Isaías 63 - Biblia en Guaraní - ?anderuete ?e’? Por? 2015

Ñanderuete hi’árape omyengoviáta yvyarigua rembiapo vai ita’ýra Hesu Crísto rupi

1Máva piko pe oúva Edómgui, itáva guasu Bósragui, ijao pytãmbáma, Ha’e og̃uahẽma tetã ruvichaguasu ramo ipu’akapa reheve. Che voi ningo hekoitépe ajapopa Ñanderuete rembipota ha aju aporosalva hag̃ua che pu’akapa reheve.

2Mba’éicha rupípa Ha’e oñemopytã, ojogua ningo pe parral’a ohykue’óva aópe.

3Che apyrũ parral’a rehe ahykue’o hag̃ua, ha umi tetã apytégui ndaipóri avave chepytyvõva, Che ahykue’o pochýpe apyrũmba hesekuéra py’a vai reheve; ha tetãyguakuéra ruguykue ohypyipa che ao rehe ha chemongy’apa.

4Og̃uahẽma pe ára péva amyengoviapa hag̃ua che py’apýpe añongatuva’ekue ha oúma pe áño aporosalva hag̃ua.

5Ama’ẽkuri ha ndaipóri avave chepytyvõva, añemondýigui ama’ẽ porãve, ndaipóri katu chemoirũva, upémaramo che jyva chepytyvõ ha che pochy chemoirũ.

6Ha chepochy jave apyrũmba umi tetã rehe, ha che pochýpe amonga’u ichupekuéra ha añohẽ huguy yvýre.

Ñanderuete ipy’a porã Israelguakuéra ndive

7Chemandu’a Ñanderuete poriahuvereko rehe amyasãi hag̃ua Ñanderuete rembiapo tuichaitéva, Ha’e ohechauka haguére oréve ipy’a iporãha. Ha’e oiporiahuvereko ha ohayhu hetã Israélpe.

8Ha’e ningo he’i: Añetehápe ha’ekuéra che retã, che ra’ykuérape namboykemo’ãvéi ha Che asalváta ichupekuéra.

9Ha’ekuéra ojejopy vaiete jave, Ha’e ojepy’apy avei, upévagui Ñanderuete ombou ijyvága rembijokuái oipytyvõ hag̃ua ichupekuéra, Ha’e ipy’aporã ohay’úgui ichupekuéra. Ha’e ojogua ichupekuéra ha omopu’ã jevy jey ha ohupi ichupekuéra ijyva ári ymaite guive.

10Ha’ekuéra katu oñemoĩra’e hese, ha ombopochy Ipytu Porãmbáva ha upévagui oiko hese ija’e’ỹva ramo, ha Ha’e oñorãirõ hendivekuéra.

11Upémaramo Israel imandu’a umi ára ymaveguare rehe, Moises ha hetãyguakuéra rehe ha oporandu: Mamo piko oime pe ovecha rerekua oguenohẽmava’ekue ichupekuéra yguasúgui, mamo piko oime upe ome’ẽva’ekue Moises py’apýpe Ipytu Porãmbáva.

12Upe oisãmbyhyva’ekue Moiséspe ipyapy akatúape; upe omboja’ova’ekue pe yguasu Israelguakuéra renondépe, ha’ekuéra ohechakuaa hag̃ua Ijyvága Jára pu’aka.

13Ha’e oisãmbyhyva’ekue ichupekuéra ohasa hag̃ua yguasu rupi, ku kavaju oñesãmbyhy háicha desiérto rupi oñepysãnga’ỹ rehe.

14Ñanderuete Pytu Porãite oñangareko voi hesekuéra, ku tymba rerekua oñangareko háicha hymbakuéra rehe cerrokuéra pa’ũme, péicha emboguata avei ne retãme ha’ekuéra ohechakuaa hag̃ua Nde herakuã porãha.

Ñembo’e ojeruréva Ñanderuetépe oiporiahuvereko ha oipytyvõ jevy hag̃ua

15Ore Ruete, ema’ẽ yvága guive, ha ema’ẽ nde rekoha porãite guive. Mamo piko oĩ nde reko rakate’ỹ ha nde pu’akapa, ehechauka nde poriahuvereko ha nde py’aporã che rekovépe, mba’érehepa umía oguepáma.

16Nde ningo ore Ruete, Abraham ndaorekuaái ha Israel naimandu’ái orerehe, Nde katu, ore Ruete, Nde ningo ore Jára, oresalvátava, nde réra oĩma ymaite guive (ko ára peve).

17Mba’érehepa nde, ore Ruete, reheja ropia nde rapégui, ha remohatã ore py’a rokyhyje’ỹ hag̃ua ndehegui. Ejevýna orendive, ne rembiguaikuéra rayhupápe ha ne retã rehehápe.

18Mboy árapa ne retã jeporavopyre oiporu ijyvy imba’etee ramo, orerehe oñemoĩva opyrũmbágui nde rogaguasu rehe.

19Roikoroína ne retã’ỹ ramoguáicha ha tetã ambueyguakuéra nde reikuaa’ỹváicha térã oiporu’ỹváicha nde réra.