1Pemog̃uahẽ porãke iglésia apytépe pene hermáno ha pene hermána ikangýva gueteri ijeroviápe, ani hag̃ua peñoñe’ẽ’api umi mba’e peikuaa porã’ỹva rehe.
2Oime ogueroviáva ikatuha ho’u opaite mba’e, ambue katu ikangýgui ijeroviápe ho’únte yva ha ka’avo (verdúra).
3Upéicharamo umi ho’úva opaichagua mba’e ani oñe’ẽ rei (oñe’ẽ vai) umi ndo’úiva rehe ha umi ndo’úiva opaite mba’e ani okaguái umi ho’úva opaite mba’e rehe, Ñanderuete voi omog̃uahẽmagui avei ichupe ijiglesiayguakuéra apytépe.
4Ha nde rembojovakéva ambue tembiguáipe, máva piko nde. Pe tembiguái péva oñembo’y térã ho’a Ijárape g̃uarã. Ha’e opytáta ñembo’yhápe Hesu Crísto, Ijára imbaretéva, ojokógui ichupe.
5Oime ningo umi omomba’evéva peteĩ ára ambuégui, ha oime ningo ambuekuéra he’íva opaite ára peteĩchaiteha. Oimeraẽva toĩ hatã porã ipy’apýpe oñandu háicha.
6Upe omomba’evéva peteĩ ára ambuégui ojapo péva Ñanderuetépe g̃uarã. Ha pe ho’úva opaite mba’e ojapo avei péva Ñanderuetépe g̃uarã, oagradecégui Ñanderuetépe; ha upe ho’u’ỹva opaite mba’e ojapo avei péva Ñanderuetépe g̃uarã, oagradecégui avei Ñanderuetépe.
7Avave ñande apytégui ndoikovéi ojupe g̃uarã, ha avave ñande apytégui nomanói ojupe g̃uarã.
8Jaikovérõ, jaikove Ñanderuetépe g̃uarã; ha ñamanórõ, ñamano avei Ñanderuetépe g̃uarã. Upéicha ningo jaikovérõ térã ñamanórõ, ñande ningo Ñanderuete mba’e voi.
9Upevarã voi ningo Hesu Crísto omano ha oikove jevy, oiko hag̃ua oikovéva ha omanómava Jára ramo.
10Ha nde piko, mba’érehe rembojovake ne hermánope. Térã mba’érehepa remboyke ne hermánope. Opavave ñande ningo ñañembo’yva’erã Ñanderuete mbojovake guapyhaguasu renondépe.
11Ojehai voi Ñanderuete kuatiañe’ẽme: Opavave oñesũta che renondépe ha chemomba’eguasúta, he’i Ñanderuete, (Isaías 45,23).
12Upévare peteĩteĩ ñande ñañemombe’uva’erã Ñanderuete renondépe, (opaite mba’e jajapova’ekue ñande rekove pukukue).
13Upévarehe anivétei ñañombojovakeñaína, ñañeha’ãmba katu ani hag̃ua ñamoñepysãnga ñane hermánope térã jaity ichupe angaipápe.
14Che aikuaa ha arovia hi’añeteha Hesu Crísto rupi, ndaiporiha mba’eve iky’áva ijeheguínte, oime ramo oimo’ãva ivaiha, upévape g̃uarã katu ivai avei.
15Ne hermáno remomba’embyasy ramo pe tembi’u nde re’úva rehe, upéicharamo ndereikovéima mborayhu poguýpe. Anítei ne rembi’u rehehápe nde rehundi ne hermánope, Hesu Crísto omanógui avei hese.
16Ani peheja oñeñe’ẽvai pene mba’e porãvare peẽ peguerekóva.
17Nde Ruete retãguasu reko ndaha’éi jakaru térã jay’u hag̃ua; justícia, py’aguapy ha vy’a Pytu Porãmbavapype uvei.
18Upéicha omba’apóva (oservíva) Hesu Crístope g̃uarã, ombohory Ñanderuetépe ha ojehechakuaa porã (ivale) hapichakuéra apytépe.
19Upévare ñañeha’ãmba jaiko hag̃ua oñondive py’aguapýpe ha ñañopytyvõ jakakuaa hag̃ua ko py’aguapy reheguáva.
20Ani rembyai Ñanderuete rembiapo ne hermáno rekovépe nde re’úva rehe. Opaite tembi’u añetehápe ipotĩ, ivai katu peteĩ ho’u ramo peteĩ tembi’u ipy’apy ñe’ẽvai reheve.
21Upéva rãngue iporã ndape’úi so’o ni ndapey’úi víno, térã ambue mba’e ikatúva omokangy ne hermáno jerovia.
22Pe jerovia nde reguerekóva ndejupe g̃uarã año Ñanderuete renondépe. Opavave ovy’aite, ojapo jave peteĩ mba’e, noñandúirõ ipy’apyñe’ẽ oavisaha ichupe ivaiha pe ojapóva.
23Upe hermáno ho’úva peteĩ tembi’u py’amokõi reheve oñembojovakéma ndoikói haguére jerovia poguýpe; opaite mba’e pejapóva guive jerovia’ỹre ojehechakuaáma (oñeconsideráma) angaipa ramo.
Who We AreWhat We EelieveWhat We Do
2025 by iamachristian.org,Inc All rights reserved.
