Romayguakuérape 10 - Biblia en Guaraní - ?anderuete ?e’? Por? 2015

1Che hermanokuéra, che py’aite guive aipota ha ajerure asy Ñanderuetépe che retã Israelguakuéra rehe ojesalva hag̃ua.

2Che aikuaa porã ha’ekuéra hakate’ỹha Ñanderuete rehe, ndoikuaa porãi katu ichupe ni ndojeroviái hekópe hese.

3Ha’ekuéra ndoikuaái pe ñemboheko potĩ ouha Ñanderuetégui, ha’ekuéra katu oñeha’ãmba oñemboheko potĩ hag̃ua Ñanderuete resa renondépe ipu’akatee rupi, ha pe oporomopotĩkuaáva Ñanderuetémante Israel omboyke ndoipotáigui hikuái.

4Moises rembiapoukapykuéra ñandeguerahasénte Hesu Crísto rendápe, Moises rembiapoukapykuéra oñeme’ẽnte Hesu Crísto ou peve, (ko yvy apére opavave ojerovia hag̃ua Hesu Crísto rehe).

5Moises he’íma umi tembiapoukapykuérare, upe ojapóva hekoitépe opaite tembiapoukapykuéra oñemboheko potĩma ha oikove tapia g̃uarãma, (Levítico 18,5).

6Pe ñemboheko potĩ oúva jerovia rupi katu he’i péicha: Ani ere nde py’apýpe: Mávapa ojupikuaáta Ñanderuete rekohápe; kóva ningo he’ise omboguejytaha Hesu Crístope.

7Térã: Mávapa oguejýta yvy hugua’ỹme, kóva ningo he’ise: Ogueru jevy hag̃ua Hesu Crísto omanova’ekue apytégui (Deuteronómio 30,12-13).

8Pe ñemboheko potĩ oúva jerovia rupi katu he’i: Hi’ag̃ui ningo oĩ pe ñe’ẽ, nde jurúpe ha nde py’apýpe. Ha ko ñe’ẽ kóva ningo Hesu Crísto voi.

9Nde remombe’u ramo nde juru rupi Hesu Crísto nde Jaraha, ha nde rejerovia ramo nde py’aite guive Hesu Crísto rehe, ha Ñanderuete omoingove jevy hague ichupe omanova’ekue apytégui, upéicharamo rejesalváta.

10Ñande jajerovia ramo ñande py’aite guive Ñanderuete rehe Ha’e ñanemboheko potĩma, ha ñande juru rupi ñamombe’u ramo Hesu Crístope, Ha’e ñandesalvataha.

11Ñanderuete kuatiañe’ẽ he’i voi: Upe ojeroviáva Hesu Crístore noñehundimo’ãi, (Isaías 28,16).

12Judayguakuéra ha tetã ambueyguakuéra apytépe noñembojuavýi, oĩ peteĩete Jára ipy’a porãva opavavépe g̃uarã, ojeroviáva guive Hesu Crístore.

13Opavave ojeroviáva guive Hesu Crístore, Ijára ramo, ojesalváta katuete.

14Mba’éicha piko ohenóita ichupe, ndoikuaái ramo ichupe, ha mba’éicha piko ojeroviáta hese nohendúi ramo Ha’e oikoha; ha mba’éicha piko iñe’ẽrendúta, avave nomombe’úi ramo ichupekuéra Hesu Crísto oikoha.

15Ha mba’éicha piko ikatúta ojekuaauka Hesu Crístope ichupekuéra, noñemondói ramo avavépe hendapekuéra. Ojehaíma Ñanderuete kuatiañe’ẽme: Iporãite ningo umi py omyasãiva mba’e iporãva, (Isaías 52,7).

16Ndaopavavéi ningo iñe’ẽrendu Hesu Crísto evangéliope. Isaías voi he’iva’ekue: Máva piko oguerovia ore ñe’ẽ, (Isaías 53,1).

17Pe jerovia onace pe evangéliogui, ha pe evangélio ou Hesu Crísto ñe’ẽgui, (Isaías 53).

18Opáichavo aporandu: Israelguakuéra piko nohendúira’e. Héẽ, katuete ohendu: Opa yvy apére oñehenduhína pe evangélio ha pe yvy pahápe jepe ojekuaaukáta pe evangélio.

19Ha aporanduse jevy: Israélpe piko nahesakã porãi (noentendéi) ra’e pe evangélio. Katuete hesakã porã, Moises voi he’iva’ekue: Che ambopochýta Israelguakuérape ambue tetã rupi, ndaha’éiva peteĩ tetã añeteguáva ha amoñeko’õita ichupekuéra pe tetã itavýva rupi (Deuteronómio 32,21).

20Ha Isaías kyhyje’ỹre he’i: Umi chereka’ỹva’ekue chejohúma ha ajehechauka umi oporandu’ỹvape cherehe, (Isaías 65,1).

21Israel rehe katu Isaías he’i: Meme ára che aipyso che pokuéra peteĩ tetã iñe’ẽrendu’ỹvape ha upéicha ramojepe oñemoĩhína cherehe, (Isaías 65,2).