Deuteronómio 6 - Biblia en Guaraní - ?anderuete ?e’? Por? 2015

Tembiapoukapy tuichavéva

1Ko’ãva ningo hembiapoukapy, imbo’epy ha hembipota, Jahve, pende Ruete, ome’ẽmava’ekue chéve ambohasámava hag̃ua peẽme, ha peẽ pejapo hag̃ua hekoitépe pe yvy oñeme’ẽtavape peẽme pene mba’etee ramo.

2Pekyhyje Jahve, pende Jaraitégui ha pejapopa hekoitépe mayma imbo’epy ha hembiapoukapykuéra che ambohasa peẽme, péicha avei pende ra’y ha ita’ýra ra’yrépe, peikove aja pukukue, ha pembopuku hag̃ua pende rekove arakuéra.

3Peẽ, Israelgua, peikuaa iñe’ẽ, upévare peñeha’ãmba pejapo hag̃ua hekoitépe oho porãmba hag̃ua peẽme pe yvy osyryhápe kamby ha eíra ha peñemboheta hag̃ua, Jahve he’i haguéicha pende rukuérape.

4Ehendúke Israel: Jahve, nde Ruete, peteĩnte hína Ha’e.

5Ehayhu Jahve, nde Jaraitépe, nde py’aite ha ne angaite guive ha opaite nde pu’aka reheve.

6Ko’ã ñe’ẽ kóva Che ha’éva guive ndéve ko árape, topyta nde py’apýpe,

7ha ere jevy jeyva’erã nde ra’ykuérape, reime ramo nde rógape, térã tape rehe, reñeno térã repu’ãnguévo.

8Eñapytĩ peteĩ techaukaha apokytã ramo nde pyapy rehe, ha nde syva rehe, nde resakuéra pa’ũme, remomandu’a hag̃ua;

9umía ehai avei nde róga rokẽ ha pende táva rokẽguasu rehe.

Moises omomarandu Israelguakuérape iñe’ẽrendu hag̃ua

10Ág̃a Jahve, Ñanderuete, penemoingévo pe yvýpe Ha’e he’imava’ekue pende rukuéra Abraham, Isaac ha Jacóbope, ome’ẽtaha peẽme, umi táva ituicha ha iporãva peẽ napemopu’ãiva’ekue,

11ha hogakuéra henyhẽ opaichagua mba’eporãgui, peẽ napemyenyhẽiva’ekue, ha pózo peẽ ndapejo’oiva’ekue, parralty ha olivoty (ijyvágui oñeguenohẽ acéite porã) peẽ napeñotỹiva’ekue, pe’u ha peneryg̃uatã hag̃ua,

12upéicha ramo, peñangarekóke pendejehe anítei penderesarái Jahve, pende Jaraitégui, penerenohẽva’ekue Egípto retãgui, tembiguái róga poguýgui.

13Jahve, pende Jaraitégui pekyhyjeva’erã ha ichupe añónte peservi ha héra rehénte peñe’ẽme’ẽva’erã.

14Ndapeikoiva’erã ambue jára rapykuéri, umi tetã oikóva pende jerekuévo ojapo háicha;

15Jahve, Ñanderuete, hakate’ỹ penderehe; ani hag̃ua Ñanderuete pochy hendy penderehe, ha penehundi ko yvy apégui.

16Ani peipy’ara’ã Jahve, pende Ruetépe, pejapo haguéicha Masápe.

17Peñangareko porãke pejapopa hag̃ua Jahve, Ñanderuete rembiapoukapy, imbo’epy ha hembipota he’imava’ekue guive peẽme.

18Pejapóke mba’eporã ha hekoite peguáva Ñanderuete resa renondépe, oho porãmba hag̃ua peẽme, ha peike ha peñemomba’e hag̃ua pe yvýre Ñanderuete he’imava’ekue pende rukuérape ome’ẽtaha peẽme,

19Ha’e omosẽmba hag̃ua umi penderehe ija’e’ỹvape pene renonderãgui, Ñanderuete he’i haguéicha.

20Ha ko’ẽ ramo ára pende ra’ykuéra oporandu ramo peẽme: Mba’éiko he’ise umi techaukarã, mbo’epy ha tembiapoukapy Ñanderuete he’iva’ekue peẽme.

21Upéramo pejéta pende ra’ýpe: Ore ningo, faraon rembiguaikue Egíptope, Ñanderuete katu oreguenohẽ Egíptogui pyapy mbarete pópe.

22Ñanderuete ojapókuri tembiapo techaukarã ha mba’eguasu tuicháva omondýiva Egiptoyguakuérape, faraon ha mayma hogayguakuérape, ñande resa renondépe,

23ha ñanerenohẽ upégui ñandegueru hag̃ua ñandéve ko yvy kóvape, oprometemava’ekue ñande rukuérape.

24Ñanderuete he’i ñandéve jajapo hag̃ua hekoitépe iñe’ẽ ha jakyhyje hag̃ua Jahve, ñande Ruetégui, opaite ára oho porãmba hag̃ua ñandéve, Ha’e oñangareko porã hag̃ua ñanderehe, ojapo háicha ko ára kóva peve.

25Ha Ñanderuete tekojoja (justícia) oĩta ñanendive jajapopa ramo iñe’ẽ, Ha’e he’i haguéicha ñandéve.