1Mayma yvy ape arigua peguerosapukái torypápe Ñanderuetépe.
2Pegueropurahéi pemomba’eguasúvo héra porãite ha pemboeteve pehóvo ichupe.
3Peje Ñanderuetépe: Iporãite ningo ne rembiapokuéra, nderayhu’ỹva jepe ojeitýta ne renondépe ha nemomba’eguasuva’erã.
4Mayma yvy ape arigua ho’ava’erã ne renondépe nemomba’eguasu hag̃ua, ha opuraheiva’erã ndéve, nde réra ogueropuraheiva’erã hikuái. Selah
5Peju ha pehecha Ñanderuete rembiapokue, Ha’e ningo oisãmbyhy porã yvyariguakuérape.
6Ombohypa pe yguasu ojehasa hag̃ua ikãha, pe y oĩ haguépe, upévare javy’aite hendive.
7Ha’e ningo oisãmbyhyhína ipu’aka rupi opaite árape g̃uarã, hesakuéra oma’ẽ mombyry guive tetãnguéra rehe, umi oñemoĩséva hese ndikatuvéima opu’ã. Selah
8Tetãnguéra pemomba’eguasu ore Járape, ha pemombe’úke herakuã porã opa rupiete.
9Ha’erupínte ñane ánga oikove ha ndohejaiva’ekue ñandepysyrỹi.
10Nde, ore Ruete, orera’ã ku óro morotĩ oñemopotĩ háicha oñemboykúvo.
11Nde oremoinge ñuhãme ha remoĩ ore apére mba’e pohyiete.
12Ore akã ári rembohasa kuimba’ekuéra, rohasa avei tata ha y rupi, ha upéi Nde oreguenohẽ ko’ã jejopy vaígui.
13Aikéta nde rogaguasúpe aikuave’ẽ hag̃ua, ajapo hag̃ua che ñe’ẽme’ẽ (promésa),
14che rembe he’imava’ekue ha che juru oñe’ẽva’ekue aime ramoguare jepy’apy vaietépe.
15Ore rymba oñemongyrava’ekue aikuave’ẽta ndéve, ambojupíta ndéve g̃uarã ovecha mácho ratatĩngue, ha ndéve g̃uarã ambosako’íta tóro ha kavara mácho kuave’ẽmby ramo. Selah
16Peju, pehendu joaite, peẽ pekyhyjéva Ñanderuetégui, ha amombe’úta Ha’e ojapova’ekue che ángape g̃uarã.
17Che jurúpe amboete ichupe, ha che kũ rupi amomba’eguasu ichupe.
18Che py’apýpe ajapose rire ivaíva, Nde nacherenduveimava’erãmo’ã.
19Ñanderuete katu añetehápe cherendúma, ojapysaka porã che mba’ejerure asy rehe.
20Toñemomba’eguasu Ñanderuetépe, nomboykéi haguére ijehegui che ñembo’e, ha ohechauka chéve iporiahuvereko.
Who We AreWhat We EelieveWhat We Do
2025 by iamachristian.org,Inc All rights reserved.
