1Jerusalen epu’ãkena ha emimbi; oúma nde resape ha Ñanderuete reko jajaipa hendy ndeári.
2Ema’ẽ porãke, pe ypytũ ningo ojaho’íta ko yvy tuichakue ha tetãnguéra ndohechamo’ãvéi mba’eve; ndeári katu (Jerusalen) Ñanderuete omoko’ẽta, ha heko jajaipa ojehechaukáta ndeári.
3Ha umi tetã og̃uahẽta nde resape oĩháme ha umi tetã ruvicha oñembyatýta ne ko’ẽtĩ jajáipe.
4Ejesaupi nde jerekue rehe ha ema’ẽ ko’ã oñembyatypa joáva rehe, ha ou joáva ne rendápe. Nde ra’ykuéra mombyry guive oupáta, ha nde rajykuéra ojeguerúta isy ku’áre.
5Upevove rehechapáta, ha remimbíta ha nde py’a otytýita revy’aitereígui, ne rendápe og̃uahẽta hetaiterei yguasu rupigua, ha tetãnguéra mba’erepyeta ojeguerúta ne rendápe.
6Heta camellokuéra oñu’ãta ne retãme, Madian ha Efaygua og̃uahẽta, Sabaygua oguerúta óro ha mba’e ryakuã porã ha ombotuicháta Ñanderuete rembiapo porã.
7Umi Cedar pegua ovecha aty oñembyatypáta ne rendápe; ovecha mácho Nebaiot peguare oñemoĩta nde poguýpe; vy’apópe oñekuave’ẽta umía che kuave’ẽmby rendápe, ha amoporãvéta che rogaguasu.
8Máva piko umi ovevéva ibarcoguasúpe ku araícha ha pykasúicha ohóva ikehápe.
9Añetehápe umi y rembe’y pegua retãnguéra chera’ãrõhína, ha umi barcoguasu Tarsis pegua raẽ ogueru jevýta mombyry guive nde ra’ykuérape, hi’óro ha ipláta reheve, nde Jára, Israel Járape g̃uarã, Ha’e omopu’ã jevy haguére hetãyguakuérape.
10Ha tetã ambueygua omopu’ã jevýta nde korapyjere yvate, ha hetã ruvichakuéra oikóta ne rembiguái ramo. Chepochy jave rohavirava’ekue, ha ág̃a che py’a porã jevýgui nendive roiporiahuvereko jevýta.
11Ne rokẽnguéra nandi opytapáta, noñembotymo’ãi ára ni pyhare, ambue tetã ruvichakuéra hembiguaieta ndive ogueru hag̃ua imba’erepyeta ndéve g̃uarã.
12Umi tetã térã tetãguasuete oñemoĩséva nderehe oñehundíta ha oñembotaperepáta.
13Umi Líbano yvyra porãitéva ojeguerúta ndéve, umi cipres, píno ha bojes, ombojeguaka hag̃ua che rogaguasu; ha che rogaguasúpe ha’ekuéra chemomba’eguasúta.
14Umi tetãygua ra’yre ndejopyva’ekue ha oñembohoryva’ekue nderehe ojeitýta tĩndyhápe nde py renondépe, ha nembohérata Ñanderuete táva, Jerusalen, Israel Jára mba’e ojeporavopyréva.
15Nde ndereikomo’ãvéi ojepoíva ni oñemotĩva ramo, upévare avave naneanduseveiva’ekue, ko’ág̃a katu romopu’ã jevýta ha ajapóta ndehegui mba’eguasu opaite árape g̃uarã ha ovy’aitéta oimeraẽ oúva guive neandúvo.
16Ha rekambúta tetãnguéra kamby rehe, ha rekambúta umi tetã ruvicha pyti’a rehe; ha reikuaáta Che ha’eha nde Ruete, Jacóbo Jára mbarete, ndejoguamava’ekue ndesalva hag̃ua.
17 Brónce rendaguépe oguerukáta óro, hiérro rendaguépe óro morotĩ; yvyra rendaguépe brónce; ita rendaguépe hiérro. Pe py’aguapy nesãmbyhýta ha pe justícia oikóta ne mburuvichaguasu ramo.
18Araka’eve noñehenduveimava’erã ne retã ryepýpe ñorãirõ ryapu, ñehundi ni jepy’apy asy, rembohérata uvei nde korapyjere yvate salvacion, ha ne rokẽnguéra herakuã porãta.
19Araka’evéma nereikotevẽmo’ãvéi kuarahy rehe omyesakã hag̃ua nde ára pukukue, ni jasy nanderesapemo’ãvéita, pende Ruete voi oikóta nde resapehára ramo opaite ára peve, ha nde Jára reko jajaipa oĩta nendive.
20Nde kuarahy ndoikemo’ãvéi araka’eve, ha ndoguemo’ãi avei nde jasy rendy; Ñanderuete voi oikóta nde resapehára ramo opaite ára peve, ha opáta umi ára reñemonde hag̃ua aovosakuépe.
21Ha opaite ne retãygua reko ipotĩta, ha opaite árape oikóta ijyvyteépe; Che voi añotỹ che kokuépe Israel yvýpe hoky porã hag̃ua ha che po rembiapo chemomba’eguasu hag̃ua.
22Pe imichĩvéva imbaretéta ambue 1000-gui, ha pe ikangyvévagui oikóta peteĩ tetã mbaretéva. Che, nde Ruete, hi’araitépe pya’e ajapopáta ko’ã mba’e.
Who We AreWhat We EelieveWhat We Do
2025 by iamachristian.org,Inc All rights reserved.
