1Nabucodonosor, Babilónia retã ruvicha, ogueraha riréma jepokuapýpe Jerusalenguakuérape Babilóniape, Jeconíaspe, Joacim ra’y, Juda retã ruvicha, ha hendive umi Judaygua mburuvicha ha umi kuimba’e ikatupyrýva ha hiérro rehe omba’apokuaávape, Ñanderuete ohechauka chéve hogaguasu renondépe mokõi ajaka henyhẽva higogui.
2Peteĩ ajaka oguereko higo tenondereguare iporãitereíva; ha ambue ajaka katu oguereko higo ivaietereíva ha umíva ndaikatúi oje’u.
3Ha he’i chéve Ñanderuete: Mba’épa nde rehecha, Jeremías. Ha che ha’e: Higo iporãva, iporãitereíva; ha ivaíva, ivaietereíva, ivaietereígui ndaikatúi oje’u.
4Ha Ñanderuete ñe’ẽ ou chéve, ha he’i:
5Péicha he’i pende Ruete, Israel Jára: Ko’ã higo iporãva ojogua umi Judaygua ojeguerahava’ekuépe, Che amosẽva’ekue ko tetãgui Caldeaygua retãme. Che ama’ẽ porãse hesekuéra, osẽ porã hag̃uáicha henonderãmenguéra.
6Añangareko porãta hesekuéra ha agueru jevýta ichupekuéra ko yvy kóvape, ha amopu’ã jevýta ichupekuéra, ha nahundimo’ãi ichupekuéra; ha amohenda porãta ha namosẽmo’ãvéima ichupekuéra.
7Ha ame’ẽta ichupekuéra peteĩ ñe’ã (pyahu) chekuaa hag̃ua, Chénte ha’égui Ituvatee; ha oikóta hikuái che retã ramo, ha Che aikóta Ijára ramo; ojevy jeýtagui hikuái ipy’aite guive che rendápe.
8Ha umi higo ivaietéva, ivaietereígui ndaikatúiva oje’u, umía ha’e Sedequías, Juda retã ruvicha, mburuvichakuéra ha umi Jerusalengua hembýva ko tetãme ha Egípto retãme oikóvape, he’i pende Ruete.
9Ha amoĩta ichupekuéra ñemondyiguasu ramo ha mba’evai ramo mayma tetã yvy apére oĩva guivépe ha opytáta ñembohoryha ramo, pukaha ramo ha maldicion ramo opa rupiete mamo Che amomboha ichupekuéra.
10Ha amboúta hi’arikuéra kyse puku, ñembyahýi ha mba’asy iñasãiva oñehundi peve hikuái ko yvýpe, Che ame’ẽmava’ekue ichupekuéra ha ituvakuérape g̃uarã.
Who We AreWhat We EelieveWhat We Do
2025 by iamachristian.org,Inc All rights reserved.
