Jeremías 25 - Biblia en Guaraní - ?anderuete ?e’? Por? 2015

Jehasa asyete

1Ko ñe’ẽ ou Jeremíaspe, Judayguakuéra rehe, Joacim, Josías ra’y oisãmbyhy aja tetã ruvicha ramo irundyha áñope, ha Nabucodonosor, Babilónia retã ruvicha, oisãmbyhy aja peteĩha áñope;

2Jeremías ombohasa mayma Juda ha Jerusalenguápe ko ñe’ẽ kóva, he’ívo:

3Josías, Amon ra’y, Juda retã ruvicha oisãmbyhy rire 13 áño guive ko ára kóva peve ohasa 23 áño ha opaite ára ou chéve Ñanderuete ñe’ẽ ambohasa hag̃ua peẽme ha upeichavéramo jepe napehenduséi.

4Ñanderuete ombou jevy jey peẽme hembiguái profetakuéra, oñe’ẽ tapia hag̃ua peẽme, peẽ katu napehenduséi ha napemboykéi pende apysa pejapysaka hag̃ua iñe’ẽ rehe,

5he’írõ guare hikuái peẽme: Pepoi ko’ág̃a pende rape vaígui ha pene rembiapo ñañágui, peiko hag̃ua tapia g̃uarã pe yvy Ñanderuete ome’ẽmava’ekuépe peẽme ha pende rukuérape g̃uarã;

6ani peho ambue jára rapykuéri, ani peiko hembiguaikuéra ramo ha ani pemomba’eguasu ichupekuéra, ani hag̃ua peẽ chembopochy pene rembiapo vai rupi; upéicharamo jepe ndoikomo’ãi penderehe mba’eve ivaíva.

7Ha peẽ nacherendúi, he’i pende Ruete, peẽ chembopochy uvei pene rembiapo vai rupi ha upévagui pehasa asyva’erã.

8Ñanderuete, Yvága Atykuéra Jára, he’i: Napehendúigui che ñe’ẽ,

9ambyatyukáta ha amondóta umi tetã yvate gotyogua ha che rembiguái Nabucodonosor, Babilónia retã ruvichápe, pene retãme amoĩ hag̃ua ipoguýpe ko tetã kóvape ha ijerekuévo oĩva guivépe, ha péicha Che pohundíta peiko hag̃ua kyhyjepópe, ñembohoryha ramo ha jepy’apy vaípe opaite ára peve.

10Ha Che amokirirĩmbáta ijapytepekuéra ñe’ẽ tory ha vy’a reheguáva, kuimba’e ha kuña omendátava purahéi, umi molíno ryapu ha amboguéta hataindynguéra.

11Ko tetã tuichakue itaperepáta ha oñemondyipáta; ha ko tetã kóva oikóta Babilónia retã ruvicha rembiguái ramo 70 áño pukukue.

12Ha ohasa rire 70 áño, ahaviráta avei Babilónia retã ruvichápe ha hetãyguakuérape oiko vai ha ojopyeterei haguére che retãme, he’i pende Ruete, ha hendive ambotaperéta avei opaite árape Caldeayguakuéra retãme.

13Ha aguerúta upe tetã upéva ári opaite mba’e ha’emava’ekue hese, ha opaite mba’e ojehaíva ko kuatiañe’ẽ kóvape ha opaite mba’e Jeremías oprofetizamava’ekue guive ko tetã kóva rehe, katuete oikopáta avei.

14Ha’ekuéra ho’áta avei ambue tetãnguéra poguýpe ha oikóta ambue tetã ruvichaguasukuéra rembiguái ramo; upéicha Che amyengoviáta ichupekuéra hembiapo vaikuérakue.

Ñanderuete pochy ryru

15Péicha he’i chéve Ñanderuete, Israel Jára: Ejapyhy che pógui ko víno ryru, ha emboy’uka ichugui opaite tetãnguérape Che romondotahápe.

16Ha omboy’u rire, oryryipa ha itarovapáta hikuái, upéi Che amondóta che kyse puku ijapytepekuéra.

17Upéi ajapyhy pe váso Ñanderuete pógui, ha amboy’uka opaite tetãnguérape, Ñanderuete chemondo haguérupi:

18Upéicha ho’u Jerusalen, Juda pegua tavakuéra, hetã ruvichakuéra ha imburuvichakuéra oiko hag̃ua taperekue ramo, ñemondýi, ñembohory ha maldicion guýpe, ojehu háicha ko ára kóvape;

19upéicha ho’u avei faraon, Egípto retã ruvicha, hembiguaikuéra, imburuvichakuéra ha mayma hetãyguakuéra,

20ha opaichagua tetãnguéra oikóva guive upépe, ha mayma Uz retã ruvichakuéra, ha Filistéa retã ruvichakuéra, Ascalongua, Gazaygua, Ecrongua ha Asdod rembyrekuéra;

21Edom, Moab ha Amon ñemoñarenguéra;

22ha ho’u avei umi tetã ruvicha Tíro pegua, mayma Sidon pegua ha umi tetã ruvichakuéra pe yguasu rembe’y jerekuévo:

23Dedan, Tema ha Buzgua, ha mayma umi isyva yke omoperõva;

24mayma Arábia pegua tetã ruvicha, mayma tetã oikóva umi tetã ñu meguápe ha hetã ruvichakuéra;

25ha ho’u avei mayma Zimri pegua tetã ruvicha, mayma Elam retã ruvicha, mayma Média retã ruvicha;

26ha mayma yvate gotyogua tetã ruvicha, umi ag̃uigua ha umi mombyryguáva, ha opaite tetã oĩva guive ko yvy apére to’u pe vásogui opa peve ha ipahápe to’u avei Babilónia retã ruvichaguasu.

27Ha eréta ichupekuéra: Péicha he’i, Yvága Atykuéra Jára, Israel Jára: Pey’u peka’upa peve, peg̃ue’ẽmba peve (pevomita) ha pe’a peve; ha avave nopu’ãmo’ãvéima, amboútagui che kyse puku pende apytépe.

28Ha ndojapyhyséi ramo nde pógui pe váso ho’u hag̃ua, eréta ichupekuéra: Péicha he’i Yvága Atykuéra Jára: Pemboy’uva’erã katuete ko váso pegua.

29Peikuaa porãke, Che añepyrũ ahavira pe táva ogueraháva che réra; ha peẽ piko pepyta reíta. Ndapepyta reimo’ãi, amondótagui che kyse puku mayma tetãme oĩva guive ko yvy apére, he’i Yvága Atykuéra Jára.

30Ha nde katu reprofetiza ichupekuéra ko ñe’ẽ kóva ha eréta ichupekuéra: Ñanderuete oñe’ẽta ára sunúicha yvate guive, hekoha potĩete guive; hatã oñe’ẽta hogaguasu rehe; umi parral’a rykue’oha purahéi ombohasáta mayma yvy ape arigua rehe.

31Hyapukue og̃uahẽta yvy apýra peve, Ñanderuete ombojovakéta opaite tetãnguérape; Ha’e voi opaite yvyarigua mbojovakehára; umi iñañávape oitýta kyse puku rupi, he’i Ñanderuete.

32Péicha he’i Yvága Atykuéra Jára: Pema’ẽ porãke, pe jehasa asy ohasáta peteĩ tetãgui ambue tetãme, ha yvytu’atã vaiete opu’ãta pe yvy apýra guive.

33Ha upe ára upévape ojepysóta umi tetekue, Ñanderuete ojukava’ekue, peteĩ yvy apýra guive ambue apýra peve; ndojeguerojahe’omo’ãi, noñembyatymo’ãi ha noñeñotỹmo’ãi avei; ku tymba repotícha (abónorãicha) opytapáta yvy apére.

34Peẽ ovecha rerekua, peguahúke ha pesapukái: Peẽ peporosãmbyhýva, pejapajeréi yvy timbópe, og̃uahẽmagui pende ára pejejuka térã peñemosarambi hag̃ua, ha pejejukáta ovecha kyráicha.

35Umi ovecha rerekua ndaikatumo’ãi okañy ha umi mburuvicha ndohomo’ãi ñemiháme.

36Pejapysaka porãke umi ovecha rerekua sapukái rehe ha umi ovecha aty oisãmbyhýva rasẽ asy rehe, Ñanderuete ohundipágui ikapi’ipe.

37Ha umi ñu ikyrỹi asýva oñehundipáta Ñanderuete pochy rupi.

38Pe leõ opoi rei háicha ikehágui; upéicha Ñanderuete ombyaipa pe yvy péva ipochy ha ijejopy vai rupi.