Éxodo 33 - Biblia en Guaraní - ?anderuete ?e’? Por? 2015

Ñanderuete oñe’ẽme’ẽ oĩtaha Israelguakuéra ndive

1Ñanderuete he’i Moiséspe: Tereho ha pesẽ ko’águi, nde ha ne retãyguakuéra reguenohẽva’ekue Egípto retãgui, tapeho pe yvy Che añe’ẽme’ẽmava’ekue Abraham, Isaac ha Jacóbope, ha’évo: Ne ñemoñarenguérape ame’ẽva’erã upe yvy;

2ha Che amondóta ne renonderãme peteĩ yvága rembiguái ha amosẽta umi Canaangua, Amorgua, Hetgua, Ferezgua, Hevgua ha Jebusguakuérape.

3Tapeho pe yvy osyryhápe kamby ha eíra, Che katu ndahamo’ãi penendive, tetãyguakuéra naiñakã porãigui, anítei ág̃a pohundi tape rehe.

4Ha hetãyguakuéra ohendúvo ko marandu vai, oñembyasyete ha avavete nomoĩvéi ijehe ijeguakakuéra.

5Ñanderuete he’ígui Moiséspe: Ere umi Israel ñemoñarenguérape: Peẽ ningo tetãygua iñakã porã’ỹva apyta rire sapy’amínte jepe pende apytépe Che pohundiva’erãmo’ã. Peipe’a pendejehegui pende jeguakakuéra, aikuaa hag̃ua mba’épa ajapóta pendehegui.

6Upémaramo Israel ñemoñarenguéra oipe’a ijehegui ijeguakakuéra Horeb cérro guive.

7Ha Moises oguerojauka katu pe óga jojohuha omopu’ã hag̃ua mombyrymive pe tekohágui ha ohenói pe óga péva óga jojohuha (Ñanderuete ha Israelguakuéra ndive). Ha oimeraẽ ohekaséva Ñanderuete rova osẽ’arã pe tekoha okára gotýo pe óga jojohuha oĩháme.

8Ha ojehu Moises oho jave pe óga jojohuhápe, mayma tetãygua opu’ã, ha oñembo’y joa hóga rokẽme oma’ẽ hag̃ua hese, ha’e oike peve pe óga jojohuhápe.

9Moises oike jave Ñanderuete rógape ojejohu hag̃ua Ñanderuete ndive, pe arai oñembo’ýva oguejy ha oñemoĩ Ñanderuete róga rokẽme ha Ñanderuete oñe’ẽ Moises ndive.

10Ha hetãyguakuéra ohecha ramo pe arai ñembo’yha oĩva Ñanderuete róga rokẽme, oñembyaty joa hóga rokẽme ha oñesũ omomba’eguasu hag̃ua Ñanderuetépe.

11Ha Ñanderuete oñe’ẽ Moises ndive ojovake, oimeraẽva oñe’ẽ ramoguáicha iñirũme. Ha ha’e ou jevy hetãygua rekohápe; ha hembiguái, pe karia’y Josue, Nun ra’y, araka’eve ndojeíri pe óga jojohuha ryepýgui.

12Ha Moises he’i Ñanderuetépe: Ema’ẽmína, nde ere chéve, eraha Israelguakuéra (Canaan retãme); ha Nde nde’eréi chéve mavaitépa chemoirũta. Nde ere uvei: Che ningo roikuaa nde réra rupi ha nde rejohu avei py’aporã che resa renondépe.

13Ko’ág̃a oime ramo ajohu py’aporã nde resa renondépe, ajerure ndéve ehechauka hag̃ua chéve ne pensamiénto, aikuaa hag̃ua ajohu hague py’aporã nde resa renondépe; ha ema’ẽmína, ko’ã tapichakuéra rehe, ne retã voi.

14Ha Ha’e he’i: Che aháta nendive rombopy’aguapy hag̃ua.

15Ha Moises he’i jevy: Ndete voi nderehomo’ãita ramo chendive, anínte orerenohẽ ko’águi.

16Ha mba’éichapa roikuaáta che ha ne retã rojohu hague py’aporã nde resa renondépe, Nde nderejúi ramo orendive, Nde voi oreporavógui oremoirũ hag̃ua opaite tetãnguéra apytégui, oĩva guive ko yvy apére.

17Ha Ñanderuete he’i Moiséspe: Ajapóta avei ko mba’e ereva’ekue, rejohúgui py’aporã che resa rendondépe ha Che roikuaágui nde réra rupi.

18Upéramo Moises he’i Ñanderuetépe: Ajerure ndéve ehechaukamína chéve nde reko jajaipa.

19Ha Ha’e ombohovái ichupe: Che ambohasáta ne renondépe che reko jajaipa reheve, ha hatã ha’éta pende Ruete réra ne renondépe; ha aiporiahuverekóta upe aiporiahuverekosévape, ha chepy’aporãta upe chepy’aporãséva ndive.

20Ha he’ive: Nderehechamo’ãi katu che rova; pe kuimba’e ohecháva che rova katuete omanova’erã.

21Ha Ñanderuete he’ive: Eñemboja che rendápe ha eñembo’y pe itaguasu ári.

22Ha ahasáta che reko jajaipa reheve ne renonde rupi, Che romoingéta pe itakuaguasu jurúpe ha amo’ãta nde rova che pópe.

23Ani hag̃ua nde rehecha che rova, ha ahasa rire ne renondégui aipe’a jevýta che po nde rovágui, nde rehecha hag̃ua che atukupénte.