Nehemías 13 - Biblia en Guaraní - ?anderuete ?e’? Por? 2015

Nehemías omosẽ umi tembirekokuérape ndaha’éiva Israelgua imembykuéra ndive

1Pe ára pévape oñemoñe’ẽ jave Moises kuatiañe’ẽ ohendu joa umi Amongua ha Moabgua ndoikeiva’erãha araka’eve Ñanderuete rogaguasúpe (Deuteronómio 23,4-6).

2Nosẽi haguére hikuái oipytyvõ Israel ra’ykuérape pan ha y reheve; ha ome’ẽ haguére hikuái pirapire Balaámpe omaldeci hag̃ua ichupekuéra; Ñanderuete katu omyengoviava’ekue pe maldicion jehovasápe.

3Ha ohendupávo hikuái pe tembiapoukapy, ha’ekuéra omboyke opaite tetã ambueygua omendamava’ekue Israelgua rehe.

4Ko’ã mba’e mboyve, pa’i Eliasib oiko Ñanderuete róga kotykuéra (depósito) rerekua ramo, oñemopehẽnguéma Tobías rehe,

5ha omonandi peteĩ koty tuicháva Tobíaspe g̃uarã, oñeñongatu haguépe kuave’ẽmbynguéra, mba’e ryakuã porãva, umi tembiporu, umi koga’a diezmoguiguáva, víno ha acéite, umi me’ẽmby umía rehe oje’émagui oñeme’ẽ hag̃ua Leviguakuérape, umi opurahéivape, umi okẽ ñangarekoharakuérape ha pa’ikuérape g̃uarã ikuave’ẽmby ramo.

6Upejave naiméikuri Jerusalénpe, ahágui Artajérjes, Babilónia retã ruvicha rendápe, ha’e oisãmbyhy aja 32áño ha ag̃uahẽ aremi rire ajerure tetã ruvichápe,

7aju jevy hag̃ua Jerusalénpe; upéramo ae aikuaa pe mba’evaiete Eliasib ojapova’ekue Tobíaspe g̃uarã, ome’ẽvo ichupe g̃uarã peteĩ koty Ñanderuete róga yke peguáva,

8ha péva chemoñeko’õietégui, amombopa Tobías rembiporukuéra okápe.

9Upéi amopotĩukapa pe koty, ha amoinge jevy ipype Ñanderuete róga rembiporukuéra, umi kuave’ẽmby ha mba’e ryakuã porã.

10Ha aikuaa avei noñeme’ẽvéi hague Leviguakuérape hembi’urã, ha upévare umi Levigua ha umi opurahéiva Ñanderuete rogaguasúpe opoi hembiapógui, ha peteĩteĩva oho ijyvy pehẽngueteépe omba’apo hag̃ua.

11Upéramo amongavaju umi mburuvichápe ha’évo: Mba’érehe piko ojeheja rei Ñanderuete róga rembiapo; ha ambyatypa jevy ichupekuéra ha amoĩmba jevy ichupekuéra hembiapópe.

12Ha opaite Judaygua ogueru joa idiézmo ikóga ra’ỹigui, ivíno ha ijacéitegui, umi koty oñeñongatupahápe.

13Ha imburuvicha ramo amoĩ pa’i Selemíaspe ha kuatia haihára ramo Sadócpe, ha umi Levigua apytégui aiporavo Pedaíaspe; ha ipytyvõhára ramo amoĩ Hanan, Zacur ra’ýpe, Matanías ra’yrépe; ojererekógui ichupekuéra hekoite peguáva ramo, ha’ekuéra omboja’o ha ome’ẽ hag̃ua iñirũnguérape hi’upyrã.

14Nde, che Jára, nemandu’ákena cherehe, ha ko’ã mba’e hekoitépe ajapóva rehe, ha ani rembogue rei che rembiapo poriahuvereko pegua ajapova’ekue che Jára rogaguasúpe, ha hesehápe che añeha’ãmbava’ekue.

15Ha umi ára umívape ahecha oĩha mbovymi Judápe ohykue’óva ivinorã pytu’uha árape, umi oguerojáva itrígo háse, ha umi ohupíva ivíno hymba búrro ári, parral’a, hígo (yva) ha heta ambue mba’e, ha ogueru hikuái Jerusalénpe pytu’uha árape ovende hag̃ua, upévare che amongavaju ichupekuéra anive hag̃ua ojapo ko tembiapo kóva pytu’uha árape.

16Ha oĩ avei umi Tiroygua oguerúva pira ha opaichagua mba’erepy ovende hag̃ua avei pytu’uha árape Juda ha Jerusalenguakuérape.

17Ha aja’o Judaygua mburuvichakuérape ha ha’e ichupekuéra: Mba’eichagua mba’evai piko pejapóva, péicha pemongy’a pe pytu’uha árape.

18Upeichaite pende rukuéra ojaporaka’e avei ha upévare Ñanderuete ogueru ko’ã mba’evai ñandeári ha avei ko táva kóva ári. Pembojo’aseve piko Ñanderuete jehavira Israel ári, pemongy’ave pehóvo pe pytu’uha árape.

19Upéramo ambotyuka Jerusalen rokẽnguéra og̃uahẽ mboyve pe pytu’uha ára, ha ha’éma avei ichupekuéra ani hag̃ua ojepe’avétei pytu’uha árape; ha amoĩ umi okẽme che rembiguaikuérape, ani hag̃ua oñemoingétei mba’eveichagua cárga pytu’uha árape.

20Upéicha umi ñemuhára opyta okápe peteĩ térã mokõi jevy ohasa peve pe pytu’uha ára opaite imba’erepyeta reheve.

21Ha che ha’e ichupekuéra: Mba’upéiko pepyta táva tápia rokẽguasu renondépe. Péicha pejapo jevy ramo, poapresaukáta. Ha upete guive ndouvéi hikuái pytu’uha árape.

22Ha che ha’e umi Leviguápe oñemopotĩ ha oñangareko hag̃ua okẽnguéra rehe, ha omboarete hag̃ua pe pytu’uha ára. Ha ko’ã mba’e rehe, Nde, che Jára nemandu’a avei cherehe, ha cheperdona avei nde poriahuvereko tuichaite rupi.

23Ha umi ára umívape ahecha avei Judayguakuéra omendamava’ekue kuña Asdodguáva, Amongua ha Moabguáva rehe,

24ha ita’ýra mbytere rasa oñe’ẽ Asdod ñe’ẽ, noñe’ẽkuaáigui Judayguakuéra ñe’ẽ, oñe’ẽgui hikuái isy ñe’ẽmente.

25Ha aja’o ichupekuéra, ha amaldeci ichupekuéra, ainupã hetápe, ha añakãrague’o, ha amongavaju pohýi ichupekuéra, ha’évo: Napeme’ẽiva’erã pende rajykuéra ita’yrakuérape, ni ndapegueruiva’erã itajyrakuéra pende ra’ykuérape g̃uarã, térã pene mba’erã ramo.

26Péicha rupi Salomon, Israel retã ruvicha oñemohembiapo vaiva’ekue avei. Jepémo ndaiporiva’ekue mamove peichagua tetã ruvicha ha Ijára ohayhu ichupe, ha Ñanderuete omoĩ ichupe tetã ruvicha ramo Israel ári, ha péicharupi umi tetã ambueygua kuñáva omombia avei ichupe Ñanderuete rapégui.

27Ha ko’ág̃a rohendu peẽ pejapoha avei ko’ã mba’evaiete Ñanderuete ndoipotáiva, pemenda ha pemomenda tetã ambueygua kuñáre.

28Ha peteĩ Joiada ra’ýpe, pe pa’i guasu Eliasib ra’yre, che amosẽ che ypýgui omenda haguére Sanbalat rajy rehe. Sanbalat peteĩ Horongua.

29Che Jára, nemandu’amína hesekuéra omongy’a haguére ipa’i reko ha pe ñembopy’apeteĩ rehe umi Levigua ha pa’ikuéra oguerekóva nendive.

30Péicha che aipe’apa ijapytégui opaichagua tetã ambueyguáva ha amohenda ichupekuéra hembiapoteépe,

31ha che ha’euka avei araka’épa ojegueruva’erã pe jepe’a kuave’ẽmby rendápe g̃uarã ha avei ikoga’a tenondeguáva.