Nehemías 6 - Biblia en Guaraní - ?anderuete ?e’? Por? 2015

Mba’evai heñói umi orerehe ija’e’ỹva py’apýpe

1Ha ohendúvo Sanbalat, Tobías ha Gésem, pe Arabiaygua, ha ambue orerehe ija’e’ỹva, che amopu’ã hague pe tápia, ha ndaiporivéima hese ikuamiha (jepémo upéramo ne’ĩra amoĩ gueteri táva rokẽnguéra).

2Sanbalat ha Gesem he’iuka chéve: Ejúna ha ñañembyatymi tava’i Ono ñu meguápe. Ha’ekuéra oguerekókuri iñakãme ojapo hag̃ua mba’evai cherehe.

3Ha amondo hendapekuéra che remimondo he’íva: Che ningo ajapo’aína peteĩ tembiapo tuichaitereíva, ha ndaikatumo’ãi apoívo; ndoikomo’ãigui ko tembiapo kóva aheja ramo aha hag̃ua pene rendápe.

4Ha ombou hikuái che rendápe irundy jevy pe ñe’ẽmondo péva rehe, ha peichaite che ambohovái jevy jey ichupekuéra.

5Upémaramo Sanbalat ombou che rendápe ambue hembiguái, 5 jevyha peteĩ kuatiañe’ẽ reheve,

6ha péicha ojehaíkuri ipype: Oñehendúma tetãyguakuéra apytépe, ha Gasmu he’i avei, nde ha umi Judaygua peñemoĩseha Pérsia retã ruvicha rehe, upevarã pemopu’ãha avei pe táva tápia, ikatu hag̃uáicha, nde reiko Juda retã ruvicha ramo;

7ha remoĩha profetakuéra he’íva avei nderehe Jerusalénpe: Oĩ jevýma tetã ruvicha Judápe. Ha ko ñe’ẽ ohendúvo Pérsia retã ruvicha ipochýta; upévagui ejúna ha ñañomongeta oñondive.

8Upémaramo che ha’euka ichupe: Ndapéichai, ndaha’éi nde ere háicha, nde reguenohẽ reínte nde py’apýgui ko ñe’ẽ kóva.

9Nde oremongyhyjesénte: Orekangyve hag̃ua rohóvo ropoi peve ore rembiapógui ani hag̃ua rojapopa; Ñanderuetépe katu che ha’éma: Che Jára, emombaretékena ko’ã che po.

10Upéi aha Semaías, Delaías ra’y rógape, Mehetabel ra’yre, ha’e oĩgui ñembotyhápe hógape, ha he’i chéve: Ñañembyatýna Ñanderuete rógape, hogaguasu ryepýpe, ha ñamboty porã hokẽnguéra oútagui hína ndejukaséva; ko pyhare kóvape.

11Upémaramo ha’e: Peteĩ kuimba’e cheichagua piko okañýne. Ha cheichaguávapa oikéne Ñanderuete rógape osalva hag̃ua hekove. Ndaikemo’ãi.

12Ha ahechakuaa nomboúi hague ichupe Ñanderuete, he’inteha ko ñe’ẽ proféta gua’u ramo, Tobías ha Sanbalat ome’ẽgui ichupe pirapire.

13Oñeme’ẽgui ichupe pirapire chemongyhyje hag̃uánte, ha añemohembiapo vai hag̃uánte, ikatu hag̃uáicha pévare chemoherakuã vai.

14Nemandu’ákena, che Jaratee, Tobías ha Sanbalat rehe, ko’ã mba’e ojapova’ekue; ha nemandu’ákena avei Noadías, pe profetísa kuña rehe, ha ambue profetakuéra rehe, oñeha’ãva’ekue avei chemongyhyje hag̃ua.

15Ojejapopa katu pe táva tápia, pe ára 25-hápe, pe jasy Elul (Septiémbre) jave ramo, oñemba’apo rire 52 ára.

16Ha péva ohendúvo umi orerehe ija’e’ỹva okyhyjepa, ha oñemomirĩmba hikuái, ohechakuaágui hikuái ko tembiapo kóva ore Jára rupi ae ojejapopa jevy hague.

17Ha umi ára umívape oñemondo avei heta kuatiañe’ẽ Tobíaspe, Judaygua ruvichakuéragui, ha Tobíasgui oúva ichupekuéra.

18Judaygua apytépe oĩ avei heta oñemoĩva orerehe; ijapytépe oĩ Tobías rembireko ru, hérava Secanías, Ara ra’y, ha Tobías ra’y Johanan omendava’ekue Mesulam rajy rehe. Secanías ru ningo Ara, ha Mesulam ru ha’e Berequías.

19Heta Judaygua omombe’u che renondépe Tobías rembiapo porãngue, ha ichupe ha’ekuéra omombe’upa che ñe’ẽngue. Ha Tobías ogueruka jepi umi kuatiañe’ẽ chemongyhyje hag̃ua.