Ezequiel 17 - Biblia en Guaraní - ?anderuete ?e’? Por? 2015

Ñapykani ha parral

ñe’ẽ mbojoja

1Ñanderuete ñe’ẽ ou chéve, ha he’i:

2Kuimba’e ra’y, embosako’i peteĩ ñe’ẽ porandu ha peteĩ ñe’ẽ mbojoja Israel retãme g̃uarã,

3ha eréta: Péicha he’i pende Ruete: Peteĩ ñapykani ndetuicháva, ipepoguasúva ha hague pukuetereíva ha ipara porãva oúma Líbanope, ha ojapyhy pe cédro rakã ru’ãngue.

4Hokykuéra apytégui oipe’a pe iporãvéva ha ogueraha umi ñemuhára retãme (Babilóniape), ha oñotỹ ichupe peteĩ táva oñeñemuháme.

5Ha ojapyhy avei mba’e ra’ỹingue pe tetãpýgui, ha oñotỹ peteĩ kokue iporãvape oñeñemitỹ hag̃uáme, ha oñotỹ y rembe’ýpe, ha oñangareko hese ku sáuce yvyra rakãicha.

6Ha pe mba’e ra’ỹi heñói, ha oiko ichugui parral máta hakã hetaitereíva ha ikarapéva, ha oipyso hakã pe ñapykani rehe, ha hapo oĩ iguýpe; ha oiko ichugui parral neporãva, ha hoky pyahu heta ha oñemyasãi opárupi.

7Ha oĩve avei ambue ñapykani ndetuicháva, ipepoguasu ha hague hetáva; ha péina ápe ko parral máta kóa omboyke hapokuéra oĩha gotýo péva ha upéicha avei hakãnguéra, ikatu hag̃uáicha oñemohe’õ hi’ýpe.

8Oñeñotỹ kokue iporãitévape, y rembe’ýpe, ikatu hag̃uáicha hakã hi’a porã, ha oiko hag̃ua ichugui parral iporã ha imbaretéva.

9Ere ichupekuéra: Péicha he’i pende Ruete: Osẽ porãnepa, nomondoromo’ãipa ichugui hapo, nombyaipamo’ãipa hi’a ha ndaipirumo’ãipa. Hogue hovyũ porãva ipirupaitéta; ha natekotevẽi heta kuimba’e pu’aka rehe oñemondoro hag̃ua hapokuéra.

10Ha péina oñeñotỹmba riréma, osẽ porãmbánepa. Ndaipirupaichénepa ág̃a oipeju vove yvytu kuarahyresẽguio. Hoky haguépe ipirúta.

11Ha ou chéve Ñanderuete ñe’ẽ, ha he’i:

12Ere ko’ág̃a pe tetã oñemoĩvape cherehe: Ndapeikuaa porãi piko mba’épa ko’ã mba’e he’ise. Ere ichupekuéra: Peikuaa porãke Babilónia retã ruvicha oúta Jerusalénpe, ha ojapyhýta jepokuapýpe ne retã ruvicha ha mburuvichakuérape, oguerahapa hag̃ua Babilónia retãme.

13Ojapyhy peteĩ karai tetã ruvicha rógagui ha ojopy ichupe oñe’ẽme’ẽ hag̃ua, ha oñoñe’ẽme’ẽvo ogueraha hendive umi karaiguasuvéva oĩva guive ko tetãme.

14Juda retã imichĩ hag̃ua tapia ha ani hag̃ua oñakãrapu’ã, ikatu hag̃uáicha oiko pe ñe’ẽme’ẽ ome’ẽva’ekue ichupe, ha opyta hag̃ua ñembo’yhápe.

15Ha opu’ã ñemi uvei hese, ha omondo iñe’ẽrerahaha Egíptope, Egípto retã ruvicha ome’ẽ hag̃ua ichupe kavajueta ha heta soldádo. Osẽ porãnepa, ojesalvánepa upe ojapova’ekue ko’ã mba’e ko’ãva. Upe omboykéva iñe’ẽme’ẽ, ikatúnepa ojesalva.

16Che rekovére, he’i pende Ruete: Ha’e omanóta katuete Babilóniape. Babilónia retã ruvicha ohupiva’ekue ichupe tetã ruvicha guapyhápe, oity jevýta uvei ichupe, ha’e ombotavy haguére ichupe iñe’ẽme’ẽ rupi ha opoívo ijekupytýgui.

17Egípto retã ruvicha, faraon, noipytyvõmo’ãi ichupe isoldádo aty ndetuicha reheve, pe Babilónia retã ruvicha ou ramo omopu’ãta yvy aty ndetuicháva Jerusalen kora itaguigua renondépe, isoldadokuéra ohasa hag̃ua hi’ári ha ojuka hag̃ua heta Jerusalenguápe.

18Juda retã ruvicha opyrũ iñembopy’apeteĩ (ijekupyty) rehe, ha opyrũ haguére iñe’ẽme’ẽ rehe oñehundiva’erã katuete.

19Upévare, péicha he’i pende Ruete: Che rekove rehe, katuete Che ahaviráta ichupe opyrũ haguére ijekupyty rehe ha omboyke haguére iñe’ẽme’ẽ.

20Aipysóta hi’ári che ñuhã, ha ho’áta ipype, ha aguerukáta Babilóniape, ha upépe ambojovakéta ichupe ndache’apóigui mba’eve ramo ha opu’ãgui cherehe hikuái.

21Ha opaite isoldádo iporãvéva ojejukáta, ho’apáta kyse puku rupi, ha umi hembýva katu oñemosarambipáta irundyve yvytu rehe; peikuaa hag̃ua Che ha’eha pende Jára, ha Che añe’ẽmbáma hague ko’ã mba’e ko’ãva rehe.

22Péicha he’i pende Ruete: Che ajapyhýta pe cédro ijyvatetéva rakã ha aikytĩta añotỹ hag̃ua pe cérro yvate ha iporã asývape.

23Péva añotỹta Israel cérro yvatetépe omyasãi hag̃ua hakãnguéra, hi’áta ha oikóta ichugui peteĩ cédro neporãmba jepéva; ha ijatýta hese opaichagua guyrakuéra oiko hag̃ua ikuarahy’ãme.

24Ha mayma yvyra ñu rupigua oikuaáta Che, pende Ruete, aity hague pe yvyra iporãitévape, ha amopu’ã hague pe yvyra ikarapévape, ha ambopiru hague pe yvyra hovyũvape, ha amohovyũ hague pe yvyra ipirumava’ekuépe. Che, pende Ruete, ha’epamava’ekue guive, katuete ajapopáta avei.