Jeremías 52 - Biblia en Guaraní - ?anderuete ?e’? Por? 2015

Sedequías oiko tetã ruvicha ramo

1Sedequías oguereko ramoguare 21 áño oñepyrũ oisãmbyhy ha oiko tetã ruvicha ramo 11 áño, Jerusalénpe. Isy réra Hamutal, Jeremías, Libnaygua rajy.

2Ha ojapo ivaíva Ñanderuete resa renondépe, Joacim ojapo hagueichaite.

3Upévagui Ñanderuete ipochy Jerusalen ha Judayguakuéra ndive ha omosẽ ichupekuéra ijypýgui. Ha Sedequías oñemoĩ pe Babilónia retã ruvicha rehe.

Jerusalen ho’a

4Ha ojehu, Sedequías oisãmbyhývo 9 áño, pe jasy 10-hápe ha pe ára 10-hápe, ou Nabucodonosor, Babilónia retã ruvicha, isoldádo aty ndetuicháva reheve Jerusalen rokẽ renondépe omongora hag̃ua pe tavaguasu, ha omopu’ã ijerekuévo yvy atýra ojapyhara porãve hag̃ua Jerusalen tápia ári.

5Upéicha omongora hikuái Jerusalen, pe tetã ruvicha Sedequías oisãmbyhy ramo 11 añohápe.

6Ha pe áño pévape, pe jasy jere irundyhápe ha pe ára 9-hápe iñembyahyieterei hikuái ha umi kokue jára jepe nahembi’uvéima.

7Upémaramo ombokua pe táva korapy jere, ha Judaygua soldádo osẽ ha okañymba hikuái itávagui, pyharekuépe osẽ hikuái pe okẽ oĩva umi mokõi táva korapy pa’ũ rupi ha hi’ag̃ui tetã ruvichaguasu kógagui ha oipykúi hikuái pe tape ohóva Jordan ñu gotýo.

8Caldeaygua soldadokuéra katu oho tetã ruvicha rapykuéri, ha ohupity Sedequíaspe Jerico ñúme; isoldadokuéra katu opoi ichugui ha oñemosarambi oparupiete.

9Upéramo oapresa hikuái tetã ruvicha Sedequíaspe ha ogueruka ichupe Babilónia retã ruvicha rendápe oĩva Riblápe, Hamat yvýpe, Nabucodonosor he’i hag̃ua ojejapova’erãva hese.

10Ha Babilónia retã ruvicha oñakã’ouka Sedequías ra’ykuérape ha Juda pegua mburuvichakuérape Sedequías resa renondépe.

11Upéi Nabucodonosor ohesa’ouka Sedequíaspe ha ojokua ichupe cadénape oguerahauka hag̃ua Babilóniape; ha omoinge ichupe cárcelpe omano meve.

Judayguakuéra ojegueraha jepokuapýpe

12Nabucodonosor oisãmbyhy aja 19 áño, pe jasy 5-hápe ha pe ára 10-hápe Nabuzaradan, isoldádo ruvicha, oike Jerusalénpe isoldádo atyguasu reheve.

13Ha ohapy Ñanderuete rogaguasu, tetã ruvicha róga ha opaite óga tuicháva oĩva guive Jerusalénpe; upéicha ohundi tatápe umi óga tuichávape.

14Ha umi Caldeaygua soldádo ouva’ekue guive pe mburuvicha Nabuzaradan ndive ombyaipaite Jerusalen korapy jere yvate.

15Ha Nabuzaradan oguerahauka Babilónia retãme umi mboriahúpe ha ambue tapichakuéra hembyva’ekuépe Jerusalénpe, ha umi okañymava’ekuépe oiko hag̃ua Babilónia retã ruvicha ndive, ha avei umi mba’apohára katupyrývape hembýva gueteri.

16Ha mbovymi tetãygua imboriahuetéva Nabuzaradan oheja Israel retãme oñangareko hag̃ua parralty ha kokuekuéra rehe.

17Ha umi Caldeaygua ojoka opaite mba’e ojejapova’ekue bróncegui, umi horcon oĩva Ñanderuete rogaguasúpe, ipyendakuéra, pe yendaguasu oĩva Ñanderuete rogaguasu renondépe ha pe brónce oguerahapa hikuái Babilónia retãme.

18Umi Caldeaygua ogueraha avei, umi japepo (ólla), pála, jetapa, yryru ohypýi hag̃ua, umi cuchára ha opaite tembiporu bronceguiguáva ojeporúva guive Ñanderuete rogaguasúpe.

19Ha umi mba’e ryakuã porã ñemyatatĩha, tazaguasukuéra, vasokuéra, japepokuéra, tataindyenda, ha tazakuéra; umi mba’e ojejapova’ekue óro ha óro morotĩgui Nabuzaradan oguerahapa avei.

20Umi horcon, pe yendaguasu, ha umi 12 guéi ra’ãnga bronceguiguáva oĩva ipyenda guýpe, tetã ruvicha Salomon ojapoukava’ekue Ñanderuete rogaguasúpe g̃uarã; pe brónce pohyikue (péso) ndaikatúi ojepapa hetaiterei oñembyatýgui.

21Ha umi horcon peteĩteĩva ijyvate 7,87 métro ha ijapu’akue oha’ã 5,25 métro ijerekuévo; ha iñanambusukue oha’ã irundy kuã ha hyepy inandi.

22Ha pe jeguaka bronceguiguáva oĩva umi horcon ru’ãme ijyvate 2,18 métro, ha ijerekuévo oĩ peteĩ red granada’a ra’ãnga jeguaka ramo, ko’ãva bróncegui meme, ha upeichaite ojejapo avei pe ambue horcon.

23Oĩkuri 96 granada ra’ãnga ojehecha porãmivéva; ha oñondivepa katu oĩ 100 granáda ra’ãnga pe red jerekuévo.

24Ha pe mburuvicha Nabuzaradan ojapyhy avei pe pa’i ruvicha Seraíaspe, ha Sofonías, pe pa’i mokõihápe, ha umi mbohapy okẽ ñangarekohárape.

25Ha’e ogueraha avei pe soldádo ruvichápe, ha 7 kuimba’épe oikova’ekue tetã ruvicha rekombo’ehára ramo ha opyta gueteri pe táva ryepýpe ha pe soldádo kuatiañe’ẽ haihárape, péva ohenoimava’ekue tetãyguakuérape héra rupi ñorãirõháme g̃uarã, ha ambue 60 tetãygua oĩva táva ryepýpe gueteri.

26Ha opaite ko’ãvape mburuvicha Nabuzaradan ogueraha Ríblape, Babilónia retã ruvicha oĩháme.

27Ha Babilónia retã ruvicha ojukaukapa ichupekuéra Ríblape, Hamat retãme:

28Nabucodonosor oguerahamava’ekue Juda retãgui 3.023 tetãygua jepokuapýpe, ha’e oisãmbyhy aja pe áño 7-hápe:

29Ha Nabucodonosor oisãmbyhývo 18 áño ogueraha Jerusaléngui 832 Judaygua jepokuapýpe.

30Nabucodonosor oisãmbyhývo 23 áñoma, Nabuzaradan, isoldádo ruvicha, ogueraha jepokuapýpe 745 Judaygua; oñondivepa ojegueraha 4.600 Judayguakuérape.

Joaquin ojepoi ijepokuapyhágui ha oñemopu’ã ichupe Babilóniape

31Ha ojehu Joaquin, Juda retã ruvichakue, ojereraha rire jepokuahápe pe áño 37-hápe, jasy 12-hápe ha pe ára 25-hápe, Evil-merodac Babilónia retã ruvicha, oñepyrũ oisãmbyhyramoite peteĩ áño, omyakãrapu’ã Joaquin, Juda retã ruvichakuépe ha oguenohẽ ichupe cárcelgui.

32Ha oñe’ẽ hendive torypópe ha omoĩuka ichupe g̃uarã peteĩ guapyha ijyvatevéva umi ambue tetã ruvichakuéra apytépe oĩva guive hendive Babilóniape.

33Ha ombopyahu ijaokuéra omboi rire umi ao jepokuaha pegua oiporuva’ekue, ha Joaquin okaru tetã ruvicha ndive oikove aja pukukue.

34Ha Babilónia ruvichaguasu ome’ẽuka Joaquínpe opaite árape, hembi’urã oikove aja pukukue.