Hebreoyguakuérape 11 - Biblia en Guaraní - ?anderuete ?e’? Por? 2015

Pe jerovia añetegua

1Jerovia ningo he’ise jahupitytaha katuete umi mba’e ñaha’ãrõvañaína, ha he’ise avei ndajahechái ramojepe mba’eve, nañandepy’a mokõiri, jaikuaa porãgui (umi mba’e Ha’e oprometemava’ekue, katuete oikotaha avei).

2Koichagua jerovia rupi ñande ypykuéra ojeroviava’ekue ombovy’a ha ombotuicha hag̃ua Ñanderuetépe, ha upévare Ha’e ombotuicha avei ichupekuéra.

3Jerovia rupi jaikuaa porã Ñanderuete ojapo hague iñe’ẽ rupi ko yvy ha yvagakuéra (univérso), upéicha opaite mba’e ñande jahecháva guive ko’ág̃a, Ñanderuete ojapomava’ekue ojehecha’ỹvagui, (Génesis 1).

4Abel ojeroviágui oikuave’ẽ peteĩ kuave’ẽmby iporãvéva Caíngui, upévare Ñanderuete he’iva’ekue Abel rehe: Ha’eha peteĩ heko potĩva ha Ha’e ovy’a ikuave’ẽmby reheve. Koichagua jerovia porã rupi Abel oñe’ẽ gueteri (ñandéve), omanóma ramo jepe (Génesis 4,4; Matéo 23,25).

5Enoc ojerovia haguére ojehupi ichupe yvágape, ha ndojejohuvéi ichupe (yvy ape ári), Ñanderuete oguerahágui ichupe. Ha Ha’e ndoipotái Enoc omano, upévare ohupi ichupe, oñemyasãi hag̃ua avei ha’e ombopy’arory hague Ñanderuetépe, (Génesis 5,24).

6Ndajajeroviái ramo nañambopy’arorýi Ñanderuetépe; umi og̃uahẽva hendápe ojeroviava’erã Ñanderuete oĩha, ha Ha’e ohepyme’ẽtaha umi ohekávape ichupe.

7Noe ojerovia haguére ombotuicha Ñanderuetépe ha iñe’ẽrendúgui ojapo pe barcoguasu osalva hag̃ua hogayguakuérape, ndohechái ramojepe mba’eve; ha’e oguerovia Ñanderuete ñe’ẽ katuete oikotaha (pe amaguasu). Ijerovia rupi Noe ombojovake tetãyguakuérape ha ijerovia rupi oiko ichugui peteĩ hekopotĩva (Génesis 6,8-22; Romayguakuérape 4,20).

8Abraham ojeroviágui iñe’ẽrendu Ñanderuetépe he’i ramoguare ichupe oho hag̃ua peteĩ tetãme, oñeme’ẽtaha ichupe; ha Abraham osẽ, ndoikuaái ramojepe mo’õitépa og̃uahẽta, (Génesis 12,1-4).

9Abraham ojeroviágui oiko tetã ambueygua ramo pe tetã Ñanderuete oprometeva’ekuépe ichupe; ha’e oiko peteĩ yvy pehẽnguépe, ndaha’éiva gueteri imba’eteéva, ha hóga rymba pirekueguiguávape oiko Isaac ha Jacóbo ndive, ko’ãvape oñeme’ẽ avei ko promésa kóva, (Génesis 26,3; 35,12).

10Abraham ojeroviágui oha’ãrõ og̃uahẽtaha pe tavaguasúpe Ñanderuete voi ombosako’i ha omopu’ã ipyenda mbaretéva ári.

11Ojeroviágui Sára, ndaikatúiva imemby, ha ig̃uaig̃uieterei ramojepe, imbarete jevy imemby hag̃ua, ha Abraham oguerovia haguére Ñanderuete ojapotaha pe oprometeva’ekue ichupe.

12Upévare Abraham itujaitereíma ramojepe ita’yra hag̃ua, uperire iñemoñare hetaiterei ku jasytatáicha oĩva árare, ha yvyku’i yguasu rembe’y peguáicha, ndaikatúiva ojepapa.

13Ko’ãva omanomba ohupity’ỹre opaite mba’e Ñanderuete oprometeva’ekue, opáichavo ijerovia rupi ohechava’ekue mombyry guive umi mba’e, ha jeroviapópe oñemomirĩ ha oiko mbohupa ha tetã ambueygua ramo ko yvy apére (Deuteronómio 34,1-8).

14Umi he’íva koichagua ñe’ẽ ohechaukahína ohekataha gueteri hikuái hetãteerãva.

15Imandu’a rire hetãngue osẽ haguégui rehe, oguerekova’erãmo’ã tiémpo ojevy hag̃ua.

16Ko’ág̃a katu ha’ekuéra oipota peteĩ tetã iporãvéva, pe yvága pegua, upévare Ñanderuete notĩri oiko hag̃ua Ituvatee ramo, Ha’e voi ombosako’íma avei itavaguasurã.

17Abraham ojeroviágui oikuave’ẽ Isaácpe, ita’ýra ha’eñomi, orecebimava’ekue promesa rupi Ñanderuete oha’ã ramoguare (oprova ramoguare) ijerovia,

18ha Ha’e opromete Abraham oguerekotaha hetaiterei ñemoñarenguéra, Isaac rupi.

19Abraham ningo ohechakuaa, Ñanderuete ikatuha omoingove jevy Isaácpe, omanóma ramojepe, upévare oñeme’ẽ jevy ichupe Isaácpe opyta hag̃ua (ñandéve g̃uarã) ñe’ẽ ñembojoja ramo, (Juan 3,16; 1 Tesalonicayguakuérape 4,14-16).

20Isaac ojeroviágui ohovasa Jacóbo ha Esaúpe, oñe’ẽvo umi mba’e uperire g̃uarã rehe.

21Jacóbo ojeroviágui omanombotávo ohovasa Jose ra’y mokõivévape, ha omomba’eguasu Ñanderuetépe, ojejokóvo ijyvyra po’i rehe.

22Jose ojeroviágui omanombotávo omomandu’a Israelguakuérape osẽva’erãha Egíptogui, ha he’i pe ojejapova’erãva ikanguekuégui.

23Upéicha avei Moises onace rire, itúva ha isy ojeroviágui, oñomi ichupe mbohapy jasy aja, ohechágui ha’e peteĩ mitã iporãitéva, upévare ndokyhyjéi avei omboyke hag̃ua tetã ruvicha rembiapoukapy, naiñe’ẽrendúivo ichupe.

24Moises ojeroviágui, okakuaa rire ndoikosevéima faraon rajy membykuimba’e ramo,

25oiporavo uvei ohasa asy hag̃ua Ñanderuete retãyguakuéra ndive, oiko porã rãngue areve vy’apópe angaipa poguýpe.

26Moises ohechakuaa Hesu Crísto jehasa asy iporãveha ichupe g̃uarã Egípto mba’erepýgui, ha’e oikuaa porãgui Ñanderuete omyengoviapataha ichupe.

27Moises ojeroviágui oheja Egípto, ha ndokyhyjéi hetã ruvicha pochy rendýgui; ha’e ojejoko uvei Ñanderuete rehe ojehechaukava’ekue ichupe.

28Moises ojeroviágui oñepyrũ omboarete pe páscua ha omonauka ovecha ruguýpe Israel róga rokẽnguéra jerekuévo, ani hag̃ua pe yvága rembiguái opoko hesekuéra, ojuka jave umi Egiptoygua ra’ykuéra ypykuépe, (Éxodo 12,7).

29Moises ojeroviágui ohasa pe yguasu mbyte rupi yvy ikã ramoguáicha, ha Egiptoyguakuéra ohasasévo avei ojahogapa hikuái.

30Jerovia rupi Jerico tapiakuéra ho’apa, Israelguakuéra ojere rire ijerekuévo 7 ára (oje’e haguéicha ichupekuéra),

31Rahab, peteĩ kuña reko vai, ojeroviágui nomanói iñe’ẽrendu’ỹva ndive, omog̃uahẽ porãgui hógape mokõi Israelguakuéra rembijokuáipe (pyraguépe), oma’ẽ ñemíva Jerico táva rehe.

32Ha mba’épa ha’evéta. Mbykýma chéve pe tiémpo añe’ẽve hag̃ua Gedeon rehe, Barac rehe, Sanson rehe, Jefte rehe, David rehe, Samuel rehe ha ambue profetakuéra rehe.

33Jerovia rupi Israelguakuéra ombopoguyva’ekue ambue tetãnguérape, oporombojovake hekópe, ohupity Ñanderuete oprometeva’ekue ichupekuéra, ombotyva’ekue leõ jurukuéra,

34ombogue tata mbarete, okañy kyse pukúgui, ikangypa ramojepe oñemombarete, ikatupyry hag̃ua ñorãirõ rembiapópe ha omokañy hag̃ua hese ija’e’ỹva ñorãirõhára atýpe.

35Oĩva’ekue kuñakuéra ovy’a jevyva’ekue, oñeme’ẽ jevy haguére ichupekuéra hogaygua omanova’ekue. Oĩ katu avei umi oñembohasa asyva’ekue ojejuka peve, ndopoíri katu ijeroviágui, oha’ãrõgui ohupity hag̃ua pe tekove pyahu iporãvéva.

36Ambuekuéra rehe oñeñembohory ha oñenupã vai tukumbópe, ha oñeñapytĩ rire omoinge ichupekuéra cárcelpe.

37Ambuekuérape ojejuka itápe, oñekytĩ hete mbyte rupi, ojejuka kyse pukuetépe, ambuekuéra oñemondévo ovecha ha kavara pirekuépe oiko oguata ágotyo pégotyo, ohasa asy hikuái, ojejopy vai ha oñembohasa asy ichupekuéra,

38ha’ekuéra oiko kañyháme desiérto rupi, cérro rupi, yvykuápe ha itakuaguasúpe. Ko múndo (tetãnguéra) nomerecéi ha’ekuéra oiko hag̃ua ijapytepekuéra.

39Ha opaite ko’ãva ombovy’a ramojepe Ñanderuetépe ijerovia rupi, ndohupitýi gueteri ipromésa.

40Ñanderuete ombosako’íma ñandéve g̃uarã peteĩ mba’e iporãvéva, Ha’e oipotágui ha’ekuéra ohupity avei ñanendive ko mba’e iporãvéva.