Apostolkuéra 27 - Biblia en Guaraní - ?anderuete ?e’? Por? 2015

Ojegueraha Páblope Rómape

1Upérõ Fésto oguerahauka bárcope Páblo ha ambuekuéra oñeñapytĩhápe Rómape, ha omoĩmba ko’ãvape peteĩ soldádo ruvicha’i Júlio poguýpe, oservíva pe soldádo atýpe hérava Róma retã ruvichaguasu pegua aty.

2Upérõ ore roike peteĩ barcoguasu Adramit peguápe, roho hag̃ua tetã Ásia rembe’y puertokuéra rupi Róma gotýo. Orendive oĩ avei Aristárco, peteĩ Tesalonicaygua, Macedónia departaménto pegua.

3Pe ára ambuépe rog̃uahẽ Sidónpe, ha pe soldádo ruvicha’i Júlio ipy’aporãgui Páblo ndive, oheja Páblope oñandu hag̃ua hermanokuérape oikóva pe távape, ha’ekuéra oipytyvõ hag̃ua ichupe hemikotevẽrãme.

4Ha rosẽ rire Sidóngui, roho Chípre gotýo pe yvytu naorepytyvõ porãigui.

5Rohasa rire pe yguasu oĩva Cilícia ha Panfília rembe’y rupi, rog̃uahẽ Míra, Lícia táva peguápe.

6Upépe pe soldádo ruvicha’i Júlio ojohu ambue barcoguasu Alejandría pegua, ohótava Róma gotýo, ha orembojupi ipype.

7Mbegue katu roho heta ára ha hasýpe rog̃uahẽ Gnído rovái, pe yvytu ndohejáigui ore rohasa pe ísla Créta rembe’y rupi rog̃uahẽ meve Salmóna rovái rupi,

8ha hasýpe rohasa rire Salmóna rovái rupi, rog̃uahẽ Puérto Porãme, ijypýpe oĩ pe táva Laséa.

9Ha rohasa asy rire heta árama rokyhyje roho hag̃ua yguasu rupi, ohasámagui avei pe areteguasu karu’ỹ, Páblo oavisa porã ichupekuéra,

10he’ívo: Kuimba’ekuéra, che ahecháma ñande jahasa asyeteha, ikatu oñehundi ko barcoguasu icárga reheve ha ñande rekove jepe.

11Pe soldádo ruvicha’i Júlio ogueroviave katu pe barcoguasu mboguatahára ha pe bárco járape Páblo he’ívagui.

12Ha naiporãguasúigui avei pe puérto ojehasa hag̃ua upépe opaite araro’y, upévare ha’ekuéra ohasaseve Fénicepe, peteĩ puérto opytáva Créta íslape ojepe’áva nórte kuarahyresẽvo ha sur kuarahyresẽ gotýo, opyta hag̃ua upépe pe araro’y aja.

Y pochy yguasu mbytépe

13Oñepyrũgui oipeju kangymi pe yvytu súrguio hi’ã ichupekuéra oguerekomaha pe oipotáva, upérõ ha’ekuéra ohupi pe barcoguasu jokoha oitymava’ekue sã reheve yguasúpe omombyta hag̃ua pe barcoguasu.

14Uperiremínte katu ou peteĩ yvytu hatãitereíva oipejúva nórte kuarahyresẽguio.

15Ha’ekuéra ndaikatúigui ombojere pe barcoguasu tĩ yvytu hatãiterei oipejuha gotýo, oheja hikuái pe yvytu oregueraha oreguerahasehápe.

16Ha oregueraha peteĩ ísla kupe rupi, yvytu’ãme, hérava Cláuda ha hasýpe ikatu rohupi pe bárco, ojegueraháva pe barcoguasu rapykuéri.

17Ojehupi rire pe bárco, ha’ekuéra oñeha’ãmba oñu’ã hag̃ua pe barcoguasu sã poguasukuéra reheve okyhyjégui pe barcoguasu ohovérõ g̃uarã sur gotýo ojejoso Sírte rehe, péicha oñembohéra pe yvyku’i atyguasuetereíva, upévare omboguejy hikuái avei pe bárco jokoha roho mbeguemive hag̃ua.

18Pe yvytu hatãitereíva oretyvyroitégui, oñepyrũ hikuái ára ambuépe omombo pe cárga ombovevúi hag̃ua pe barcoguasúpe.

19Ha pe ára mbohapyhápe katu omombo hikuái avei umi bárco sãnguéra ha umi aoguasu ojeporuva’ekue pe yvytu omboguata hag̃ua pe barcoguasúpe.

20Ha kuarahy ni jasytatakuéra ndojehechaukáigui heta ára pukukue, ha pe yvytu hatãitereíva oretyvyrógui gueteri, opavave ore roimo’ã roñehundipataha.

21Aréma ndokaruvéi haguére hikuái, Páblo oñembo’y imbytepekuéra ha he’i: Iporãveva’erãmo’ã peẽ cherendu rire ha nañasẽi Crétagui, ani hag̃ua ojehu umi mba’evai jahasamavañaína.

22Ko’ág̃a katu che poavisa porã, peẽ pendepy’aguapy hag̃ua, avave ñande apytépe noñehundimo’ãi, pe barcoguasu añómante.

23Ko pyharépe Ñanderuete, che aservívape, ombou che rendápe hi’ángel ko ñe’ẽ kóva reheve:

24Páblo, ani rekyhyje, nde rejehechaukava’erã Róma retã ruvichaguasu renondépe, ha eikuaa porãke, opaite oĩva guive nendive ko barcoguasu kóvape Ñanderuete omẽ’ẽmbáma ndéve nde jopói ramo.

25Upévare kuimba’ekuéra peñembopy’a kyre’ỹ porãkena, che aroviaitégui Ñanderuete ojapotaha opaite mba’e Ha’e he’iuka haguéicha chéve.

26Pe barcoguasu ojejoso ramojepe peteĩ ísla rehe.

27Og̃uahẽvo pe pyhare 14-hápe, pe yvytu oregueraha ágotyo pégotyo pyhare pyte jave pe yguasu Ádriape, umi omba’apóva pe barcoguasúpe katu okyhyje roñemboja hag̃ua peteĩ ísla rehe.

28Ha oity hikuái peteĩ sã oha’ã hag̃ua pe y rypykue ha ojohu 37 métro ha kurimive oha’ã jevývo ojohúntema 28 métro.

29Ha okyhyjégui oñembotárõ g̃uarã itáre, oity ýpe irundy bárco jokoha (áncla) pe barcoguasu rapykuéguio ha py’a angekõime oha’ãrõ iko’ẽ hag̃ua.

30Umi kuimba’e omba’apóva pe barcoguasúpe okañységui, oñepyrũ omboguejy pe bárco michĩva, oity gua’úrõ guáicha avei bárco jokohakuéra pe barcoguasu tĩme.

31Páblo katu he’i pe soldádo ruvicha’i Júliope: Ko’ãva ndopytái ramo barcoguasúpe peẽ ndapejesalvamo’ãi.

32Upémaramo soldadokuéra oikytĩ umi sã ojokóva gueteri pe bárco ha oheja ho’a ýpe.

33Ko’ẽmba jave, Páblo ojerure asy opavavépe okaru hag̃ua, ha he’i: Kóva ningo pe ára 14-ha pehasáva pekaru’ỹre.

34Upévare ajerure asy peẽme pekaru ikatu hag̃uáicha pejesalva, noñehundimo’ãi ningo avave pende apytégui peteĩ pene akã rague jepe ndojeimo’ãi.

35Ha Páblo he’ívo ko mba’e ojapyhy peteĩ pan oagradece Ñanderuetépe opavave rovake, omboja’o ha oñepyrũ ho’u.

36Upérõ ambuekuéra ikyre’ỹmba ha okaru hikuái avei.

37Ha orekuéra, barcoguasu pegua roĩ 276 tapicha.

38Hyg̃uatãmba rire hikuái oity pe trígo ogueraháva yguasúpe.

39Ha iko’ẽmbávo ndoikuaái hikuái pe yvy oñemboja haguépe, ohecha katu peteĩ ypa lagúnaicha, upépe oñeha’ãmba oike hag̃ua ha pe yvy rembe’y upepeguáva yvyku’i memete, ha hi’ári omopa’ãse barcoguasúpe.

40Upérõ oikytĩ hikuái umi bárco jokoha sãnguéra, ha oheja yguasúpe, upéi ojora hikuái avei umi sã oñeñapytĩ hague pe rémo hapykue peguápe, ha ohupi hikuái umi ao guasu (véla), pe yvytu oipejúvo ipype ogueraha hag̃ua ichupekuéra y rembe’ýpe.

41Ojejoso katu, pe y osyryhápe ijakatúa ha ijasúpe, ha pe barcoguasu ojekutu pypuku pe yvyku’íre, ha upévare ndikatuvéima oñemomýi mamovete, ha pe y pochy ombota mbaretépe pe barcoguasu rapykue rehe ojeka peve.

42Umi soldádo oñembopy’apeteĩ ojuka hag̃ua umi kuimba’e ojepokuapývape, ani hag̃ua okañy hikuái ho’ytávo.

43Opáichavo imburuvicha Júlio ndoipotái ojejuka ichupekuéra ohayhúgui Páblope. Upévare he’i: Umi ho’ytakuaáva tojeity ýpe ohupity hag̃ua pe yvy,

44ha ambuekuéra toho hapykuéri ojapyhývo peteĩ tábla térã oimeraẽ mba’e ovevuikuaáva ýpe ha ojohúva pe barcoguasúpe. Ha upéicha ningo opavavete ojesalva.