1Che hermanokuéra, peẽ pejerovia porãse ramo Hesu Crísto ojajaipáva rehe ani pembojuavy pende rapichakuérape.
2Ha sapy’a oike ramo pende atýpe (pende cúltope) peteĩ kuimba’e ikuãirũ oropáva reheve ha oñemondéva ao hepývape ha hendive oike ramo avei peteĩ kuimba’e imboriahúva ijao soropamíva reheve,
3ha peẽ pema’ẽve pe oñemonde porãvéva rehe ha peje ichupe: Eguapy ko’ápe iporãvehápe; ha pe imboriahúvape peje: Epyta nde ñembo’yhápe iglésia ruguápe térã eguapy yvýpe che py renondépe,
4péicha pejapo ramo, ndapeporombojuavýi nga’u piko peẽ, ha peporombojovake hekope’ỹpeína.
5Che hermanokuéra pecherendúkena: Ndoiporavói piko Ñanderuete umi tapicha ohechakuaáva imboriahuha ipytu porãme; ko’ãva oñemomirĩ ha ojerovia porãgui Ñanderuetére omoingéta yvágape, ko’ã mba’e Ha’e oprometemava’ekue opavave ohayhúvape guive ichupe.
6Peẽ katu pe’apo’i imboriahúvape. Ndaha’éi nga’u piko mba’eta rerekohára umi pendejopýva ha penembotyryrýva mbojovakehára rendápe.
7Ndaha’ekuérai nga’u piko umi oñe’ẽvaíva Hesu Crísto, pende Jára rehe.
8Peẽ pejapo porãite, pejapo ramo añetehápe ha hekoitépe pe tembiapoukapy tuichavéva oĩva Ñanderuete kuatiañe’ẽme: Ehayhu nde rapichápe, nde rejehayhu háicha, (Levítico 19,18).
9Peẽ pembojuavy ramo pende rapichakuérape, peẽ peñemohembiapo vai, ha Ñanderuete rembiapoukapy penembojovakéta angaipavóra ramo.
10Oime ramo ojapopáva Ñanderuete rembiapoukapykuéra, ha upéi ojavy ramo peteĩme jepe, péva opyta ojavy ramoguáicha opaite Ñanderuete rembiapoukapykuéra.
11Ñanderuete he’iva’ekue: Ani remongy’a ne mendare reko, he’i avei: Anítei reporojuka. Ha nde neremongy’ái ramo ne mendare reko ha upéi nde reporojuka, upéicharõ nde rejavy opaite Ñanderuete rembiapoukapýpe, (Éxodo 20,13-14).
12Peñe’ẽ ha peiko avei ku tapicha oñembojovakévaicha pe tembiapoukapy sãso (libertad) rehegua rupi.
13Umi oporoporiahuvereko’ỹva oñembojovakéta avei jeporiahuvereko’ỹre; upévare upe oporoporiahuverekóva natekotevẽi okyhyje pe ñembojovake áragui, (1 Pédro 4,8).
14Ma’erãpa iporã, che hermanokuéra, peteĩ he’i ramo oguerekoha pe jerovia, hekovépe katu ndojejohúi tembiapo iporãva. Ikatúnepa peichagua jerovia osalva ichupe.
15Oĩ ramo peteĩ hermáno térã hermána ndaijaóiva ha nahembi’úiva,
16ha peteĩva pende apytépe he’i ramo ichupe: Tereho py’aguapýpe (toho porãite ndéve), eñembyaku ha ekaru, ha nome’ẽi ichupe umi mba’e ha’e oikotevẽva, ma’erãpa iporã peichagua jerovia.
17Pe jerovia hi’a’ỹva tembiapo porãme ndovaléi mba’everãme, omanóma uvei.
18Ikatu ningo oime ombohováiva: Nde ningo rereko jerovia, ha che areko tembiapo porã, ehechauka chéve nde jerovia ne rembiapo porã’ỹre ha che ahechaukáta ndéve che jerovia heñóiva che rembiapo porã rupi.
19Nde ningo reguerovia Ñanderuete peteĩha, ha rejapo porã; umi mba’epochy jepe oguerovia avei péva ha upévagui oryrýi, okyhyjeitereígui.
20Nde tekove výro, nderehechakuaaséi piko, pe jerovia tembiapo porã’ỹre ndovaleiha mba’everãme (omanómagui).
21Abraham, ore ru, ojehechakuaava’ekue heko porãvaha ramo hembiapo porã rupi, oikuave’ẽgui ita’ýra kuave’ẽmby renda ári.
22Rehechápa ijerovia omba’apo porã hague hembiapo porã rupi, ha hembiapo porã rupi ijerovia okakuaa porãve ohóvo og̃uahẽ meve hu’ãme.
23Ñanderuete kuatiañe’ẽ he’i voi: Abraham ojerovia haguére Ñanderuete rehe, Ha’e ohechakuaa ichupe heko porãva ramo, ha oñembohéra ichupe Ñanderuete rayhupára (amígo) (Génesis 15,6).
24Pehecha ningo pe tapicha ojehechakuaaha heko porãva ramo hembiapo porã rupi, ndaha’éi jerovia año rehe.
25Upéicha ojehuva’ekue avei Rahab, pe kuña reko vaívape, ha’e ojehechakuaa heko porãha omokañy haguére Israel rembijokuáipe, ouva’ekue omaña ñemi hag̃ua Jerico rehe ha upéi omondo ichupekuéra ambue tape rupi.
26Pe tete ipytu porã’ỹre omanóma (tetekue rei), upéicha avei pe jerovia tembiapo porã’ỹre, omanóma avei.
Who We AreWhat We EelieveWhat We Do
2025 by iamachristian.org,Inc All rights reserved.
