembohory hag̃ua ñanderehe; okesemo’ã chendive ha che añemoĩ hese asapukái hatãvo,

15ha ha’e ohechávo che hatã asapukaiha, oheja ijao che ykére ha kañyháme ohóvo.

16Pe kuñakarai omoĩ ijypýpe Jose ao, iména ou jevy peve.

17Ha he’i avei ichupe ko’ã ñe’ẽ: Pe tembiguái hebreoygua regueruva’ekue, ou che rendápe chemongy’a hag̃ua.

18Ha asapukái hatãma ramo, ha’e oheja ijao che ykére ha okañy okápe.

19Ha Jose jára ohendu rire hembireko ñe’ẽ ipochyeterei Jose ndive.

20Ha omoinge ichupe cárcelpe, oĩháme tetã ruvichaguasu presokuéra, ha Jose opyta hendivekuéra.

21Ñanderuete katu oĩ Jose ndive, ohupityuka ichupe iporiahuvereko, ha pe cárcel ruvicha oñepyrũ ohayhu avei ichupe.

22Ha omoĩmba avei Jose poguýpe opaite presokuéra oĩva guive pe cárcelpe, ha Jose omoakã opaite mba’e ojejapóva guive upépe.

23Upe cárcel ruvicha noikotevẽvéima oñangareko mba’eve rehe, Jose ojapo porãmbágui hembiapo Ñanderuete oĩgui hendive, ha ojapóva guive osẽ porã Ñanderuete ohovaságui ichupe.