Deuteronómio 23 - Biblia en Guaraní - ?anderuete ?e’? Por? 2015

Umi oike’ỹtava atyguasúpe

1Ndoikeiva’erã Ñanderuete atýpe umi ha’ỹi ñehungáva térã hemboñekytĩva.

2Umi ta’ýra okára ndoikeiva’erã Ñanderuete atýpe; 10 ñemoñare (generaciónes), ohasa ramojepe ndoikeiva’erã Ñanderuete iglésiape.

3Amongua ha Moabgua ndoikeiva’erã Ñanderuete atýpe, ohasa ramojepe 10 ñemoñare (generaciónes),

4nosẽi haguére pendejohúvo pan ha y reheve pende rapépe, pesẽ ramoguare Egíptogui, ha ohenóigui Balaam, Beor ra’ýpe, Petor-Mesopotámia reheguápe penemaldeci hag̃ua.

5Ñanderuete, pende Jára, nohenduséi Balaam ñe’ẽvai; Ñanderuete, Ñandejára, penderayhúgui, omoambue iñe’ẽ ha penemoingo porã (penderovasa).

6Ndapehekaiva’erã peike hag̃ua jekupytýpe hendivekuéra ha mba’eveichagua mba’eporã ndapehekaiva’erã araka’eve ichupekuéra g̃uarã.

7Ani remboyke Edomguakuérape, ha’égui ne pehẽngue; avei ani remboyke Egíptoyguakuérape, peikógui hetãme mbohupa ramo.

8Iñemoñare mbohapyha (generacion) guive oikekuaa Ñanderuete atýpe.

Tesãi rembiapoukapy

9Pesẽ vove peñorãirõ hag̃ua penderehe ija’e’ỹva ndive pejeiva’erã opaite mba’evaígui.

10Oĩ ramo pende apytépe ipotĩ’ỹva oñemongy’águi pyharépe, osẽva’erã pe tekoha okára gotýo, ha ndoikeveiva’erã ipype.

11Ha ka’arupytũme ojahuva’erã, ha kuarahy oike rire oikekuaa jevy pe tekohápe.

12Reguerekova’erã peteĩ yvy pehẽngue pende rekohápe oka gotýo, peho hag̃ua ñanandýpe.

13Reguerekova’erã avei, ne rembiporu ñorãirõ megua apytépe, peteĩ yvyra akua mbykýva; reho ramo ñanandýpe, rejo’ova’erã ipype, ha upégui repu’ãvo rejatyva’erã nde repotikue.

14Ñanderuete, pende Jára, oikógui pende rekohápe pendesalva hag̃ua ha omoĩ hag̃ua pende poguýpe penderehe ija’e’ỹvape; upévagui pende rekoha ipotĩva’erã, ani hag̃ua ha’e ohecha ipype mba’e iky’áva, ha ani hag̃ua Ha’e oñemboyke pendehegui.

Poriahuvereko rembiapoukapy

15Pe tembiguái okañyva’ekue ijáragui oho ramo ne rendápe, nde nereme’ẽ jevyiva’erã ichupe.

16Oikova’erã pende apytépe, pe tenda ha’e voi oiporavo haguépe, peteĩ pende tavakuérape ha’e ohayhuvehápe, ani rejopýtei ichupe.

17Israel rajykuéra apytépe aníke oĩtei kuña heko vaíva ha Israel ra’ykuéra apytépe aníke oĩtei kuimba’e ojoguerekóva kuimba’e ndive (Sodomaygua reko).

18Nderegueruiva’erã Ñanderuete, nde Jára rógape kuña reko vai repykue ni kuimba’e reko vai repykue, mba’eveichagua promésa rupi; ko’ã mokõi mba’e ombopochy Ñanderuete, nde Járape.

19Nderejerureiva’erã Israelguápe ome’ẽve hag̃ua pirapire nde reiporukava’ekuégui ichupe, térã tembi’urã rehe, térã mba’eveichagua ojeporukáva pirapire rehe (interes reheve).

20Pende rehegua’ỹvape pejerurekuaa ome’ẽ hetave hag̃ua peẽme pene mba’e jeporukapyrégui, ne pehẽnguépe katu nderejerureiva’erã interes reheve, Ñanderuete, Ñandejára, nderovasa hag̃ua opaite ne rembiapópe, pe yvy rehohápe reñemomba’e hag̃ua ne mba’erã rehe.

21 Repromete ramo reikuave’ẽ hag̃ua peteĩ kuave’ẽmby Ñanderuete, nde Járape, aníkena hi’are rejapo hag̃ua; añetehápe Ñanderuete, Ñandejára omba’ejeruréta ndéve, ha oikóta angaipa ramo nderehe.

22Ha ndereprometéi ramo mba’eve, nde nereñemoangaipái avei.

23Nde juru oprometeva’ekue rehe katu, reñangarekova’erã rejapopa hag̃ua hekoitépe, reme’ẽ haguéicha ne ñe’ẽ Ñanderuete, nde Járape, ha egueru pe kuave’ẽmby reme’ẽséva ha ejapopa nde juru he’iva’ekue guive.

24Rehasa ramo nde rapicha parralty rupi, re’ukuaa pe parral’a neryg̃uatã meve; neremoĩriva’erã katu nde ajakápe reraha hag̃ua.

25Rehasa ramo nde rapicha kokue rupi, ikatu reipo’omimi nde pópe re’u hag̃uánte, nereikytĩriva’erã kysépe nde rapicha remitỹngue.