Juéces 5 - Biblia en Guaraní - ?anderuete ?e’? Por? 2015

Débora ha Barac purahéi

1Pe ára pévape Débora ha Barac, Abinoam ra’y ndive, opurahéi:

2Pemomba’eguasu Ñanderuetépe, Israelguakuéra opytu’ukuaa jevyha oĩgui kuimba’e ipy’aguasúva ijapytépe.

3Pehendúke tetã ruvichakuéra; pejapysaka porã tetã ruvicha ra’ykuéra; che aropurahéita Ñanderuetépe, apurahéita sálmo rupi Ñanderuete, Israel Járape.

4Nde, ore Ruete, resẽvo Seírgui ha rejúvo Edom ñuguasúgui, pe yvy oryrýi, ha pe áragui otyky ha araikuéragui osẽ ama.

5Umi cérro Sinai oryrýi Ñanderuete renondépe, Israel Jára renondépe.

6Samgar, Anat ra’yre, ha Jael árape, umi tapeguasu ojeheja rei oguata hag̃ua tape po’i karẽ rupi.

7Israélpe umi tava’i opyta itaperepa ha ikangypa, che, Débora, apu’ã meve Israel sy ramo.

8Israelguakuéra oiporavo ijára pyahurã, pe ñorãirõ og̃uahẽma pe táva rokẽguasu peve, 40.000 Israel soldadokuéra apytépe ndojehechái piko rete mo’ãha yvyra puku akua (lánza).

9Che avy’a Israel ruvichakuéra ndive, oñeha’ãmbáva ojapo hag̃ua Ñanderuete rembipota; pemomba’eguasu ichupe,

10peẽ peikóva búrro morotĩ ári ha peẽ pemoakãva pe ñembojovake; ha peẽ peguatáva yvy rupi: Pemoherakuã Ñanderuete rembiapoguasu.

11Pejapysaka, ojepurahéima tymba oñemboy’uha renda rupi, upérupi oñemombe’u jevy jevyva’erã Ñanderuete pu’aka, ha Israel táva ruvicha rembiapo porã, upérõ Israelguakuéra oho itáva rokẽguasukuérape.

12Epáy, epáy, Débora; Epáy, epáy ha eropurahéi. Epu’ã Barac, Abinoam ra’y, ha egueraha nde soldadokuéra ñorãirõme.

13Upévo Israelguakuéra oho hetã ruvichakuéra ndive ombopoguy hag̃ua hesekuéra ija’e’ỹvape.

14Efrain guive ou umi oikóva Amalec apytépe, ha hapykuéri ou Benjamin atykuéra; Maquir guive ou mburuvichakuéra, ha Zabulon guive ou umi oguerekóva mburuvicha yvyra po’íva.

15Isacar ruvichakuéra oho avei Débora ndive; ha Isacar ojeity hesekuéra ija’e’ỹva ári, Barac ojepoi haguéicha cerrokuéra pa’ũ guive. Umi Rubengua katu ojepy’apyete.

16Mba’érehepa repyta ne rymbakuéra aty apytépe, rehendu hag̃ua nde ovechakuéra rasẽ. Rubenguakuéra oñemboyke ityke’yrakuéra apytégui.

17Galaadguakuéra opytu’usénte Jordan mboypýri; ha Dan mba’erehépa opytara’e barcoguasuete ypýpe. Aser oiko yguasu rembe’ýpe, ha opyta ibárco rendag̃uame (puértope).

18Zabulonguakuéra katu oñorãirõ okyhyje’ỹre ñemanógui, ha Neftali omoirũ porã ichupekuéra ñorãirõme.

19Tetã ruvichakuéra oñembyaty oñorãirõ hag̃ua. Ko’ã Canaangua ruvicha oñorãirõ Taanácpe, Megído yrenda ypýpe, ndohupytýi katu pe pláta oha’ãrõva.

20Ára guive mbyjakuéra oñorãirõ ha ondyry Sísarare hape rehe (Josue 10,11).

21Pe ysyry Cison ymaguare ogueraha (oitypei) ichupekuéra. Nde, che ánga, epyrũ hesekuéra nde pu’akapa reheve.

22Oñehendu kavaju py ryapu, hi’ári oñani hikuái umi ipy’aguasúva.

23 Pemaldeci pe táva Merózpe, he’i Ñanderuete yvága rembiguái, itavayguakuéra noipytyvõi haguére Ñanderuetépe ni ipy’a guasúvape.

24Toñemomba’e Jael, Heber, pe Cengua rembireko, kuñakuéra apytépe; toñemomba’e pe kuñakarai oikóva óga hymba pirekueguiguápe.

25Sísara ojerure y, ha Jael ome’ẽ ichupe kamby; váso neporãvape ome’ẽ ichupe kamby iróva.

26Ipojái yvyra mbyky akua rehe, ha ijakatúape pe martílloguasu rehe oinupã hag̃ua Sísara akã rehe, ohasa peve iñakã yke mokõivéva rupi.

27Ho’a iñakuruchĩ ipykuéra renondépe, ojepysohápe opyta omano meve.

28Sísara sy ojepy’apýgui iñakãsẽ hóga rovetãme, ha ipa’ũha guive sapukaipópe he’i: Mba’éguipa ndoúi gueteri icárro, mba’érehepa hymba kavajukuéra imbegueiterei.

29Pe kuña karai iñaranduvéva, oĩva hendive, he’i ichupe, ha ha’e voi he’i ipy’apýpe:

30Katuete ojohu mba’erepyeta omboja’o hag̃ua ha peteĩteĩvape g̃uarã oguerúne peteĩ kuñataĩ, térã mokõi; umi ao ijeguaka paráva Sísarape g̃uarã; umi ao para oñembojegua jovaipáva mburuvicha ajúrare g̃uarã.

31Péicha ore Ruete, tomanomba umi nderehe ija’e’ỹva, ha umi nderayhúva katu toiko ku kuarahy osẽ ramoguáicha imbaretekuépe. Ha pe yvy opytu’u 40 áño pukukue.