Romayguakuérape 4 - Biblia en Guaraní - ?anderuete ?e’? Por? 2015

Abraham ojesalva

ojerovia haguére, ndaha’éi ojapo haguére Moises rembiapoukapykuéra.

1Mba’épa upéicharamo ja’éta, ohupity hague Abraham ñande ru ypykue to’oguiguápe.

2Abraham ojeguereko rire heko potĩva ramo hembiapo porãngue rupi, ha’e oñembotuichava’erãmo’ã, ndaha’éi ramojepe Ñanderuete renondépe.

3Mba’épa Ñanderuete kuatiañe’ẽ he’i: Abraham ojerovia haguére Ñanderuete rehe, ojeguereko ichupe heko potĩva ramo (Génesis 15,6).

4Upe omba’apóvape oñeme’ẽva’erã hembiapo repykue, hembiapo repy ningo ndaha’éi peteĩ jopói; pe tembiapo repy pe mba’apohára derécho voínte (imba’e voínte).

5Upe ojeroviáva Ñanderuete rehe, nahembiapo porãi ramojepe, ojeguereko ichupe heko potĩva ramo. Pe heko potĩva ojesalva ojeroviágui.

6Upéicha David he’i avei: Ovy’aite pe kuimba’e ha pe kuña Ñanderuete oguereko ramo ichupe heko potĩva ramo hembiapo porã’ỹre.

7Ovy’aite pe kuimba’e ha kuña oñemopotĩ rire ijejavykuégui ha hembiapo vaikue oñeperdonáma,

8ha ovy’aite pe kuimba’e, Ñanderuete omboyke rire opaite hi’angaipakuerakue, (Salmokuéra 32,1-2).

9Ko vy’a piko oñeme’ẽ umi Judayguakuérape g̃uarãnte oñekytĩ’o (oñecircuncida) haguére térãpa oñeme’ẽ avei tetã ambueyguakuérape g̃uarã oñekytĩ’o’ỹ ramojepe. Ñande ñambohovái: Mokõivévape g̃uarã oñeme’ẽva’erã ko’ã Hesu me’ẽmby.

10Ha araka’épa péva oikóra’e. Abraham oñekytĩ’o mboyve térãpa oñekytĩ’o rire. Jaikuaa porã ningo ko vy’a ha teko potĩ oñeme’ẽ hague ichupe ha’e oñekytĩ’o mboyve voi.

11Pe ñekytĩ’o oñeme’ẽnte ichupe peteĩ techaukaha (señal) ramo, ojerovia haguére Ñanderuete ñe’ẽ rehe. Pe vy’a ha teko potĩ oñeme’ẽ Abrahámpe heta áño ha’e oñekytĩ’o mboyve.

12Upéicha Abraham opyta mokõivéva ru ramo, ha’e oiko umi oñekytĩ’óva ru ramo, ojeroviágui hikuái Ñanderuete rehe ha avei umi oñekytĩ’o’ỹva ru ramo, ojeroviágui hikuái avei Ñanderuete rehe.

Ñanderuete omoañete ipromésa

Abrahámpe ha’e ojerovia haguére

13Abrahámpe ha iñemoñarenguérape oñeme’ẽ ko promésa ko múndo imba’erãha, ha’e ojerovia haguére Ñanderuete rehe, ndaha’éi ojapo haguére Moises rembiapoukapykuéra (Abraham árape ndaipóri gueteri Moises rembiapoukapy).

14Oñeme’ẽ ramo ko múndo umi ojapóvape Moises rembiapoukapykuéra imba’erã ramo, pe jerovia Ñanderuete rehe ndaha’emo’ãi mba’eve, ha Ñanderuete promésa reiete avei.

15Moises rembiapoukapy hi’a pochy. Oĩ’ỹháme Moises rembiapoukapy, upépe ndaipóri angaipa térã jejavy, (ndoikuaáigui Moises rembiapoukapykuéra).

16Upévare pe promésa Ñanderuete ome’ẽmava’ekue Abrahámpe oñemoañete hag̃ua umi Ñanderuete rehe ojeroviáva rekovépente. Ñanderuete ome’ẽ ipromésa peteĩ jopói ramo (regálo ramo), ndaha’éi kuimba’e rembiapo porã rupi. Ha péicha ko promésa kóva opyta opaite Abraham ñemoñarenguérape g̃uarã, umi Judaygua oñekytĩ’ova’ekuépe, ojeroviágui hikuái, ha avei umi tetã ambueygua oñekytĩ’o’ỹvape, ojeroviágui avei Ñanderuete rehe.

17Ñanderuete kuatiañe’ẽme he’i: Ñanderuete he’i Abrahámpe: Che romoĩma heta tetã ru ramo che renondépe, nde rejerovia haguére che promésa rehe, ha reikuaágui Che amoingove jevyha umi omanova’ekuépe ha amoingoveva’erã avei umi ndoikóivape gueteri (Génesis 17,5).

18Abraham ojerovia ha oha’ãrõhína ndaipóri ramojepe mba’eve oha’ãrõ hag̃ua, ha’e ojerovia hatã oiko hag̃ua ichugui heta tetã ru ramo, oje’e haguéicha ichupe: Ne ñemoñarenguérape ambohetáta umi jasytata ára rehe oĩ háicha, (Génesis 15,5).

19Ha’e naikangýi ijeroviápe, oikuaa ramojepe hete oikomaha omano ramoguaréicha, oguerekóguima haimete 100 áño, ha ndojepy’apýiri hembireko Sára ryepy ijypiha rehe.

20Ha’e ndaipy’a mokõiri Ñanderuete promésa rehe, imbarete uvei ijeroviápe, ha omomba’eguasu Ñanderuetépe hekove rupi.

21Ha ogueroviaite ningo Ñanderuete ipu’akataha ojapopa peve, Ha’e opromete hagueichaite ichupe.

22Upévare Ñanderuete ohechakuaa avei ichupe heko potĩva ramo.

23Ha ndaheseihápe año ojehai Ñanderuete kuatiañe’ẽme, Abraham ojerovia haguére oiko heko potĩva ramo.

24Ojehai avei ñanderehehápe, ñande jajerovia hag̃ua avei Ñanderuete rehe, ha jaguerovia hag̃ua avei Ha’e omoingove jevy hague Ñandejára Hesúpe omanova’ekue apytégui.

25Ha Ñanderuete ome’ẽ Hesu Crístope ojejuka hag̃ua ñane angaipakuéra rehe ha iñemano rupi Ha’e ñandejogua angaipa ha Satana poguýgui, ñasẽ ha jaiko hag̃ua Ha’érupi heko potĩva ramo.