2 Crónicas 28 - Biblia en Guaraní - ?anderuete ?e’? Por? 2015

Acaz oiko mburuvichaguasu ramo

1Acaz oguereko 20 áño oñepyrũvo oisãmbyhy ha 16 áño oiko tetã ruvicha ramo Jerusalénpe; ha ndojapói mba’eporã Ñanderuete resa renondépe, ijypykue David ojapo porã haguéicha.

2Oiko uvei Israel retã ruvichakuéra rape rehe, ha ojapouka ta’ãnga mba’eykupyrégui Baálpe g̃uarã.

3Ohapy avei mba’e ryakuã porã Hinom ñemoñarenguéra cerrokuéra pa’ũme, ha ohapy ita’ýrape kuave’ẽmby ramo, umi tetã ambueygua ojapo haguéicha, Ñanderuete omosẽva’ekue Israel ñemoñarenguéra renondégui.

4Upéicha oikuave’ẽ ha ohapy avei mba’e ryakuã porã umi yvy yvateha rupi, umi cérro ykeha rupi, ha umi yvyra ikuarahy’ã porãva guýpe.

5Upévagui Ñanderuete, Ijára, omoĩ ichupe Síria retã ruvicha pópe, ha’e ombopoguy hag̃ua ichupe, oapresa avei heta Judaygua ogueraha hag̃ua Damáscope. Acaz ho’a avei Israel retã ruvicha pópe, ha Israelguakuéra ombopoguy Judayguakuérape.

6Peka, Ramalías ra’y, ojuka peteĩ árape 120.000 Judayguakuéra kuimba’e ipy’aguasúvape, ha’ekuéra opoígui Ñanderuete, ituvakuéra Járagui.

7Upéicha avei Zicri, peteĩ kuimba’e Efraingua imbareteitéva, ojuka Maasías, tetã ruvicha ra’ýpe, ha Azricam, imba’eita ñangarekohárape, ha avei Elcánape oikóva tetã ruvicha mokõiha ramo.

8Israel ñemoñarenguéra ogueraha Juda retãyguakuéragui hembiguairã ramo 200.000 kuñakuéra, mitãkuimba’ekuéra ha mitãkuñakuéra, ha ogueraha avei heta imba’erepy Samáriape.

9Upéramo oiko Samáriape peteĩ Ñanderuete proféta, hérava Obed. Ha’e osẽ oñe’ẽ hag̃ua pe soldádo aty ojevýva Samáriape, ha he’i ichupekuéra: Péina ápe, Ñanderuete, pende rukuéra Jára, ipochýgui Juda rehe omoĩ ichupekuéra pende pópe; ha peẽ pejuka jaheipópe ichupekuéra ha isapukái asy og̃uahẽma yvágape.

10Ha ko’ág̃a peñemoĩ peguereko hag̃ua Juda ha Jerusalengua pene rembiguái ramo; napeñemoangaipái piko ra’e peẽ avei Ñanderuete pende Jára ndive.

11Peẽ, cherendúke ko’ág̃a ha pemondo jevy pene retãyguakuéra peapresava’ekue tembiguái ramo; Ñanderuete pochy ho’a mboyve avei pendeári.

12Upémaramo umi kuimba’e omoakãva Efrainguápe, Azarías, Johanan ra’y; Berequías, Mesilemot ra’y; Ezequías, Salum ra’y; ha Amasa, Hadlai ra’y; oñemoĩ umi ñorãirõhára oúva rehe,

13ha he’i ichupekuéra: Anítei pepyta ápe umi jepokuapýpe oĩva ndive, roñemoangaipátagui avei Ñanderuete ndive g̃uarã. Peẽ peñeha’ã pembojo’ave ore angaipa ári ha ore reko vai ári, tuichaitereíma voi ningo ore rembiapo vai, ha Ñanderuete pochy ho’áta avei Israel ári.

14Upémaramo Israel soldadokuéra opoi umi jepokuapýpe oĩva guive ha ome’ẽmba avei ichupekuéra imba’erepy, imburuvichakuéra ha Israelgua atyguasu resa renondépe.

15Upéi Azarías, Berequías, Ezequías ha Amasa oipytyvõ umi jepokuapy oĩva’ekuépe, ome’ẽ jevy Judayguakuérape ha omonde umi ijopívovape, ombopy rehegua, omongaru, omboy’u ichupekuéra, omona hesekuéra acéite, ha ogueraha búrro ári opaite ikangývape Jerico peve, táva ikaranda’ytýva, hi’ag̃uiete hyke’ykuéragui; uperire ojevypa hikuái Samáriape.

16Umi árape tetã ruvicha Acaz ojerureuka Asíria retã ruvichápe oipytyvõ hag̃ua ichupe.

17Umi Edomgua ou ha ojeity avei Juda ári, ha ogueraha avei heta jepokuapýpe.

18Filisteayguakuéra oñemyasãi avei umi táva ñuguasu rehe ha Juda yvy gotyogua rehe, ha omoĩ ipoguypekuéra Bet-semes, Ajalón, Gederot, Soco, itava’ikuéra reheve; Timna, itava’ikuéra reheve; ha Gimzo, itava’ikuéra reheve, ha oiko ipype hikuái.

19Upéicha Ñanderuete omotĩndy Judápe, Acaz, Juda retã ruvicha rehe; Acaz oiko vaietégui Juda retãme, ha ha’e oñemoangaipágui Ñanderuete renondépe.

20Hi’arikuéra ou avei Tiglat-pilneser, Asíria retã ruvicha, ha ojopy ichupe, oipytyvõ rãngue ichupe.

21Acaz oipe’apa ramojepe mba’erepy Ñanderuete róga pegua, tetã ruvicha róga pegua ha umi mburuvichágui, ome’ẽmba hag̃ua Asíria retã ruvichápe, péva jepeve noipytyvõi ichupe.

22Ha tetã ruvicha Acaz ojejopy vaive ohóvo upe árape, ombojo’a angaipa tuichavéva Ñanderuete ndive g̃uarã,

23oikuave’ẽvo Damásco jarakuérape, umi ipu’akava’ekuépe hese, ha he’i avei: Umi Síria jarakuéra oipytyvõgui ichupekuéra; upévare che aikuave’ẽta avei kuave’ẽmby ichupekuéra chepytyvõ hag̃ua; ha péva ohundiete ichupe, ha opaite Israelguápe hendive avei.

24Ko’ã mba’e ári Acaz ombyaty umi Ñanderuete róga rembiporu ha ojokapa; omboty Ñanderuete róga rokẽ ha omopu’ã kuave’ẽmby rendakuéra Jerusalen ryepýpe.

25Ombosako’i avei ñemomba’eguasu yvy yvate Juda tavakuéra ypýpe, ohapy hag̃ua mba’e ryakuã ambue járape, ha péicha ombopochyve ohóvo Ñanderuete, ituvakuéra Járape.

26Ambue hembiapokue ha hekove reko, iñepyrũmby ha ipaha pegua, ojehai Juda ha Israel retã ruvicha rembiapokuéra kuatiañe’ẽme.

27Acaz omano rire, oñeñotỹ ichupe Jerusalénpe, nomoingéi katu ichupe Israel retã ruvichakuéra tyvýpe; ha hendaguépe oisãmbyhy ita’ýra Ezequías.