Ezequiel 44 - Biblia en Guaraní - ?anderuete ?e’? Por? 2015

1Ha pe ángel chembojere Ñanderuete rogaguasu rokẽ gotýo, péva oma’ẽ pe kuarahyresẽ gotýo ha péina oñembotyete.

2Ha he’i chéve Ñanderuete: Ko okẽ kóva oñemboty tapiava’erã, ndojepe’aiva’erã, ha yvyariguakuéra ndoikeiva’erã ko okẽ kóva rupi, pende Ruete, Israel Jára ohasa haguére kóva rupi, upévagui oñembotyeteva’erã.

3Pe tetã ruvichánte, imburuvichaháre, oguapykuaa upépe ho’u hag̃ua pan pende Ruete renondépe; oikeva’erã ha osẽ jevyva’erã pe ogaguy pegua okẽ rupi.

4Upéi ha’e chegueraha pe okẽ yvateoyguápe Ñanderuete rogaguasu renondépe; ha ama’ẽ, ha péina ápe Ñanderuete reko jajaipa omyenyhẽ hogaguasu; ha ajeity che rova yvýre.

5Ñanderuete he’i chéve: Nde, kuimba’e ra’y, eñangareko porãke nde py’apy rehe ha ema’ẽke nde resakuéra rupi, ha ehendúke nde apysakuéra rupi opaite mba’e Che añe’ẽtava ndéve umi tembiaporã rehe, che rogaguasúpe ojejapopa hag̃ua hekoitépe, Che ha’e hagueichaite; ha eñangareko porãke umi oikéva ha umi osẽva rehe che rogaguasúgui.

6Ha eréta umi heko vaívape, umi Israelgua rogaygua oñemoĩmava’ekue cherehe: Péicha he’i pende Ruete, topákena opaite pene rembiapo vaikue, peẽ Israel retãygua;

7ha pegueru ha pemoinge haguére che rogaguasúpe umi tetã ambueygua oñemopotĩ’ỹva ipy’apýpe ha ipire’i oñekytĩ’o’ỹva, ha péicha omongy’a che rogaguasu; ha hi’ári peikuave’ẽ jave che pan, pe tymba kyrakue ha huguykue, pepyrũ che ñe’ẽme’ẽmby rehe opaite pene rembiapo vaiete rupi.

8Ha peẽ voi pejapo rãngue ko tembiapo kóva che rogaguasúpe, peẽ pegueru gueteri tetã ambueygua ojapo hag̃ua ko’ã mba’e,

9upévagui Ñanderuete he’iuka peẽme: Mba’eveichagua tetã ambueygua, ipy’apýpe ha ho’ópe oñekytĩ’o’ỹva, oiko ramojepe Israelgua apytépe, ndoikeiva’erã che rogaguasúpe.

10Umi Levi ñemoñare, oñemboykeva’ekue chéve g̃uarã, ha Israelguakuéra oñemomombyryva’ekue chehegui omomba’eguasúvo ambue jarakuérape, ichupekuéra katuete Che ahaviráta.

11Ha’ekuéra oñangarekóta che rogaguasu rokẽ rehe, ha’ekuéra oikóta che rogaguasu rembiguái ramo, ha’ekuéra ojukava’erã umi tymba hetãyguakuéra oikuave’ẽséva guive ha oipytyvõva’erã avei hetãnguérape.

12Umi Levigua omyakã haguére hetãyguakuérape omomba’eguasu hag̃ua ambue jarakuérape, ko mba’e kóva oiko ichupekuéra g̃uarã ñepysãnga ramo, upévare amopu’ãta che po ame’ẽ ha amoañete hag̃ua che ñe’ẽ katuete ahavirataha ichupekuéra, he’i pende Ruete.

13Leviguakuéra noñembojamo’ãi che ypýpe omba’apo hag̃ua chéve che pa’i ramo, ha noñembojamo’ãi hikuái mba’eveichagua kuave’ẽmby rembiporu rehe, ha’ekuéra katuete ogueraháta ijapére opaite hembiapo vai ha otĩeteva’erã hikuái.

14Uperiréma Che amoĩta ichupekuéra che rogaguasu ñangarekohára ramo, omopotĩ ha omyatyrõ hag̃ua.

15Ha umi Levigua pa’i, Sadoc ñemoñaréva, hekoitépe ojapova’ekue che rogaguasu rembiapo ambue Israelguakuéra oñemboyke ramoguare chehegui, ha’ekuérante oñembojáta omba’apo hag̃ua che renondépe, ha che renondépe oĩta hikuái oikuave’ẽ hag̃ua chéve umi tymba kyrakue ha huguykue, he’i pende Ruete.

16Ha’ekuérante oikéta che rogaguasúpe, ha oñembojáta che mesa rehe omba’apo hag̃ua chéve g̃uarã; ha ojapova’erã che rembiapoukapykuéra.

17Ha oike vove hikuái pe korapy hyepyvogua rokẽ rupi, oñemondeva’erã hikuái ao linoguiguávape, nomondeiva’erã ao ovecha ragueguiguáva omba’apo jave che korapy ryepýpe térã che rogaguasu ryepýpe.

18Iñakã mo’ãha ha ichulu ojejapova’erã línogui, nomondeiva’erã mba’eve ombohy’aiva’erãva ichupekuéra.

19Ha osẽ vove hikuái pe korapy oka gotyoguápe, umi tetãygua oĩháme, omboi raẽva’erã ijao oiporúva hikuái hembiapo jave ha umía ohejava’erã che rogaguasu kotýpe, ha oñemonde jevyva’erã ijaoteévape, ani hag̃ua omboyke hetãyguakuéra Ñanderuetépe g̃uarã, hogaguasu rembiapo ao rupi.

20Ha noñemoakã perõiva’erã, ha ndohejaiva’erã iñakã raguekuéra ipuku, oñeñapĩva’erã hikuái.

21Pa’ikuéra apytépe avave ndo’uiva’erã víno oĩ aja pe korapy hyepyvoguápe.

22Ha nomendaiva’erã peteĩ kuñakarai rehe iména omanomava’ekue rehe térã peteĩ ojepoimava’ekue rehe; omendava’erã uvei kuñataĩ Israelguáre, oiko’ỹva gueteri kuimba’e ndive, térã omendava’erã peteĩ pa’i omanomava’ekue rembirekokue rehe.

23Ha ombo’eva’erã che retãyguakuérape oikuaa hag̃ua mba’épa iporã térã naiporãi, ha ombo’eva’erã ichupekuéra oikuaa porã hag̃ua mba’épa ipotĩ térã naipotĩri.

24Umi pa’i ombojovakéta oñorãirõva apytépe che ñe’ẽ he’i háicha; ha che rembiapoukapykuéra che areteguasu reheguáva ojapova’erã hekoitépe, ha omboareteva’erã che pytu’uha arakuéra.

25Ha’ekuéra noñembojaiva’erã yvyarigua re’õngue rehe ani hag̃ua oñemongy’a hese; ág̃a katu itúva térã isy rehe, ita’ýra térã itajýra rehe, ityvýra térã heindy naimenaiva’ekue rehe ikatu oñemongy’a.

26Ha oñemopotĩ rire, ojepapava’erã 7 ára ha uperire ae omba’apokuaa jevy che rogaguasúpe.

27Ha pe ára oike jevyha che rogaguasúpe, upe korapy ryepyvoveguápe omba’apo hag̃ua, oikuave’ẽ raẽva’erã kuave’ẽmby hembiapo vai rehe, he’i pende Ruete.

28Noñeme’ẽmo’ãi ichupekuéra peteĩ lóte, Che voi ningo añangarekóta hesekuéra he’i pende Ruete, napeme’ẽmo’ãi ichupekuéra ijyvyteerãva Israel retãme; Che voi ningo imba’erepy, he’i pende Ruete.

29Pe kuave’ẽmby tembi’u reheguáva, kuave’ẽmby angaipa rehegua ha pe kuave’ẽmby teko ky’a rehegua ro’ógui ho’uva’erã hikuái, umi mba’e Israelguakuéra ome’ẽva pende Ruetépe g̃uarã opytava’erã avei pa’i mba’erã ramo.

30Ha opaite hetãygua koga’a ypykuégui ha kuave’ẽmby oñekuave’ẽva, umía pa’i mba’erã meme; ha peme’ẽva’erã avei pa’ikuérape pene pan, pende trígo ku’i ojehovasa hag̃ua pende róga.

31Mba’eveichagua tymba omano reiva’ekue térã mymba ñarõ omboja’ova’ekue, taha’e guyra térã mymba, pa’ikuéra ndo’uiva’erã.