Miquéas 1 - Biblia en Guaraní - ?anderuete ?e’? Por? 2015

1Ko ñe’ẽ Ñanderuete he’iva’ekue Miquéas, Moresetguápe; Juda ruvichakuéra Jotam, Acaz ha Ezequías árape. Ko’ã mba’e ojehechaukava’ekue ichupe Jerusalen ha Samária rehe.

2Pehendu porãke opaite tetãnguéra, ha pejapysaka porãke ko yvy apére oĩva guive, pende Ruete, pe Jaraitéva oiko techahare ramo ha oñemoĩta penderehe hogaguasu guive.

3Pema’ẽ porãke, pende Ruete osẽ hekohágui, ha oguejy ha oguata cérro ru’ãnguéra rehe.

4Ipy guýpe hykupa umi cérro ha umi ñu icha’ĩ araitýicha tatápe ha y osyryrõguáicha cérrogui.

5Opaite ko’ã mba’e oikóta Jacóbo oñemoĩ haguére cherehe ha Israel retãygua rembiapo vaíre. Mamo piko Jacóbo ojapo vai, ndaha’éi piko Samária rembiapo vai rupi. Ha moõpa Juda omomba’eguasu ambue járape, ndaha’éi piko Jerusalénpe.

6Upévare Samáriagui oikóta peteĩ ita atyraguasu ojeporútava iparralty korarã ha amosarambíta avei ijitakuéra ñúre ojehecha hag̃ua hóga rapo, umi itaguasu oñemboguapy haguépe hogakuéra.

7Ha opaite ijára gua’u ra’ãnga ojejokapáta ha umi jeguaka ojejapova’ekue kuña reko vai repykuégui oñehundipáta tatápe, opaite ko’ã mba’e opa reíta.

8Upévare che, Miquéas, ajahe’óta ha che rasẽ pukúta, aikóta pynandi ha opívo, che rasẽ pukúta aguaraguasúicha ha ambure’áta ñanduguasúicha.

9Ojekutu haguépe Samária ndokueramo’ãi, ha og̃uahẽma avei Juda retãme ha ohupitýma che retãyguakuérape, oĩma Jerusalen rokẽme.

10Ani pejétei kóva Gatguápe, ani penerasẽ heta rei Ácope ha pejapajeréikena Bet-le-afra yvy timbóre.

11Tapeho peẽ, Safirgua, opívo ha ñemotĩ reheve, ha umi Zaanangua nosẽmo’ãi ha Beteselguakuéra napenepytyvõmo’ãi.

12Umi Marotgua okyhyjeiterei ha noñemoangapyhyséi, Ñanderuete omboúgui mba’evai Jerusalen rokẽguasu peve.

13Pejokuáke pene rymba kavaju pende cárrore, peẽ Láquis pegua, penendive voi oñepyrũ Jerusalen retãygua rembiapo vai.

14Upévare peme’ẽ’arã pe jopói Morésetgatpe ha umi Aczibgua ombotavýta Israel retã ruvichakuérape.

15Ha peẽ peikóva Maresápe aguerúta upe oñemomba’évape penderehe, ha Israel potykue okañýta Adulam meve.

16Eñapĩ perõ nde ra’y nembopy’aroryetéva ha emoakãperõ yryvu ruvicháicha, ojererahágui ichupekuéra tembiguáirõ ambue tetãme.