1Ha pe yvága rembiguái oñe’ẽva chendive ojere chemombáy, oñemombáy háicha peteĩ okévape.
2Ha oporandu chéve: Mba’épa rehecha. Ha che ambohovái: Ahecha peteĩ tataindyenda oroguiguáva ha hi’ári oĩ peteĩ mba’yru acéitepe g̃uarã, ha oĩ avei 7 hemiendy pe tataindyenda ári, 7 acéite rape omongarúva acéite reheve umi 7 hemiendy.
3Ha pe tataindyenda ykére oĩ mokõi olívo máta, peteĩ ijakatúape ha ambue ijasúpe.
4Ha añe’ẽve hendive ha’évo: Che jára, mba’épa he’ise ko’ã mba’e.
5Ha pe yvága rembiguái he’i chéve: Ndereikuaáipa mba’épa he’ise ko’ã mba’e. Ha ambohovái ichupe: Nahániri, che jára.
6Upéramo ha’e oñe’ẽ chéve ha he’i: Kóva ningo Ñanderuete ñe’ẽ Zorobabélpe g̃uarã: Ndaha’éi soldádo aty rupi, ni yvyarigua pu’aka rupi, che Pytu Porãite rupínte katu ojehupahína, he’i ángel atykuéra Jára.
7Máva piko nde, cerroguasuete Zorobabel renondépe, repytáta yvype ramo, ha ha’e ohupíta pe ita paha pegua omopu’ã meve che rogaguasu ha osapukáita: Jeporiahuvereko, jeporiahuvereko.
8Ñanderuete ñe’ẽ ou jevy chéve ha he’i:
9Zorobabel pokuéra omoĩ ko óga pyendarã, itaguasu peteĩha, ha ipokuéra ojapopava’erã ha péicha peikuaáta ángel atykuéra Jára chembou hague pene rendápe.
10Umi ohechakuaa’ỹva jepe ohecháta vy’apópe pe ita paha pegua Zorobabel pópe. Ha ko’ã 7 temiendy ojogua umi 7 Ñanderuete resápe, oguatáva ohóvo ko yvy apére.
11Ha che añe’ẽve ha ha’e ichupe: Mba’éiko he’ise ko’ã mokõi olívo máta oĩva pe tataindyenda akatúa ha ijasu gotýo.
12Ha añe’ẽ jevy ha ha’e ichupe: Mba’éiko he’ise avei umi mokõi olívo rakã oñohẽva acéite óroicha umi mokõi acéite rape rupi.
13Ha pe yvága rembiguái he’i chéve: Ndereikuaáipa mba’épa he’ise ko’ã mba’e. Ha ambohovái ichupe: Nahániri, che jára.
14Ha ha’e he’i: Ko’ãva hína umi mokõi ojeporavóva tetã ruvicha ha pa’iguasurã ramo, oñembo’ýva ko yvy tuichakue Jára renondépe.
Who We AreWhat We EelieveWhat We Do
2025 by iamachristian.org,Inc All rights reserved.
