1 Réyes 16 - Biblia en Guaraní - ?anderuete ?e’? Por? 2015

1Ha ou Ñanderuete ñe’ẽ Jehu, Hanani ra’ýpe, Basápe g̃uarã, ha he’iuka ichupe:

2Che romopu’ã yvy timbógui ha romoĩ mburuvichaguasu ramo che retã Israel ári, nde katu reiko Jeroboam rape rehe, ha remoangaipa avei che retã Israélpe, chembopochy hag̃ua ne angaipakuéra rupi.

3Eikuaa porãke, Che ahundíta nde ra’ykuéra ha nde rogaygua ra’ykuérape, ahundi haguéicha Jeroboam, Nebat ra’y rogayguakuérape.

4Basa rogaygua omanóta táva ryepýpe jaguakuéra ho’úta, ha umi omanóva ñúme guyra yvate ovevéva ho’úta.

5Ambue Basa rembiapo ojapova’ekue guive, ha herakuã ojehaipa Israel retã ruvichakuéra rembiapokue kuatiañe’ẽme.

6Ha Basa omano rire oñeñotỹ ichupe Tirsápe, ha ita’ýra Ela oisãmbyhy hendaguépe.

7Ñanderuete oñe’ẽ pohýi pe proféta Jehu, Hanani ra’y rupi, Basa ha hogayguakuéra rehe, ojapógui heta mba’evaiete Ñanderuete resa renondépe, ha upévarupi ombopochy ichupe ha Ñanderuete ohundi ichupe ojapo haguáicha Jeroboam rogayguakuérape.

Ela ha Zimri

8Asa, Juda retã ruvicha, ombotývo 26 áño, Ela, Basa ra’y, oñepyrũ oisãmbyhy Israélpe Tirsápe; ha’e oisãmbyhýnte mokõi áño.

9Ha hembiguái Zimri, péva iñorãirõ cárro aty mbytere ruvicha opu’ã ñemi hese, ha Ela oĩ jave Tirsápe, Arsa imba’e ñangarekohára rógape heta omokõ, oka’u peve,

10Zimri ou oikutu ha ojuka ichupe; Asa, Juda retã ruvicha ombotývo 27 áño, ha Zimri oisãmbyhy Ela rendaguépe.

11Ha Zimri oisãmbyhy ha oguapýma ramo Israel guapyhaguasúpe ojukapaite Basa rogayguakuérape, oheja’ỹre avavete, hogaygua ni iñamigokuéra apytégui.

12Péicha Zimri ohundiete opaite Basa rogayguakuérape, Ñanderuete he’i haguéicha Basa rehe, iproféta Jehu rupi,

13Basa ha ita’ýra Ela, oñemoangaipa ha omoangaipa haguére Israelguakuérape, ijára gua’u ñemomba’eguasu rupi.

14Ha ambue Ela rembiapokue ojapova’ekue guive ojehaipa Israel retã ruvichakuéra rembiapokue kuatiañe’ẽme.

15Asa, Juda retã ruvicha, oisãmbyhy ramo 27 áño, Zimri oñepyrũ oisãmbyhy, ha oisãmbyhýnte 7 ára Tirsápe, hetãyguakuéra opyta jave Gibeton ypýpe ojeity hag̃uáicha Filisteayguakuéra ári.

16Ha hetãyguakuéra oĩva Gibeton ypýpe ohendúvo Zimri opu’ã ha ojuka hague tetã ruvichápe, upémaramo opaite Israelgua omoĩ tetã ruvicha ramo Israel ári Omrípe, péva isoldádo aty ruvicha.

17Ha Omri ojupi Gibeton guive, Israelgua atyguasu reheve, omongora hag̃ua Tirsápe.

18Zimri ohechávo itáva ho’ataha Omri pópe, oho oike tetã ruvicha rogaguasúpe, ha ombojepota hese tata ha’e oĩ jave hyepýpe ha péicha omano.

19Ko’ã mba’e ojehu Zimri rekovépe, ha’e oñemoangaipa haguére Ñanderuete resa renondépe ha oiko haguére Jeroboam rape rehe, ha avei omoangaipa haguére Israelguakuérape.

20Ha Zimri rembiapo rembyre ha iñepu’ã ojapova’ekue, ojehaipa Israel retã ruvichakuéra rembiapokue kuatiañe’ẽme. (Crónicaspe)

Omri oisãmbyhy

21Upéramo Israel retãyguakuéra oñemboja’o jevy mokõi atýpe, peteĩ atyguasu oho Tibni, Ginat ra’y rapykuéri ha omoĩse ichupe Israel retã ruvicha ramo; ha ambue atyguasu oho Omri rapykuéri.

22Ha tetãyguakuéra ohóva Omri rapykuéri hetave umi ohóva Tibni, Ginat ra’y, rapykueriguágui, ha ombopoguy ichupekuéra ha Tibni omano, péicha Omrínte oiko tetã ruvicha ramo.

23Asa, Juda retã ruvicha oisãmbyhývo 31 áño, Omri oñepyrũ oisãmbyhy Israel ári, ha oisãmbyhy 12 áño. Omri oisãmbyhývo 6 áño Tirsápe,

24ha’e ojogua Sémergui, Samária cérro, 98 kílo pláta rehe, ha omopu’ã peteĩ táva pe cérrope ha ombohéra Samária, onohẽva Sémer, pe cérro jarakue réragui.

25Ha Omri ojapo mba’e ivaietéva Ñanderuete resa renondépe, hembiapo ivaieteve opaite ambue tetã ruvicha oisãmbyhyva’ekuégui ha’e mboyve.

26Oiko avei opaite Jeroboam, Nebat ra’yre rape rehe, ha omoangaipa avei Israélpe, péicha ombopochy Ñanderuetépe, ijára gua’u ra’ãnga ñemomba’eguasu rupi.

27Ambue tembiapo Omri ojapova’ekue guive ha ipy’aguasu oiporuva’ekue, ojehaipa Israel retã ruvichakuéra rembiapokue kuatiañe’ẽme.

28Ha Omri omano rire, oñeñotỹ ichupe Samáriape, ha ita’ýra Acab oisãmbyhy hendaguépe.

Acab oisãmbyhy

29Asa oisãmbyhývo 38 áño Juda retã ruvicha ramo, Acab, Omri ra’y, oñepyrũ oisãmbyhy Israel retãme.

30Ha Acab oisãmbyhy Israel retãme, Samáriape, 22 áño. Ha Acab, Omri ra’y, ojapo mba’evaiete Ñanderuete resa renondépe, ivaieteve mayma tetã ruvicha ha’e mboyve oisãmbyhyva’ekuégui.

31Ivevuieterei ichupe oiko Jeroboam, Nebat ra’y angaipápe, hi’ári oñemohembireko Jezabel rehe, Et-baal, Sidonguakuéra retã ruvicha rajy rehe, ha oiko Baal rembiguái ramo, omomba’eguasúvo ichupe.

32Ha omopu’ã peteĩ kuave’ẽmby renda Baálpe, Baal tupãópe, ha’e omopu’ãva’ekue Samáriape.

33Acab ojapo avei peteĩ Asera ra’ãnga, péicha Acab ojapo vaive mayma Israel retã ruvichágui oisãmbyhyva’ekue ha’e mboyve guarégui, ombopochy hag̃ua Israel Járape.

34Acab rekovépe Hiel, peteĩ Bet-elgua, omopu’ã jevy pe táva Jerico; ita’ýra ypykue Abiram rekove repykue rehe, oñepyrũ omopu’ã pe táva Jerico, ha ita’ýra Segub, pe imitãvéva rekovekue rehe, omoĩ pe táva rokẽ Ñanderuete ñe’ẽ he’i haguéicha Josue, Nun ra’y rupi, (Josue 6,26).