2 Corintoyguakuérape 8 - Biblia en Guaraní - ?anderuete ?e’? Por? 2015

Hesu Crísto reheguáva oñopytyvõ porã

1Ore ningo roikuaaukase peẽme, che hermanokuéra, mba’éichapa ojehechauka Ñanderuete py’aporã Macedónia iglesiakuérape.

2Ha’ekuéra ohasa asy ramojepe ha imboriahu ramojepe ohechaukase ha’ekuéra ipy’aporãha avei oporoporiahuverekoseha.

3Ha’ekuéra ome’ẽ ipu’aka háicha ha oĩ avei ijapytépe ome’ẽvéva ikatúvagui ipy’aporãgui, che voi apyta techahare ramo.

4Ha ojerure asy hikuái oipytyvõ hag̃ua ambue Hesu Crísto reheguávape.

5Ha’ekuéra ojapove ore roha’ãrõva’ekuégui, oñeme’ẽ ha’ekueraite voi Ñandejára Hesu Crístope ha upéi oréve g̃uarã, Ñanderuete he’iuka haguéicha ichupekuéra.

6Upévare rojerure avei Títope, ha’e ombyaty hag̃ua pene remime’ẽ (ofrénda) oñepyrũ haguéicha, péicha ojejapopa hag̃ua avei pende apytépe ko tembiapo porã.

7Peẽ peñemotenondeve opaite mba’épe: Pende jeroviápe, pene ñe’ẽme, pende kuaapy arandúpe, pene kyre’ỹme, pene mborayhúpe oréve g̃uarã, péicha ko’ág̃a peñemotenonde avei pe pirapire ñembyatýpe.

8Che ndajapoukaséi peẽme ko tembiapo kóva, aha’ãrõnte uvei peẽ pemoirũ hag̃ua pene hermanokuérape hembiapo porãme, pehechauka hag̃ua peẽ pendepy’a porãha avei.

9Peẽ peikuaa porã voi Ñandejára Hesu Crísto ipy’aporã hague avei, Ha’e penderehehápe oñemomboriahuva’ekue, ha’e heta mba’e Jára ramojepe, peẽ peñemomba’e hag̃ua heta mba’eporã rehe imboriahukue rupi.

10Ha che pohekombo’e ko mba’e kóva rehe, che ambohasase peẽme: Iporã ningo peẽme g̃uarã pembyaty jevy peñepyrũ haguéicha umi añokuépe, ha pene rembipota porã rupi pemokyre’ỹ avei ambuekuérape.

11Upévare pejapopa pejaposeva’ekue ha pembyaty pene remime’ẽ peteĩteĩ pendepu’aka háicha.

12Upe ome’ẽva ipu’aka háicha oguerohory Ñanderuetépe, Ha’e ndojeruréi pe ojeguereko’ỹva rehe.

13Nda’éi ningo péicha, ivevúi hag̃ua ambuépe ipohyive hag̃ua peẽme; peteĩchapa peime hag̃ua uvei.

14Upévare ko árape peẽ peipytyvõ pene mba’e retavégui ambue pene hermanokuérape, ambuekuéra omyengovia hag̃ua peẽme sapy’a peẽ pehasa asýtarõ avei, peime hag̃ua peteĩchapa.

15Oje’e háicha Ñanderuete kuatiañe’ẽme: Upe heta omono’õva’ekuépe nahembýiri, ha upe mbovy omono’õva’ekuépe noikotevẽvéi, (Éxodo 16,18).

Títo ha iñirũ

16Che agradece Ñanderuetépe Ha’e omokyre’ỹ porã haguére Títope penderehehápe.

17Natekotevẽi ore romondo ichupe pene rendápe, ha’e voi ijehegui ohoseiterei pene rendápe.

18Ore romondo Títo ndive ambue ñane hermáno herakuã porãva opaite iglesiakuéra rupi, omosarambi porã haguére Ñanderuete ñe’ẽ porãite (evangélio).

19Ha ndaupéva añói, iglesiakuéra oiporavo voi ichupe oremoirũ hag̃ua rombohasa hag̃ua pe mborayhu rehegua temime’ẽ (ofrénda, Jerusalen iglésiape) ha péva rupi toñemomba’eguasu Ñanderuetépe, ha ojehechakuaa hag̃ua orepy’a porãha (opaite iglésia ndive).

20Péicha rojapo ani hag̃ua oñeñe’ẽvai orerehe ko pirapire opytáva ore poguýpe rehe.

21Roñeha’ã ningo roiko porã hag̃ua, ndaha’éi Hesu Crísto renondépente, ñande rapichakuéra renondépe avei.

22Romondo avei hendive ambue ñane hermánope, heta jevýma rohecha ha’e ikyre’ỹha heta mba’épe, ko’ág̃a katu ikyre’ỹvéntema ojerovia porã rupi penderehe.

23Títo ningo che irũ voi, ha che pytyvõhára penendive g̃uarã, ha umi mokõi ñane hermáno hendive ohóva, oñemondoiglesiakuéra remimondo ramo, omomba’eguasu hag̃ua Hesu Crístope.

24Pehechauka ichupekuéra ha iglesiayguakuéra renondépe, peẽ pehayhuha ichupekuéra ha péicha peẽ pemoañete umi ñe’ẽ porã ore ro’emava’ekue penderehe.