Jeremías 11 - Biblia en Guaraní - ?anderuete ?e’? Por? 2015

Juda opyrũmba iñe’ẽ ome’ẽmava’ekue rehe

1Ñanderuete ñe’ẽ ou Jeremíaspe, ha he’i:

2Pehendúke pe ñe’ẽme’ẽ he’íva, ha pemombe’u mayma kuimba’e Juda ha Jerusalen peguápe,

3ha nde eréta ichupekuéra: Péicha he’i pende Ruete, Israel Jára: Maldíto (ipane) oimeraẽ kuimba’e iñe’ẽrendu’ỹvape ko ñe’ẽme’ẽ kóvape,

4Che ha pende rukuéra roñoñe’ẽme’ẽ aguenohẽ ramoguare ichupekuéra Egípto retãgui, pe tetã ojogua ichupekuéra g̃uarã tatakuápe oñemboyku hag̃ua hiérro, ha Che ha’e ichupekuéra: Peẽ peneñe’ẽrendu ha pejapo ramo Che ha’éva guive peẽme, peikóta chéve che retã ramo, upérõ Che aikóta avei pende Jára ramo;

5ikatu hag̃uáicha ajapopa che ñe’ẽ ame’ẽmava’ekue pende rukuérape; ame’ẽtaha ichupekuéra yvy osyryhápe kamby ha eíra, oĩ háicha ko’ág̃a. Ha che Jeremías ha’e jevy ichupe: Taupéicha, che Jára.

6Ñanderuete he’i chéve: Eikuaauka ko’ã ñe’ẽ Juda tavakuéra ha Jerusalen ryepy rupi, ha ere: Pehendu ko ñe’ẽme’ẽ he’íva, ha pejapopa hekoitépe.

7Amomarandumava’ekue pende rukuérape ko ñe’ẽ kóva rupi aguenohẽ ramoguare ichupekuéra Egípto retãgui, ha apytu’u’ỹre Che ha’e ichupekuéra ymaite guive ko ára kóva peve: Pehendúke che ñe’ẽ.

8Ndojapysakái ha nohendúi, ohónte uvei ipy’a ñañaitéva rapykuéri; upévagui agueru hi’arikuéra opaichagua jehavira ha’emava’ekue guive, upeichavéramo jepe ndojapói hikuái che ñe’ẽ.

9Ha he’ive chéve Ñanderuete: Jerusalengua ha Judayguakuéra ñemiháme oñemoĩ cherehe.

10Oho jevy hikuái ijypykuéra reko ñaña rapykuéri nacheñe’ẽrenduséigui, ha oho hikuái ambue jára rapykuéri oiko hag̃ua hembiguái ramo; Israel ha Juda retãnguéra nomomba’eiete che ñe’ẽme’ẽ, Che ame’ẽmava’ekue ituvakuérape.

11Upévarehe Ñanderuete he’iuka peẽme: Peikuaa porãke, Che aguerúta pendeári mba’evai ha pévagui napesẽmo’ãi pejerure asy ramojepe, Che napohendumo’ãi.

12Upéramo umi Juda tavaygua ha Jerusalengua oje’ói joava’erã ha omba’ejerure asýta ijára gua’ukuérape ha ohapýta imba’e ryakuã porã, upeichavéramo jepe umíva ndosalvamo’ãi ichupekuéra ha noguenohẽmo’ãi ichupekuéra ijehasa asyetégui.

13Juda táva heta háicha upéicha ijára gua’ukuéra avei, ha nde Jerusalen remopu’ã oimeraẽ nde táva cállepe peteĩ kuave’ẽmby renda ambue járape g̃uarã ha upépe peikuave’ẽ mba’e ryakuã porã Baálpe.

14Ha nde Jeremías, ani reñembo’e ko’ã tetãygua rehe, ani rejahe’o ha ani remba’ejerure hesekuéra; Che nahendumo’ãi ojepy’apyha árape omba’ejerure asy ramojepe hikuái chéve.

15Che retã ahayhuetéva, ma’erãpa pehose che rogaguasúpe, ndapepoiséi ramo pene rembiapo vaígui. Peimo’ã piko peẽ ikatu pejoko che jehavirarã pene kuave’ẽmby ha pene rymba ro’okue rupi. Péicha peẽ chembotavyse, peguerohory hag̃uánte.

16 Olívo máta hovyũ asy ha hi’a porãva pende Ruete penerenóiva’ekue. Peñembotuichaiterei haguére katu pende Ruete omyendy tata ohapy hag̃ua hakãnguéra.

17Che, Yvága Atykuéra Jára, roñotỹva’ekue guive ha’éma outaha mba’evai ndeári, nde Israel ha Judayguakuéra peẽ peneñaña ha chembopochy haguére pehapývo mba’e ryakuã porã Baálpe.

Anatotguakuéra ñemiháme oñemopu’ã Jeremías rehe

18Ñanderuete oikuaaukapa voive, ha péicha che aju aikuaa ojejaposeha mba’evai cherehe.

19Che aiko’aína ijapytepekuéra ku ovecha ra’yrusu mba’eve oikuaa’ỹváicha ha ojegueraháva ojejuka hag̃ua, ha che ndaikuaái ojaposeha cherehe mba’evai, he’ígui hikuái: Ñahundi pe yvyra hi’akuéra reheve, oĩva tetãyguakuéra apytépe ha anivéma avave imandu’a héra rehe.

20Ñanderuete, Yvága Atykuéra Jára, Nde reporombojovake hekoitépe ha Nde reikuaa porãmba yvyariguakuéra remiandu, ipensamiénto ha hembipota, ehechaukamína chéve mba’éichapa Nde remyengoviáta hembiapo vai, nde pópe oĩ che rekove.

21Umi kuimba’e Anatot pegua chejukaségui, he’i hikuái: Ani remomarandu (reprofetiza) Ñanderuete rérape oréve g̃uarã, ỹrõ nde remanóta ore po rupi.

22He’ígui hikuái ko’ã mba’e nderehe, Che ha’e: Ahaviráta ichupekuéra; kuimba’e ikaria’ýva omanova’erã kyse pukúpe ñorãirõme, ita’yrakuéra ha itajyrakuéra omanova’erã ñembyahýigui,

23ha ndaiporimo’ãi hembýva ichuguikuéra, Che ahavira vove umi Anatot peguápe, aguerúta mba’evaiete hi’arikuéra.