Matéo 11 - Biblia en Guaraní - ?anderuete ?e’? Por? 2015

Juan Bautísta remimbou ou Hesu rendápe

1Ha Hesu ohekombo’e rire umi 12 hemimbo’ekuérape oho upégui, oporombo’e ha oikuaauka hag̃ua avei ambue tavakuéra uperupiguápe.

2Ha Juan oĩ aja hína cárcelpe ohendu Hesu Crísto rembiapo ha omondo hemimbo’ekuérape oporandu hag̃ua ichupe:

3Ndépa ha’ehína pe Crísto ouva’erãva térãpa roha’ãrõta gueteri ambuépe.

4Ha Hesu he’i ichupekuéra: Tapeho ha pemombe’u Juánpe opaite mba’e pehendúva ha pehecháva guive.

5Hesatũva ohecha jevy; ijapáva oguata jevy; ijai vaíva (iléprava) ipotĩmba jevy; ijapysapéva ohendu jevy; omanova’ekue oikove jevy; ha mboriahukuérape oñemombe’u pe evangélio.

6Ha ipy’arory upe oñepysãnga’ỹva cherehe (pe evangélio rekóre).

7Ha’ekuéra ohopa rire, Hesu oñepyrũ oñe’ẽ porã Juan rehe hetãyguakuérape, ha he’i: Mba’épa pesẽra’e pehechávo pe desiérto rehe, peteĩ takuára yvytu oityvyróva.

8Mba’épa pesẽra’e pehechávo. Peteĩ kuimba’e oñemondéva ao porãitépepa. Umi ao porãitépe oñemondéva ningo oiko umi tetã ruvichaguasu róga rupi.

9Mba’épa pesẽra’e pehechávo. Peteĩ proféta piko. Añetehápe ha’e peẽme: Juan mba’eguasueteve peteĩ profétagui.

10Hese ojehai kuatiañe’ẽme: Péina, amondo che ñe’ẽ rerahahára ne renonderãme ombosako’i hag̃ua ne raperã, (Malaquías 3,1).

11Añetehápe Che ha’e peẽme: Kuñágui onaceva’ekue apytépe ndoúi avave mba’eguasuvéva Juan Bautístagui; opáichavo pe michĩvéva oikétava Ñanderuete retãguasúpe ituichavéta ichugui.

12Juan Bautísta ára guive ko’ág̃a peve oĩ umi oñeha’ãmbáva ojapyhy hag̃ua Ñanderuete retãguasu ojopekuéra g̃uarã, heko yvyarigua pu’aka rupi.

13Opaite proféta ha Ñanderuete rembiapoukapy omomaranduva’ekue ko’ã mba’e Juan ou peve.

14Ha peikuaase ramo, Juan voi pe Elías ouva’erãva’ekue.

15Upe ijapysáva, tohendu.

16Mba’érehepa ambojojáta ko’ã ñemoñare ko’ãva, ojoguaite ningo ku mitãkuéra oguapývape táva plázape ha osapukáiva hapichakuérape:

17Rombopu peẽme mimby ha ndapejerokýi, ropurahéi peẽme purahéi jahe’o rehegua ha ndapejahe’ói.

18Ou ningo Juan ndokarúiva ha ndoy’úiva, ha oje’e hese: Mba’epochy oiko ipype.

19Ha ou yvyarigua Ra’y, okaru ha hoy’úva, ha oje’e hese: Péina ápe kuimba’e ikarúva ha ombo’úva víno, impuésto mbyatyhára ha angaipavóra irũ (amígo). Ñanderuete arandu katu ojehechaukáma hekópe Juan Bautísta ha Hesu Crísto rembiapokue rupi.

Umi táva Corazin ha Betsáida noñembyasyséi

20Upérõ Hesu oja’o umi táva Ha’e ojapo haguépe heta tembiapo techapyrãva (milagrokuéra), hetãyguakuéra noñembyasýi katu hi’angaipakuéragui.

21Angái nde Corazin, angái nde Betsáida, Tíro ha Sidónpe ojejapo rire umi tembiapo techapyrãva, ojejapova’ekue pende apytépe, ymáma oñembyasyva’erãmo’ã oiko vai haguére, ao vosakuépe ha tanimbupápe oikova’erãmo’ã hikuái.

22Upévare Che ha’e peẽme pe mbojovakeha árape, pe jehavira peẽme g̃uarã ipohyivéta Tíro ha Sidon peguágui.

23Ha nde, Capernaum, rejehupíva yvága peve rejeitýta aña retã meve: Sodómape ojejapo rire umi tembiapo techapyrãva ojejapomava’ekue pende apytépe, opytava’erãmo’ã gueteri ko’ag̃aite peve.

24Upévare Che ha’e peẽme, Sodóma retã jehavirarã ivevuivéta upe penderupitýtavagui.

Peju che rendápe ha pepytu’u

25Ha umi ára umívape Hesu he’i: Romomba’eguasuete ndéve, che Ruete, yvága ha yvy Jára, ko’ã mba’e reñomi haguére umi iñarandúvagui ha umi heta mba’ekuaaháragui, ha rehechaukágui umi tapicha ojejapo’ỹvape.

26Upéicha rejapo, che Ruete, iporãgui nde resa renondépe ko’ã mba’e.

27Opaite mba’e, che Ruete omoĩmba che pópe. Avave ndoikuaái pe Ta’ýrape, pe Túva añómante; ha avave ndoikuaái pe Túvape, pe Ta’ýra añómante ha pe Ta’ýra oikuaaukasévape avei.

28Peju che rendápe opaite peẽ peñeha’ãmbáva pehupity hag̃ua pe tekove tapia g̃uarãva, ha ani peẽ voi peñeha’ã reive pepoi hag̃ua pene angaipa cárga pendejopývagui. Chémante ikatu pomombytu’u porã.

29Peñemoĩ che cangálla guýpe (yúgo guýpe) ha peheja Che tapohekombo’e porã, chepy’a porãgui ha che añemomirĩgui, péichamante pejohúta pe pytu’u añeteguáva pene ángape g̃uarã.

30Che cangálla ningo hu’ũ asy ha ivevúi pe cárga aguerahaukáva peẽme.