2 Crónicas 21 - Biblia en Guaraní - ?anderuete ?e’? Por? 2015

Joram oisãmbyhy Judápe

1Josafat omano rire oñeñotỹ ichupe ituvakuéra ndive David távape, ha hendaguépe oisãmbyhy ita’ýra Joram.

2Ha ityvyrakuéra, Josafat ra’yre, oĩ: Azarías, Jehiel, Zacarías, Azariahu, Miguel ha Sefatías. Ko’ãva Josafat, Juda retã ruvicha ra’y meme.

3Ha itúva ome’ẽva’ekue ichupekuéra hetaiterei jopói: Pláta ha óro, ita vera hepýva ha tavakuéra oñemongorapyréva Juda retãme; Jorámpe katu ome’ẽ pe tetã ruvicha guapyha, ita’ýra ypykuégui.

4Ojehupi rire Jorámpe itúva guapyha guasúpe, ha ha’e oñemombarete rire, ojuka kyse pukúpe opaite ityvyrakuérape, ha ojukamimi avei mburuvichakuérape.

5Ha’e oñepyrũvo oisãmbyhy oguereko 32 áño, ha oisãmbyhy 8 áño Jerusalénpe.

6Ha’e oiko Israel retã ruvichakuéra rape rehe, ku Acab róga oiko haguéicha; hembireko ningo Acab rajy voi, ha ojapo ivaíva Ñanderuete resa renondépe.

7Ñanderuete nohundiséi David róga, Ha’e ome’ẽgui Davídpe iñe’ẽ ha he’ígui ichupe ome’ẽtaha ita’yrarépe tetã ruvicha reko opaite árape g̃uarã.

8Ha umi árape Edom opu’ã Juda rehe, ha omoĩ jevy peteĩ Edomgua hetã ruvicha ramo.

9Upéramo Joram imburuvichakuéra ndive, ha mayma icarrokuéra reheve, opu’ã pyharekue ha sarambi ojapo Edomguakuéra apytépe, omongora ichupe ha opaite icárro ruvichakuérape.

10Upeichavéramo jepe, Edom ojei Juda poguýgui ko ára peve. Umi árape Líbna ojei avei Juda poguýgui, Joram opoi haguére Ñanderuete, ituvakuéra Járagui.

11Ha ombosako’i haguére avei umi yvy yvate Juda cérro rupi, omomba’eguasu hag̃ua upépe ambue jára gua’úpe, ha omyaña myaña avei Judayguakuérape tape vaíre.

12Ha og̃uahẽ ichupe peteĩ kuatiañe’ẽ proféta Elíasgui, he’íva péicha: Ndereikóigui nde ru Josafat rape rehe, ha avei ndereikóigui Asa Juda retã ruvicha rape rehe,

13ha reikógui Israel retã ruvichakuéra rape rehe, ha remboheko vaiukágui Juda ha Jerusalenguakuérape, Acab róga oiko vai haguéicha; ha rejukágui avei nde ryvykuérape, nde ru ra’ykuérape, hekokuéra iporãiteveva’ekue ndehegui.

14Upévare Ñanderuete ombyaíta ne retã peteĩ jehasa asy rupi, ha rehundíta nde ra’ykuéra ha ne rembirekokuérape ha opaite mba’erepy reguerekóva guive.

15Ha nde nderasýta avei, upe mba’asy oĩta nde ryépe, ha nderasy tapiaitéta osẽ meve nde rye.

16Upéramo Ñanderuete omombáy umi Filisteaygua, ha umi Arabiaygua, ha pochypópe ojeity hikuái Etiopiayguakuéra ndive Joram ári.

17Ha ojupi hikuái ha oñemoĩ Juda rehe, ojasuru Juda retãre, ha ogueraha hikuái opaite mba’erepyeta ojohúva guive tetã ruvicha rógape, ha ogueraha hikuái avei ita’ýra ha hembirekokuérape; ha nahembyvéi ichupe ta’ýra; Joacaz, pe imitãvéva añoitémante opyta.

18Ko’ã mba’e ko’ãva ári, Ñanderuete ombohasy ichupe hyépe peteĩ mba’asy okuera’ỹvape.

19Ha ohasa asy rire heta ára, hye osẽmba okápe, mokõi áño haguépe. Ha hérape noñemyendýi tataguasu, ituvakuérape ojejapo haguéicha.

20Joram oñepyrũvo oisãmbyhy oguereko 32 áño, ha’e oisãmbyhy 8 áño Jerusalénpe; ha omano ndojepotavéima rire ichupe. Ha oñeñotỹ David távape, noñemoĩri katu ichupe tetã ruvichakuéra tyvýpe.