Job 33 - Biblia en Guaraní - ?anderuete ?e’? Por? 2015

Eliu omongavaju Jóbpe

1Upévare nde, Job, ehendu porãke che ñe’ẽ, ejapysaka porãke che ha’étavare ndéve.

2Eikuaa porãke che ha’étava ha che kũ oñe’ẽta che ahy’okua guive.

3Hekoite peguávante osẽta che py’apýgui ha che juru ombohasasénte pe añetegua hekoite peguáva.

4Ñanderuete Pytu Porãite cheapova’ekue, ha pe Ipu’akapáva Pytu Porãite chemokyre’ỹ.

5Embohováike chéve, ikatu ramo, emoĩ porãke ne ñe’ẽrã, eñembosako’i porãke.

6Ema’ẽ porã, che aiko Ñanderuete renondépe, nde reiko háicha, yvýgui Ha’e cheapova’ekue, ndéicha avei.

7Eikuaa porãke, natekotevẽi rekyhyje chehegui ha che ndorojopyetereimo’ãi.

8Añetehápe nde erepáma che apysaitépe, ha ahendu porãmba nde ereva’ekue guive.

9Nde ere: Che chepotĩ ha nacherembiapo vaíri, che ánga ipotĩ ha nañemoangaipái.

10Nde ere Ñanderuete oñemoĩha nderehe ha ndeguerekoha hese ija’e’ỹva ramo.

11Ha’e omoĩ nde pykuéra yvyrakuápe, ha omaña vai mayma nde rapekuéra rehe.

12Eikuaa porãke, ko’ã mba’épe nereñe’ẽi hekoitépe, che ha’e ndéve Ñanderuete ituichaveha yvyariguakuéragui.

13Mba’érehepa reñe’ẽvai hese, Ha’e nanembohováiri haguére.

14Heta hendáicha Ñanderuete oñe’ẽkuaa, ñande katu ndajahechakuaái ko’ã mba’e.

15Kéra rupi, yvyarigua oke hatã jave, térã techapáy (vision) rupi.

16Upéicha oikuaauka hembipota yvyariguakuéra apysápe, ha omondyiuka ichupe iñe’ẽ pohýi rupi.

17Yvyarigua oñemboyke hag̃ua hembiapo vai ha iñembotuichágui,

18Ñanderuete ndoipotái ñane ánga ho’a ñuhãme ha ndohejái avave omano rei hu’y rupi.

19Mba’asy rupi sapy’ánte Ñanderuete oñe’ẽ kuimba’e ha kuñakuérape, hasypa jave hete.

20Hete ha hi’ánga ombojeguaru peve galléta ha tembi’u porãvéva jepe.

21Hete ipirumive ohóvo, ojehecha peve ikanguekuéra.

22Hi’ánga oñemoag̃ui ohóvo ñemano rokẽgui ha hekove umi oporojukávare.

23Ijypýpe oĩne peteĩ Ñanderuete ángel, hi’angelkuéra apytégui, ohekombo’e porãva ichupe oguata jevy hag̃ua Ñanderuete rape porãre.

24Ha kóa oiporiahuvereko ramo ichupe he’íta Ñanderuetépe: Epoimína ichugui anítei ha’e oguejy isepultúrape, ajohúma hekove repykue,

25ha Ñanderuete ombopyahu jevykuaa hete ku imitãrusu ára ramoguaréicha.

26Ha ha’e oñembo’e jevýta Ñanderuetépe ha Ha’e ohayhu jevýta ichupe ha ohechaukáta ichupe heko jajaipa ha osalváta ichupe.

27Ha’e opurahéi jevýta hapicha aty renondépe ha he’íta: Añemohembiapo vai ha che reko ivai, Ñanderuete katu cheperdona ha nomyengoviái chéve che rembiapo vaikue.

28Ñanderuete oguenohẽ che ánga ñemanógui, ahecha jevy hag̃ua hesape porã.

29Eikuaa porãke, opaite ko’ã mba’e Ñanderuete ojapo, mokõi térã mbohapy jevy oimeraẽva kuimba’e ha kuña rekovépe.

30Omboyke hag̃ua hi’ánga iñemanorãgui ha ohesape hag̃ua ichupe umi oikovéva resape.

31Ejapysaka porãke nde, Job, ha cherendumína, ekirirĩmína, che añe’ẽ jave.

32Reguerekórõ ñe’ẽ hekoite pegua, chembohovaimína, eréna pe añetegua ha ahendu porãta.

33Ha nahániri ramo nde cherendu chéve, ekirirĩetéke ha che rombo’éta pe añetegua nearandu hag̃ua.