Isaías 44 - Biblia en Guaraní - ?anderuete ?e’? Por? 2015

Ñanderuete añoiténte pe Jára añeteguáva

1Ha ko’ág̃a nde, Jacóbo, che rembiguái, ejapysaka porã nde Israel, Che voi roiporavova’ekue.

2Péicha he’i nde Ruete, nde apohare, nde’apova’ekue nde sy ryépe, Che ha’e ne pytyvõhára: Ani rekyhyjétei, nde Jacóbo, che rembiguái, nde Jesurun, Che aiporavomava’ekue.

3Che añohẽta y yvy ijy’uhéiva ári, ha ambosyrýta y yvy ikãha rupi, Che añohẽta che Pytu Porãite ne mitãkuéra ári ha che jehovasa ne ñemoñarenguéra ári.

4Heñói joáta kapi’i ku yvyra sáuceicha y rembe’ýpe oĩvaicha.

5Upérõ peteĩ he’íta: Che, Ñanderuete mba’e; ha ambue ogueraháta Jacóbo réra, ha ambueve katu ohaíta ipóre: Ñanderuete mba’e, ha ovy’a hikuái omyasãivo Israel Jára réra.

6Péicha he’i pende Ruete, Israel retã ruvichaguasu, ipytyvõhára ha yvága atykuéra Jára: Che ha’e pe Tenondegua, Che ha’e pe Ipahapegua, ha che ykére ndaipóri ambue Jára.

7Ha mávapa oñembojojáta cherehe. Tosẽ ha’e, tojehechauka ha’e, toñe’ẽ ha’e, mávapa omombe’u iñepyrũmby guive umi mba’e ojehútava tenonderãme.

8Ani pekyhyjétei, ha ani pendepy’amirĩtei, nahendukáipa ndéve ymaite guive, ha peẽ voi che renduhare ha’évo ndéve: Ndaipóri ambue jára che ykére. Ndaipóri ambue pendesalváva; ndaikuaái peteĩminte jepe.

Upe ojeroviáva ta’ãnga rehe itavy

9Umi ojapóva ijára gua’u ra’ãnga ojapo mba’e rei meme, ojepotaite ramo jepe, umi ta’ãnga apohare oikuaa voi hembiapokue ndohechái ha ndoikuaaiha mba’eve.

10Upe ojapóva ijára gua’u, térã upe ombohykúva ha’ãnga, oikuaa porã voi noipytyvõmo’ãiha avavépe.

11Peikuaa porãke, umi ojeroviáva guive hese otĩta, yvyarigua voígui ijapohare. Toñembyatypa ha ou joa ramojepe hikuái, oñemondyipáta ha peteĩteĩ oñemotĩta hikuái.

12Pe hiérro rehe omba’apóva ojapyhy itenáza, omba’apo tatapỹi rendýpe, imartíllope ojapo pe ta’ãnga, ha omba’apo hese ipyapy mbaretekuépe; upéi iñembyahýi ramo, ikangypa; ha ndoy’úi ramo ipy’amano.

13Pe yvyra rehe omba’apóva oipyso inimbo, ilápizpe ohai pe ta’ãnga, omopererĩ ha omosỹi icepíllope omoha’ãnga hag̃ua peteĩ kuimba’e ra’ãnga iporãvaicha, upéi omoĩ itupãópe.

14Ojapo hag̃ua ijára ra’ãnga oho oikytĩ cédro, ha ojapyhy avei cipres ha encína, ha umía oiporavo umi yvyra kakuaáva apytégui ka’aguy mbytépe, umía oñeñotỹ, ha pe ama omongakuaa porãva’ekue.

15Umía yvyarigua oiporu ijepe’arã ramo oñembyaku hag̃ua; ojatapy avei hatakuápe ombojy hag̃ua igalléta; ha ichugui ojapo avei ijára ra’ãnga ha oñesũ henondépe omomba’eguasu hag̃ua.

16Peteĩ yvyrágui ojejapo ijepe’arã ombojy hag̃ua hembi’urã, hyg̃uatã porãvo oñembyaku ha he’i: Añeñandu porã ningo ko tata ypýpe,

17ha hembyrégui ojejapo ijára ra’ãnga oñesũ hag̃ua henondépe, omomba’eguasúvo ichupe, ha omba’ejerure ichupe he’ívo: Cheguenohẽ che jehasa asýgui, Nde ningo che jára.

18Umía ndoikuaái mba’eve ha ichupekuéra nahesakãi mba’eve; hesa oñemboty ani hag̃ua ohecha, ha ipy’apy oñemboty ani hag̃ua oikuaa porã mba’eve.

19Avave ndojepy’amongeta porãi, naiñakã porãietégui ha nahesakã porãigui mba’eve ikatu hag̃uáicha he’i: Ko yvyra kóvagui aiporu peteĩ pehẽngue ahapy hag̃ua tatápe, hatapỹi ári katu ambojy che rembi’urã, ambichy so’o ha’u hag̃ua. Ha hembyrégui ajapóta peteĩ jára gua’u, añesũ hag̃ua henondépe.

20Umi ojeroviáva tanimbu rehe opia tape porãgui, oñembotavy ijupe voi ha noguenohẽmo’ãi hi’ánga ñemanógui ha nde’imo’ãi: Ndaha’éi piko ñembotavy ko aguerekóva che po akatúape.

Ñanderuete oguenohẽ Israélpe ijehasa asýgui

21Nemandu’ákena ko’ã mba’e rehe, nde Jacóbo, ha nde Israel, nde ningo che rembiguái voi. Che ningo nde apohare, nde che rembiguaitee, nde Israel, ani nderesarái chehegui.

22Pe yvytu omosarambi háicha araikuéra, péicha cheresaráita ndehegui reñemoĩ haguére cherehe ha opa háicha pe tatatĩna, péicha amboguéta ne rembiapo vaieta. Ejevýke che rendápe, Che roperdonáma.

23Yvagakuéra pepurahéike Ñanderuetépe ha’e voígui pende apohareteetéva; yvy rugua esapukái vy’apópe; cerrokuéra, ka’aguy ha oimeraẽ yvyra oĩva guive ipype pepurahéi torypápe Ñanderuete oipytyvõ jevýtagui Jacóbope, ha Israel retãme oñemomba’eguasu jevýta ichupe.

24Péicha he’i Ñanderuete, ndesalvátava, nde’apova’ekue nde sy ryépe: Che, pende Ruete, opaite mba’e apohare, Chénte amyasãi yvagakuéra, ha amohenda porã ko yvy.

25Che ambyaipa proféta japu rembiapo ha ta’yvõhára (imba’ekuaáva) ñe’ẽngue, Che amotĩ umi karai arandu ha ahechauka itavyha, ha umi mba’e ha’ekuéra oikuaaukáva ndoikomo’ãi.

26Che katu amoañete che rembiguái ñe’ẽ, ha ajapopa che proféta ñe’ẽ he’íva guive, ha Che voi ha’éma Jerusalénpe: Che retã oiko jevýta ndepype. Oñemyatyrõmba jevýta ha umi itapere oĩháme oñemopu’ã jevýta hogarãnguéra.

27Che voi ha’ékuri pe yguasu ipypukuvévape ikã hag̃ua, ha ambohypa pe ysyryguasu,

28ha Círo rehe ha’éma voi: Nde che ovecha rerekua ha nde rejapova’erã Che aipotáva guive; ha Jerusalen rehe he’i: Oñemopu’ã jevytaha, ha Ñanderuete rogaguasu rehe he’i: Ojehogapo jevytaha.