2 Pédro 3 - Biblia en Guaraní - ?anderuete ?e’? Por? 2015

Hesu Crísto ou jevyva’erã

1Che rayhupára, ko kuatiañe’ẽ kóva ningo pe mokõiháma che ahaíva peẽme; ko’ã mokõi kuatiañe’ẽ rupi che pomokyre’ỹ pepensa hag̃ua hekópe;

2penemomandu’a hag̃ua avei umi proféta heko porãva he’iva’ekue rehe ha oikóta gueteri, ha penemomandu’a hag̃ua avei Ñandejára ha Salvador rembiapoukapy rehe, ha Ñanderuete apostolkuéra ñe’ẽ oñembohasava’ekue peẽme.

3Kóva ra’ẽ peikuaava’erã: Umi ára pahápe katuete og̃uahẽva’erã umi oñembohorýva Ñanderuete ñe’ẽ rehe ha oikovahína ijyvyarigua rete rembipota vai poguýpe omyañáva ichupekuéra, ha he’iva’erã peẽme:

4Mba’épa oiko ko promésagui, he’íva: Hesu Crísto ou jevytaha. Ñande ypykuéra omano guive (ko’ág̃a peve) noñemoambuéi mba’eve, opaite mba’e opyta uvei oñemoingo haguéicha ko múndo ñepyrũ guive, (Isaías 5,19; Ezequiel 12,22; Matéo 24,48).

5Añete, ha’ekuéra ningo ndoikuaái, ndoikuaaséigui, yvagakuéra oiko hague ymaite guive ha Ñanderuete ñe’ẽ rupi ko yvy kóva osẽ ýgui ha y rupi ojejapo hague.

6Ko yvy kóva oñehundimava’ekue avei amaguasu rupi.

7Ko’ag̃agua yvagakuéra ha yvy oñeñongatu Ñanderuete ñe’ẽ rupi tatápe g̃uarã.

8Anítei oñeñomi pendehegui, che rayhupára, ko añetegua kóva, peikuaa uvei: Ñanderuetépe g̃uarã peteĩ ára (día) 1.000 áñoicha, ha 1.000 áño peteĩ araichanteha, (Salmokuéra 90,4).

9Ñanderuete nombo’aréi iñe’ẽ oiko hag̃ua, mbovymi oimo’ã háicha, oha’ãrõsénte, ndoipotáigui mbovymi jepe oñehundi, opavavénte toñembyasy uvei ojapovai haguére ha tojevy Ñanderuete rendápe.

10Hesu Crísto ára og̃uahẽta ku mondaháicha, ha upe ára upévape yvagakuéra ohasapáta tyapu sununu ryapu ndetuichaitévape, ha umi mba’e imichĩetevéva (eleméntos) jepe oñehundiva’erã tata rendýpe ha opaite mba’e oĩva guive ko múndope okaipava’erã.

11Opaite ko’ã mba’e ko’ãva oñembohykupáta ramog̃uarã, peñeha’ãmba peiko hag̃ua hekoitépe, ani hag̃ua peñehundi avei. Upévare peñemboheko porãva’erã ha peñemomirĩva’erã Ñanderuete renondépe,

12ha peha’ãrõ Ñanderuete ára pyahu oútava ha upevarã peñembosako’i porã, oñembohykúrõ g̃uarã ko’ag̃agua yvagakuéra ha umi mba’e michĩetevéva (eleméntos) jepe tata rendy okáivo hykupava’erã.

13Ñaha’ãrõ yvagakuéra pyahu ha yvy pyahu Ñanderuete ñe’ẽ he’i háicha ha ipypekuéra oikóta justícia añeteguáva, (Isaías 65,17; 66,22; Apocalípsis 21,1.27).

14Upévare, che rayhupára, peha’ãrõ aja ko’ã mba’e ojehútava, peñeha’ãmba peñemboyke tembiapo vaígui peñemboheko porã hag̃ua, Ñanderuete tapendejohu peikóvo ipy’aguapýpe,

15ha pehechakuaákena Ñanderuete osalvaseha hetavépeipaciéncia rupi, upéicha Páblo, ñane hermáno jahayhúva, ohaimava’ekue avei peẽme, pe arandu oñeme’ẽva’ekue rupi ichupe.

16Opaite ikuatiañe’ẽme, Páblo oñe’ẽ avei ko’ã mba’e ko’ãva rehe, ijapytépe oĩ ramo jepe umi mba’e hasymíva hesakã porã hag̃ua. Ha ã mba’e hasýva ningo umi itavýva ha ipy’ahetáva omoambue (omokarẽ), omoambue háicha avei ambue kuatiañe’ẽ he’íva, upévarupi ha’ekuéra voi oñehundíta.

17Peikuaávo péva, peñeñangarekókena ha peñembo’y hatãkena, ani hag̃ua ha’ekuéra penemombia avei hekombo’e japu rupi Ñanderuete rapégui.

18Peikuaa porãve pehóvo uvei Ñandejára ha ñande Salvador Hesu Crístope ha pekakuaa pehóvo imborayhúpe. Toñemomba’eguasu ichupe ko’ág̃a ha pe ára atyguasurãme, taupéicha (amen).