1Ha Hesu oñepyrũ oñe’ẽ ichupekuéra ñe’ẽ mbojoja rupi: Peteĩ kuimba’e oñotỹ parralty, omongora pe parralty, ojo’o peteĩ parral’a rykue’o rendag̃ua oñami hag̃ua parral’akuéra, omopu’ã óga yvate, oiporuka pe parralty mba’apoharakuérape, ha oho mombyry, ambue tetãme.
2Ha omono’õ hag̃ua árape, ombou hembiguáipe umi mba’apohára rendápe ogueraha hag̃ua pe parral’a rykue repy.
3Ha’ekuéra katu ojapyhy ichupe, oinupã vai ha omondo po nandi.
4Upérõ pe parralty jára ombou jevy ambue tembiguáipe ha oñakãjoka hikuái ha oja’o heta ichupe.
5Ha ombou jevy ambuépe, kóvape katu ojuka hikuái; uperire hetavépe ombou, umívape oikutuva’ekue ha ambuekuérape ojukava’ekue.
6Pe parralty jára ipahaitépe katu oguereko gueteri peteĩ ta’ýra ohayhuetéva, kóvape ombou ipahápe ichupekuéra he’ívo: Omomba’éta hikuái che ra’ýpe.
7Umi mba’apohára katu he’i ojupe: Kóva ningo pe yvy jararã, néina jaha jajuka, ha pe yvy topyta ñane mba’erã.
8Ha ojapyhy hikuái ha ojuka ichupe, upéi omombo hetekue pe parraltýgui okápe.
9Mba’épa ojapóne pe parralty jára. Oúta ohundi hag̃ua umi mba’apohárape, ha ome’ẽta pe parralty ambuekuérape oñangareko hag̃ua.
10Ne’ĩra piko pemoñe’ẽ Ñanderuete kuatiañe’ẽme kóva: Pe itaguasu (Hesu Crísto) umi óga apohára omombova’ekue, upéva ári oñemopu’ã ko’ág̃a pe óga (Hesu Crísto iglésia).
11Kóva ou Ñanderuetéguio, ha ñande resápe g̃uarã opyta Ñanderuete milágro, (Salmokuéra 118,22).
12Ha oñeha’ã hikuái oapresa hag̃ua ichupe, okyhyje katu hetãygua atýgui, ohechakuaa haguére hesekuéra Hesu he’i hague ko ñe’ẽ mbojoja, upévare oheja ichupe, ha oho hikuái.
Hesu ombohovái umi hese oñemoĩvape13Upévare ombou hikuái fariseokuéra ha Heródes rembiguaikuérape oñeha’ã hag̃ua omoñuhã Hesúpe iñe’ẽ rupi.
14Ko’ãva og̃uahẽ Hesu rendápe ha he’i ichupe: Mbo’ehára, roikuaa ningo, ne ñe’ẽ hi’añeteha ha neremomba’eveiha avavépe, ha nerema’ẽi kuimba’ekuéra rembiechauka rehe, hekoitépe reporombo’e Ñanderuete rapére. Ikatúpa oñeme’ẽ (ojepaga) impuésto tetã ruvicha Césarpe térãpa nahániri.
15Hesu ohechakuaávo ha’ekuéra hova mokõiha, he’i ichupekuéra: Mba’érehepa chera’ã. Peru chéve pirapire (monéda) ahecha hag̃ua.
16Ha’ekuéra ogueru rire, Ha’e oporandu ichupekuéra: Máva ra’ãnga piko kóva ha mba’éichapa héra. He’i ichupe hikuái: César ra’ãnga.
17Upérõ Hesu he’i ichupekuéra: Peme’ẽ Césarpe, César mba’éva, ha Ñanderuetépe, Ñanderuete mba’éva. Ha heta opyta ohecharamo joa ko’ã mba’e.
18Ha saduceokuéra, he’íva ndaiporiha jeikove jevy, oñemboja hendápe ha oporandu ichupe, ha he’i:
19Mbo’ehára, Moises ningo oheja ko tembiapoukapy: Peteĩ kuimba’e omano ramo ita’yra’ỹre, ityvýra omendava’erã hembirekokue rehe, ha’e omoñemoña hag̃ua ityke’ýrape g̃uarã.
20Oiko ningo 7 kuimba’e ojoryvýva, pe tenondere omenda ha omano ita’yra’ỹrehe.
21Pe mokõiha omenda pe kuña rehe, ha omano avei ita’yra’ỹre ha upéicha avei pe mbohapyha.
22Opavave umi 7 omenda hese ita’yra’ỹre. Ipahápe omanomba rire umi kuimba’e, omano avei pe kuña.
23Pe jeikove jevýpe, ha’ekuéra oikove jevy ramo, máva mba’étapa pe kuña péva, umi 7 voi ningo omendava’ekue hese.
24Ha Hesu he’i ichupekuéra: Pejavypa ningo ndapeikuaáigui Ñanderuete kuatiañe’ẽ ni ipu’aka.
25Umi omanomava’ekue oikove jevyha árape, noñemendamo’ãi, oikóta uvei angelkuéraicha Ñanderuete rekohápe (yvágape).
26Umi omanomava’ekue oikove jevyva’erã, napemoñe’ẽi piko Moises kuatiañe’ẽme, Ñanderuete oñe’ẽ ramoguare ichupe pe jukeri mbytégui he’ívo: Che ningo Abraham Jára, Isaac Jára, ha Jacóbo Jára.
27Ñanderuete ningo ndaha’éi omanómava Jára, oikovéva Járante, peẽ ningo tuichaite pejavy.
Ñanderuete rembiapoukapy ituichavéva28Ha oñemboja peteĩ kuatia haihára ohendúva iñe’ẽ joapikuéra, ha ohechávo Hesu ombohovái porã hague ichupekuéra, oporandu Hesúpe: Mba’éichagua mandamiénto (tembiapoukapy) piko pe ituichavéva.
29Hesu he’i ichupe: Pe ituichavéva ningo: Ehendu Israel, Ñanderuete ningo peteĩ Jára añónte.
30Ehayhu Ñanderuete, nde Járape, opaite nde py’aite guive, opaite ne ánga reheve, opaite ne pensamiénto reheve, ha opaite ne mbaretekue reheve, (Deuteronómio 6,4-5).
31Ha pe mokõiha ningo kóva: Ehayhu nde rapichápe nde rejehayhu háicha. Ndaipóri ambue tembiapoukapy ituichavéva ko’ã mokõigui.
32Upérõ pe kuatia haihára he’i Hesúpe: Iporã, mbo’ehára, añetéko ere, peteĩnteha Ñanderuete, ha ndaipóri ambue, Ha’émante,
33ha jahayhu Ñanderuetépe ñande py’aite guive, opaite ñane apytu’ũkua guive, opaite ñande pu’aka reheve, ha jahayhu avei ñande rapichápe ñande jajehayhu háicha, kóva ningo mba’e guasuve opaite kuave’ẽmby ojehapývagui ha opaichagua ambue kuave’ẽmbýgui.
34Hesu oma’ẽvo hese oñe’ẽ porã haguére he’i ichupe: Nereiméi mombyry Ñanderuete retãguasu rekógui. Ha avave noporandusevéi ichupe mba’eve.
35Ha Hesu oporombo’évo Ñanderuete rogaguasúpe, Ha’e voi oporandu: Mba’éicha piko pe kuatia haihára he’i pe Crísto David ra’yha.
36David voi ningo oñe’ẽ pytu porã rupi: Ñanderuete he’i che Járape: Eguapy che akatúa gotýo, amoĩ peve nderehe ija’e’ỹvakuéra nde py guýpe, (Salmokuéra 110,1).
37David voi ningo ohenói ichupe che Jára, mba’éicha piko upéicharõ ha’e ita’ýrata. Ha hetãyguakuéra ohendu ichupe vy’apópe.
38Ha oporombo’évo he’i: Peñeñangarekóke umi kuatia haiháragui oikoséva ao puku reheve, ha oipotáva hetãyguakuéra omomaitei ichupekuéra okára (pláza) rupi,
39ha oguapysénte Ñanderuete róga guapyha tenondeveguápe iporãveha karuguasuhápe.
40Ha’ekuéra oipe’a umi imenave’ỹva rogakuéra, ha oñembo’e puku gua’u. Ko’ãva ohupityva’erã ijehavira ipohyivéva mbojovakeha árape.
Pe imenave’ỹva me’ẽmby tuichaitéva41Ha Hesu oguapy Ñanderuete rogaguasu me’ẽmby ryru rovái ha oma’ẽ mba’éichapa Israelguakuéra omoĩ ipirapire iglésia cájape. Ha umi oguerekóva heta pirapire, omoĩ heta.
42Ou peteĩ imenave’ỹva, imboriahúva omoĩmba pe oguerekomíva, mokõi monédami.
43Ha Hesu ohenói hemimbo’ekuérape ha he’i: Añete ha’e peẽme ko imenave’ỹ imboriahúva omoĩve opavavégui pe me’ẽmby ryrúpe (iglésia cájape).
44Ha’ekuéra ningo omoĩ pe hembývagui ichupekuéra; pe imenave’ỹva katu ome’ẽmba oguerekomíva, hembi’umi repy rãngue jepeve.
Who We AreWhat We EelieveWhat We Do
2025 by iamachristian.org,Inc All rights reserved.
