Job 30 - Biblia en Guaraní - ?anderuete ?e’? Por? 2015

Job oñembyasy ohasa asyháre

1Ko’ág̃a katu umi imitãvéva chehegui opuka cherehe, ituvakuéra che ndaipotaiva’ekue oñangareko hag̃ua che rymbaita rehe, che rymba jaguakuéra reheve.

2Mba’épepa ikatu ipokuéra chepytyvõ, naimbaretevéima.

3Imboriahu ha iñembyahýigui oikómi desiértope oheka hag̃ua hembi’urã.

4Omono’õmi hikuái málva (peteĩ plánta iróva) ñanandýpe, hembi’urã ramo, ha oheka enébro yvyra’i rapo ho’u hag̃ua.

5Oñemosẽ ichupekuéra yvyariguakuéra apytégui, ha ojeguerosapukái hapykuéri ku mondaha okañýrõ guáicha.

6Oikómi hikuái umi yakã (arróyo) rembe’y ijyvatehápe, umi yvykua ha itakuaguasu oĩha rupi.

7Osapukái hikuái ñanandy pa’ũ rupi ha oñembyaty hikuái umi ñuatĩ rakã guýpe.

8Iñañáva ra’yre ningo hikuái ha kuimba’ekuéra hera’ỹva, tukumbópe oñemosẽ hikuái ambue yvyariguakuéra apytégui.

9Ko’ág̃a che aiko ichupekuéra g̃uarã toryjárõ, opurahéi hikuái oñembohory hag̃ua cherehe.

10Ojeguaru hikuái chehegui, oñemomombyrypa chehegui, ha ndokyhyjéi ondyvu hagua cherehe.

11Nanderuete ojora che guyrapa sã chemokangy hag̃ua, upévare ndojokovéi ijuru ha cheguereko mba’eve ramo.

12Akatúaguio oñemoĩ hikuái cherehe, omyaña che pykuéra añepysãnga hag̃ua ha che rapére ombosako’i hikuái peteĩ ñuhã ha’a hag̃ua ipype.

13Ombotypa hikuái che rape, oñeha’ãmba che ha’a hag̃ua ha ndaipóri avave ojokóva ichupekuéra.

14Ku soldadokuéra oike háicha táva tápia kuára rupi, upeichaite ojeity hikuái cheári.

15Ñemondyiguasu ojapajeréiva ho’a cheári, che rerakuã porã ojei chehegui ku yvytúicha ha che po’a poty ohasa chehegui ku araícha.

16Ko’ág̃a che ánga ojepy’apyete chepype, ha umi jehasa asy ára cherupitýma.

17Pe jehasa asy pyhare pegua ombokua che kanguekuérape ha mba’asy chekarãiva nachemombytu’úi.

18Ipu’aka ombyai che pire, ha chejura che aóicha.

19Ha’e chereity tujúpe, ajoguaite yvy timbo ha tanimbúpe.

20Che Ruete, asapukái asy ndéve ha Nde nerembohováiri chéve, che añembo’y nera’ãrõvo, Nde katu nerema’ẽi cherehe, ha nerepenái cherehe.

21Reñembopy’a hatã chendive, nde po mbaretépe chemuña reikóvo.

22Nde reheja pe yvytu chérupi chehundi hag̃ua.

23Che ningo aikuaa voi Nde cheguerahaseha ñemanorãme, pe óga oñembosako’íva mayma oikovévape g̃uarã.

24Upe ho’yguypotáva ndoipysomo’ãi piko ipo omano mboyve, ndosapukaichénepa ñepytyvõre umi oñehundipotáva.

25Che ndarojahe’óipara’e umi ojepy’apy asývape. Ha che ánga noñembyasýi piko ra’e avei umi imboriahúva rehe.

26Che aha’ãrõ jave mba’eporã, ou mba’evai; ha aha’ãrõ jave ára sakã og̃uahẽ pytũnte.

27Che py’apy iñangekõi ha ndopytu’úi, umi ára che ajepy’apyete hag̃ua cherupitýma.

28Che pire hũmbáma ha ndaha’éi katu kuarahy chejope haguére, apu’ã che retãygua aty pa’ũme asapukái asy hag̃ua.

29Aju aiko hag̃ua jaguarundi ha ñanduguasu irũ ramo.

30Che pire oñemohũ, ha ho’ahína, che rete hakueterei iñakãnundúgui.

31Che mbarakaguasu pu oñembyasy ha che mimby ojahe’o chendive.