Romayguakuérape 8 - Biblia en Guaraní - ?anderuete ?e’? Por? 2015

Pytu Porãmbáva reko

1Upévare umi oñemopeteĩva Hesu Crísto ndive noñecondenavéima.

2Pe tembiapoukapy Pytu Porãmbáva rehegua oporomoingovéva, omosãsóma opaite ojeroviávape Hesu Crísto rehe, pe tembiapoukapy angaipa ha ñemano rehegua poguýgui.

3Ha umi mba’e Moises rembiapoukapykuéra ikatu’ỹva ojapo, ñande kuimba’e ha kuña reko ikangýgui, péva Ñanderuete ojapova’ekue ita’ýra Hesu Crísto rupi, omboúvo ichupe kuimba’e reterõguáicha ko yvy apére, ha péicha Ñanderuete ikatu ocondena pe angaipa Hesu Crísto rete rupi, ndo’áigui Ha’e angaipápe.

4Oikopa hag̃ua hekópe ñandepype umi mba’e Moises rembiapoukapykuéra ojeruréva, ñande ndajaikoveiva’erã ñande rete (py’apy) rembipota vai poguýpe, pe Pytu Porãmbáva reko poguýpe uvei.

5Umi ha’enteséva ha oikóva ipy’apy rembipota vai poguýpe oheka ohupity hag̃ua umi mba’e ombovy’áva ipy’apy rembipota vai; umi oikóva Pytu Porãmbáva poguýpe katu oheka ombohory hag̃ua ijapohare, Ñanderuetépe.

6Ñande py’apy rembipota vai ogueru pe ñemano, umi oikóva pe Pytu Porãmbáva poguýpe katu oikovéta tapia g̃uarã py’aguapy añeteguápe g̃uarã.

7Ñande py’apy rembipota vai tapia oñemoĩ Ñanderuete rehe, ñande py’apy rembipota noñemomirĩri Ñanderuete renondépe, ha ndaikatúi voi ningo, (oiko ijeheguínte).

8Ha umi oikóva ipy’apy rembipota vai poguýpe ndaikatúi ombohorývo Ñanderuetépe.

9Peẽ katu ndapeikói pende py’apy rembipota vai poguýpe, peikopeína Ñanderuete Pytu Porãite poguýpe, Ha’e oikógui pendepype, ha opavave oguereko’ỹva Hesu Crísto Pytu Porãite ndaha’éi imba’e (ita’ýra ni itajýra).

10Hesu Crísto oiko ramo pendepype, pende rete omanóma pe angaipa rehe, pende pytu porã katu oikove Hesu Crísto penemboheko potĩgui.

11Ñanderuete Pytu Porãite omoingove jevýgui Hesu Crístope omanova’ekue apytégui, katuete Ha’e omoingovéta avei pende rete te’õngueguigua Ipytu Porãite rupi, Ha’e oikovégui avei pendepype.

12Upévare che hermanokuéra, natekotevẽvéima jaikoñaína ñande py’apy rembipota vai poguýpe,

13upe oikovéva ipy’apy rembipota vai poguýpe, katuete omanova’erã. Peẽ pejuka ramo pende py’apy ha pende rete rembiapo vai, Pytu Porãmbáva pu’aka rupi katuete peikoveva’erã.

14Opaite umi ohejáva pe Pytu Porãmbáva oisãmbyhy ichupekuéra, umía Ñanderuete ra’y ha itajyrakuéra.

15Noñeme’ẽigui peẽme peteĩ Pytu Porãmbáva penemongyhyjéva peiko hag̃ua hembiguái ramo, oñeme’ẽ katu peẽme pe Pytu Porãmbáva peiko hag̃ua Ñanderuete ra’y ha itajýra ramo, ikatu hag̃ua peje: Nde ningo, che Ruete.

16Pe Pytu Porãmbáva oikuaauka ñande pytu porãme ñande ha’eha Ñanderuete ra’y ha itajyraha.

17Ha ñande ramo Ñanderuete ra’y ha itajyrakuéra, Ñanderuete ome’ẽta ko yvy kóva ñandéve g̃uarã ñane mba’erã ramo, Hesu Crísto poguýpe katu. Ñande jahasa asy ramo Hesu Crísto rehehápe, uperire jaikóta avei hendive Ñanderuete reko jajaipápe.

18Chéverõ g̃uarã umi jehasa asy ko’ag̃agua jahasavañaína, ndaha’éi mba’eve, ñambojoja ramo pe teko jajaipáva rehe ojehechaukava’erã ñande rekoverãme.

19Opaite Ñanderuete rembiapokue oha’ãrõ asyhína Ñanderuete ra’y ha itajyrakuéra reko jajaipa ojehechaukava’erãha ára.

20Opaite Ñanderuete rembiapo tujakue ohasava’erã, Ha’e ombopyahúta opaite mba’e Ha’e ojapomava’ekue guive, (Apocalípsis 21,1). Hembiapo tujakue katu ojeity oñehundi hag̃uáme, ndaha’éi Ha’e oipotágui, Ñanderuete omboyke haguére, (Génesis 3,14-19; 2 Pédro 3,10-13). Oĩ katu pe esperánza, oñembopyahupataha,

21Ñanderuete rembiapo tujakue isãsova’erã avei pe tembiguái reko ha ñembyai poguýgui, ohupity hag̃ua Ñanderuete ra’ykuéra ha itajyrakuéra ndive isãso (ilibertad) ha Ñanderuete reko jajaipa.

22Ñande ningo jaikuaa opaite Ñanderuete rembiapokue ipyahẽhína oñondivepa ha ohasa asy peteĩ kuña imembypotávaicha.

23Ndaha’ekuéra añói, ñande voi avei, jarekóva pe Pytu Porãmbáva, peteĩ ime’ẽmby tenondeguáva ramo, ñande voi ñanepyahẽñaína ñaha’ãrõgui Ñanderuete ra’y ha itajýra rekorã, ha ñande rete ojesalva ha oñemoambue hag̃ua.

24Ko esperánza kóva rupi Hesu Crísto ñandesalvava’ekue, pe esperánza ojehecháva ningo ndaha’éi esperánza. Máva piko oha’ãrõve gueteri, ohupity rire umi mba’e ha’e oipotáva.

25Ha ñaha’ãrõ ramo ñaína umi mba’e jahecha’ỹva, he’ise ñaha’ãrõhañaína paciéncia reheve.

Pe Pytu Porãmbáva oñembo’e ñandepype ha ñanderehe

26Pe Pytu Porãmbáva ñanemokyre’ỹ ha ñanepytyvõ ñamboyke hag̃ua ñande py’apy kangy ha ñanepytyvõ ñañembo’e hag̃ua hekoitépe Ñanderuetépe, Ha’e oipota háicha ha ovale hag̃uáicha ichupe g̃uarã upévare pe Pytu Porãmbáva ojerure ñanderehe pyahẽ oje’e’ỹkuaáva reheve.

27Ñanderuete ohechakuaa ñande py’apy oĩva jepe ha oikuaa porã avei mba’épa pe Pytu Porãmbáva ohupityséva ñandepype.

Ndaipóri ipu’akáva ñanderehe

28Jaikuaa porã ningo opaite mba’e ojehúva guive Ñanderuete ra’y ha itajyrakuéra rekovépe, oipytyvõ porãtaha ichupekuéra (oñemboheko porãmive hag̃ua ohóvo), umi Ha’e ohenóimavape yma guive ita’ýra ha itajýra ramo.

29Ñanderuete oipota umi Ha’e oikuaámava ymaguare guive, ojoguava’erãha ita’ýra Hesu Crísto ra’ãngápe (heko porãme), Hesu Crísto ningo oiko hermáno peteĩha ramoiñermanokuéra apytépe.

30Umi Ha’e oiporavova’ekuépe, Ha’e ohenoimava’ekue avei, ha omboheko potĩva’ekue avei; ha umi ha’e omboheko potĩva’ekuépe, Ha’e omboheko mimbiva’ekue avei.

31Mba’épa ja’éta upéicharamo ko’ã mba’e ko’ãva rehe. Ñanderuete oĩ ramo ñanendive, máva piko ikatu oñemoĩ ñanderehe.

32Ñanderuete nahakate’ỹiva’ekue ita’yratee rehe jepe, ome’ẽvo ichupe ñanderehehápe, mba’éicha piko nome’ẽmo’ãi avei hendive opaite ambue mba’e (ñaikotevẽteéva).

33Máva piko ikatu omoĩ vai umi Ñanderuete voi oiporavomava’ekuépe, Ha’e voi omboheko potĩmava’ekuégui ichupekuéra.

34Máva piko ikatu ocondena ichupekuéra. Hesu Crísto piko, Ha’e voi ningo omanova’ekue hendaguepekuéra, ha oikove jevy avei, ha oguapyhína avei Ñanderuete akatúape, ha ojerurevahína avei ñanderehe.

35Mávapa térã mba’épa upéicharamo ñandepe’áne Hesu Crísto mborayhúgui: Jehasa asy, térãpa kyhyje, térãpa persecucion, térãpa ñembyahýi, térãpa opívo, térãpa pelígro, térãpa jejuka.

36Ojehai háicha Ñanderuete kuatiañe’ẽme: Nderehehápe katu orejuka hikuái opaite árape; rojeguereko ningo umi ovecháicha ojegueraháva ojejuka hag̃uáme (Salmokuéra 44,22).

37Opaite ko’ã mba’evai ñande jagueropu’akapa Hesu Crísto rupi, ñanderayhúgui.

38Che katu aikuaa porã mba’evete ndaikatuiha ñandepe’a Hesu Crísto mborayhúgui, ni ñemano térã tekove, niangelkuéra térã demoniokuéra (añanguéra), ni yvy arigua térã ouva’erãva rehegua, ni Satana rembijokuái,

39ni yvategua térã yvy guypegua, ni ambue pu’aka ndaikatúi ñandepe’a Ñanderuete mborayhúgui, ojehechaukámava Ñandejára Hesu Crísto rupi.