1Upéramo Job ombohovái iñirũnguérape, ha he’i:
2Pejapysaka porãke che ñe’ẽ rehe, ha pévante taha’e pe angapyhy peme’ẽmíva chéve.
3Pecherendumína che añe’ẽmba peve ha upéi peñembohorykuaa jevy cherehe.
4Añe’ẽ vai piko yvyarigua rehe, ha mba’erehépa che ánga ndojepy’apykuaamo’ãi.
5Pema’ẽna cherehe ha peñemondýi jave pemboty pende juru pende pópe.
6Chemandu’árõ che jehasa asy rehe, chepy’andýi ha che rete oryryipa.
7Mba’éicha rupípa umi iñañáva oikove puku, ha ituja rire jepe imbarete ha hesãi porã gueteri.
8Imitãkuéra okakuaa porã hesa renondépe, ha iñemoñarenguéra oiko porãmba henondépe.
9Hogayguakuéra oiko py’aguapýpe ha ndokyhyjéi mba’evégui ha Ñanderuete tukumbo ndohupitýi ichupekuéra.
10Hymba torokuéra omoñemonã porã ha ndojavýiri, hymba vakakuéra imemby joa, ha naimembykuái.
11Ita’ýra osẽ hymba atýicha, ha vy’apópe oñembosarái.
12Mba’epu pararã ha mbaraka púpe opopo joa, ha mimby púpe ovy’a joa hikuái.
13Vy’apópe ohasa hi’ára, ha py’aguapy reheve oguejy omanomava’ekue retãme.
14He’i hikuái Ñanderuetépe: Eñemomombyry orehegui, ha nde rapégui ndoroikuaaséi mba’eve.
15Mba’éiko Ñanderuete oréve g̃uarã, ore roiko hag̃ua hembiguái ramo. Ha mba’épa ome’ẽta oréve roñembo’e ramo ichupe.
16Penemandu’a porãke, ipo’a ndaipóri ipópe ha iñañáva rekombo’e toñemomombyry chehegui.
17Mboy jevýpa iñañáva po’a ogue, ha araka’épa Ñanderuete ohundi ichupekuéra.
18Oiko hikuái ku kapi’ícha yvytu renondépe, ha yvyra rogue pirukue yvytu ratã oguerahapávaicha.
19Ñanderuete oñongatu ita’ýrape g̃uarã ipu’aka, Ha’e omyengoviáta ichupekuéra hembiapo vaikue oñandukuaa hag̃ua.
20Pe iñañáva tohecha ijehasa asy ha toy’u Ñanderuete pochy.
21Ha mba’e piko ichupe hogayguakuéra, ha’e omano rire térã oñemombyky ramo hekove arakuéra.
22Máva piko ikatu ombo’e Ñanderuetépe, Ha’e voi ningo ombojovake umi oikóva yvágape.
23Péva omanóta oiko porãite jave, pytu’u ha py’aguapýpe,
24ikambuchi henyhẽ kambýgui, ha ikanguekuéra hykue porã karakúgui.
25Ha ambue katu omano ipy’aro asýpe, ha okaru porã’ỹre araka’eve.
26Mokõivéva katu oñeno jojava’erã yvy guýpe ha yso ho’uva’erã ichupekuéra.
27Peikuaa porãke, che aikuaa porã voi peẽ peguerekóva pende py’apýpe, ha pe temiandu vai peguerekóva cherehe.
28Peje voi ningo: Mba’éiko oiko pe mburuvicha rógagui, ha mba’épa oiko umi tekove ñañágui.
29Napeporandúipara’e umi ohóva tetã ambuépe, ha ndapeikuaáipara’e umi mba’e he’iva’ekue peẽme.
30Mba’evai árape iñañávape ndojehúi mba’eve ivaíva. Ha Ñanderuete ñembojovakeha ára ndohupityichéne ichupe mba’eve ivaíva.
31Máva piko he’i ichupe hovápe oiko vai hague. Ha máva piko omyengoviase hembiapo vaikue ojerure háicha.
32Ojereraha joava’erã isepulturarãme, ha ityvy ypýpe opytáta umi oñeñangarekóva hetekuére.
33Yvy hu’ũ porãme oñotỹ ichupe, heta kuimba’e ha’eichagua ohóma henonderãme ha heta ohóta gueteri hapykuéri,
34ha mba’éicha piko peẽ chemoangapyhy gua’u reíta, opaite pene ñe’ẽ ningo japu reínte voi.
Who We AreWhat We EelieveWhat We Do
2025 by iamachristian.org,Inc All rights reserved.
