Isaías 9 - Biblia en Guaraní - ?anderuete ?e’? Por? 2015

Hesu Crísto, pe Mesías, oúta ko yvy apére

1Pe tetã ko’ág̃a oikóva jepy’apy vaípe naiñypytũmo’ãi tapiaite, ku jepy’apy vevúicha ou ypyva’ekue Zabulon ha Neftali retãpy rehe; ipahápe ijyvy omyenyhẽta tesape tuichágui, Jordan mboypýri guive yguasu peve.

2Pe tetã oikóva pytũ guýpe ohecháta tesape ndetuicháva, umi oikóva ñemano ypýpe ohecháta ára sakã ohesapéva hi’ári.

3Remboheta hetavéta tetãyguakuéra ha rembovy’aitéta ichupekuéra. Ovy’a joáta hikuái ne renondépe ku ovy’a ramoguáicha kóga ra’ỹi oñemono’õha árape, ku hory joa háicha soldadokuéra omboja’o jave umi mba’e oguerumava’ekue ambue tetãgui.

4Nde remopẽgui pe cangálla pohyietéva, pe yvyra puku ijati’y ári, ha ijopyhára tukumbo ku Madian ára peguaréicha.

5Ojehapypáta soldádo sapatukuéra, ha ahojakuéra ojehypýiva tuguýpe opytáta tata rembi’urã ramo.

6Peteĩ mitãkuimba’e onacéta ñandéve ko yvy apére, peteĩ ta’ýra oñeme’ẽta ñandéve, ha ijati’y ári oĩta mburuvicha pu’aka, ha oñembohérata ichupe: Mbojovakehára heko peguáva, Jára ipu’akapáva, Ipy’aguasúva, Túva tapia g̃uarãva ha Mburuvicha py’aguapy reheguáva.

7Hetã pu’aka ituichaiterei ha ipy’aguapy ndaijapyramo’ãi, Ha’e oguapýta David guapyhaguasu ári ha Ha’e oisãmbyhýta hetãme, oguenohẽvo oimeraẽvape tape porãme ha ombojovakéta hekoitépe, upe ára upéva guive opaite ára peve g̃uarã, yvága atykuéra Jára, ojapopáta ko’ã mba’e.

Ñanderuete oñeko’õi Israel rehe

8Ñanderuete ombou iñe’ẽ Jacóbope, Israel opáy hag̃ua.

9Efrain ha Samariayguakuéra oikuaáta ko ñe’ẽ kóva, ñembotuicha ha jererovúpe he’i hikuái:

10Tápiagui ho’apa umi ladríllo, ore katu romopu’ã jevýta ita ojejokapyrévagui; oñekytĩmbava’ekue hígo saitekuéra hógape g̃uarã, ore katu romyengoviáta cédrope.

11Ñanderuete katu oipytyvõta umi Rezin rehe ija’e’ỹva, ha ombyatýta umi hese oñemoĩvape,

12kuarahyresẽguio umi Aramguápe ha kuarahyreikéguio Filisteayguakuérape; ha ijuru omokõta ohóvo Israelguakuérape. Upeichavérõ jepe Ñanderuete pochy ndopíri, ipo ojepysónte gueteri hesekuéra.

13Israelguakuéra katu ndopoíri heko vaígui, ojehavira ramojepe ndohekái Ñanderuete, yvága atykuéra Járape.

14Upévare Ñanderuete oikytĩ peteĩ árape Israel akã ha huguái, hakãguasu ha hakã sa’ikuérape.

15Israel akã ningo umi karai anciáno ha mbo’ehára, huguái katu karai umi proféta japu.

16Ko tetã sãmbyhyhára oporombotavy voi, ha umi oikóva ipoguýpe oñehundipáta.

17Upévagui Ñanderuete ndaipy’arorymo’ãvéi umi mitãrusu rehe, ha ndoiporiahuverekomo’ãi umi ityre’ỹva ha imenave’ỹvape; opaite umía ijapu ha heko vai, ha ijuru oñe’ẽ mba’e rei rei, upévare Ñanderuete pochy ndopíri, ipo ojepysónte gueteri hesekuéra.

18Iñaña reko hendy tatáicha, ohapýva javorái ha ñuãtĩ ka’aguy iñypytũveháme, omopu’ãvo tatatĩ yvate peve.

19Ñanderuete pochy ohapy ko tetã ha hetãyguakuéra opytapáta tata rembi’urã ramo; hetãyguakuéra ndoiporiahuverekovéi ipehẽnguekuérape jepeve.

20Oñemokõ ijakatúa gotyoguápe ha nahyg̃uatãigui, ho’u avei ijasu gotyoguápe, upeichavéramo jepe nahyg̃uatãmo’ãi; peteĩteĩva ho’uva’erã ijyva ro’o voi.

21Manases omokõse Efraínpe, Efrain Manaséspe, ha mokõivéva Judápe. Ko’ã mba’e rehe Ñanderuete ipochýgui, ha ipo ojepysónte gueteri hi’arikuéra.