1Ejeity ha eguapy yvy timbópe, Babilónia kuñataĩ. Eguapy yvýpe, mburuvicha guapyha’ỹre, Caldeaygua rajy; araka’eve ndoje’eveimava’erã nderehe kuñataĩ kyrỹi asy ha oñemokunu’ũva.
2Emongu’i trígo angu’ápe; eipe’a ne akãhoja ha tojekuaa ne akã rague, ehupi nde sái ta’inandi ne retyma, rehasávo ysyry rupi.
3Eñemboi, ojehecha hag̃ua ndeopioha, retĩ hag̃ua; Che amyengoviáta ne rembiapo vaikue ha ndaiporimo’ãi avave chejokokuaáva.
4Yvága atykuéra Jára, Israel Jára, ojapopáta ko’ã mba’e ko’ãva nderehe.
5Eguapy, kirirĩháme iñypytũháme, nde Caldeaygua rajy; araka’evéma nereñemboheramo’ãvéima tetãnguéra ruvichaguasu.
6Chepochy che retã ndive, ha amongy’a che mba’etee, ha amoĩra’e nde pópe; ha ndereporiahuverekoséi avavépe; ne cangálla ipohyietereígui umi itujávape g̃uarã.
7Ereva’ekue: Tapiaite g̃uarã aikóta mburuvichaguasu ramo; ha nderejepy’amongetái ko’ã mba’e ko’ãva rehe, ha nanemandu’ái ne renonderã rehe.
8Ehendúke, ko’ág̃a, ko’ã mba’e nde kuña reko vai, nde reguapýva guapyha guasúpe kyhyje’ỹre, ha eréva nde py’apýpe: Chénte aiko, ha ndaipóri avave che ykére, ndapytamo’ãi mena’ỹ rehe, ha ndaikuaamo’ãi mba’épa he’ise peteĩ sy opytáva imemby’ỹre.
9Ko’ã mokõi mba’e ojehúta ndéve reha’ãrõ’ỹre, peteĩ araitépe repytáta ne memby’ỹre ha ne mena’ỹre; rejapóta ramo jepe heta paje ha encánto.
10Nde rejerovia voi ne ñaña reko rehe, ha ere avave ndacherechái, ne arandu ha umi mba’e reikuaáva katu nembotavy, ha nde py’ápe eréra’e: Chénte aiko ha ndaiporivéima avave che ykereguáva.
11Nde ári oúta katuete mba’evai, ndereikuaamo’ãi mamóguipa og̃uahẽ; nde ári angekõi vai oúta ndaikatúiva remboyke nde paje rembiapo rupi ha pe mba’evai nehundíta katuete, nde rehupitýta umi mba’e reikuaa’ỹva ha reha’ãrõ’ỹva.
12Eñeha’ãke nde remboyke hag̃ua ne ñembo’e vai ha nde paje rembiapo rejapóva ne mitãrusu guive, ha jahecháta nepytyvõnepa térã nde remboykekuaánepa umi mba’evai og̃uahẽtava ndéve.
13Reñemokane’õ reheka hag̃ua umi nerekombo’ekuaávape. Tou ko’ág̃a ndesalva hag̃ua umi oma’ẽva ára rehe oikuaa hag̃ua henonderã, umi mbyja rehe oma’ẽva ha umi oma’ẽva jasy pyahúre.
14Pema’ẽ porãke, umía oiko ku yvyra rogue pirukuéicha; tata ohapypáta ichupekuéra ha’ekuéra ndosalvamo’ãi hekovekuéra jepe tata rendýgui; ndaipóri ningo tatapỹi rendy añeteguáva ojepe’e hag̃ua térã ombojy hag̃ua hembi’urã.
15Péicha ojehúta umi nemokane’õite hague reheve ha umi oñemuva’ekue nendive ne mitãrusu guive; peteĩteĩ ohóta hapekuéra rehe ha ndaiporimo’ãi peteĩnte jepe ikatúva nepytyvõ.
Who We AreWhat We EelieveWhat We Do
2025 by iamachristian.org,Inc All rights reserved.
